ભારતના ચૂંટણી પંચે બુધવાર, 18 જાન્યુઆરીએ ઉત્તરપૂર્વના ત્રણ રાજ્યોમાં વિધાનસભાની ચૂંટણીની તારીખોની જાહેરાત કરી હતી. આ જાહેરાત મુજબ ત્રિપુરામાં 16 ફેબ્રુઆરીએ મતદાન થશે, જ્યારે મેઘાલય અને નાગાલેન્ડમાં 26 ફેબ્રુઆરીએ વિધાનસભાની ચૂંટણી યોજાશે. ત્રણેય રાજ્યોની વિધાનસભાની ચૂંટણીનું રિઝલ્ટ 2 માર્ચે જાહેર થશે.
ત્રિપુરામાં ભાજપની સરકાર છે, જ્યારે નાગાલેન્ડમાં નેશનાલિસ્ટ ડેમોક્રેટિક પ્રોગ્રેસિવ પાર્ટી સત્તામાં છે. મેઘાલયમાં નેશનલ પીપલ્સ પાર્ટીની સરકાર છે.
મુખ્ય ચૂંટણી કમિશનર રાજીવ કુમાર અને ચૂંટણી કમિશનર અનૂપ ચંદ્ર પાંડેએ 3 પૂર્વોત્તર રાજ્યો માટે નવી દિલ્હીમાં ઓલ ઈન્ડિયા રેડિયોના રંગ ભવન ઓડિટોરિયમમાં ચૂંટણીની તારીખ જાહેર કરી હતી.
આ વર્ષે ત્રણ પૂર્વોત્તર રાજ્યોમાં વિધાનસભાની ચૂંટણીઓ દેશમાં પ્રથમ છે, પરંતુ વિશેષ ધ્યાન ત્રિપુરા પર કેન્દ્રિત કરવામાં આવશે. ડાબેરી પક્ષોના ગઢ ગણાતા ત્રિપુરામાં 2018માં ભાજપ પ્રથમ વખત જીત્યું હતું. તાજેતરના મહિનાઓમાં, પક્ષ બળવોને કાબૂમાં લેવાનો પ્રયાસ કરી રહ્યો છે, રાજ્યમાં હાલ ભાજપની સરકાર છે. ત્રણેય રાજ્યોમાં વિધાનસભાની બેઠકોની સંખ્યા 60 છે. ત્રણેય રાજ્યમાં બહુમતનો આંકડો 31 છે. નાગાલેન્ડમાં હાલની વિધાનસભાની મુદત 12 માર્ચે, મેઘાલયમાં 15 માર્ચે અને ત્રિપુરામાં 22 માર્ચે પૂરી થાય છે.
