ભારત અને બ્રિટન વચ્ચેના સૂચિત મુક્ત વેપાર કરાર (FTA) બંને દેશો માટે ઉચ્ચ પ્રાથમિકતા છે અને આ કરાર માટે વાટાઘાટોનો આગામી રાઉન્ડ આગામી મહિને યોજાશે, એમ વાણિજ્ય અને ઉદ્યોગ પ્રધાન પીયુષ ગોયલે મંગળવારે જણાવ્યું હતું. સ્ટીલ ઉદ્યોગની એક ઇવેન્ટમાં તેમણે કહ્યું હતું કે આ સમજૂતીમાં પ્રગતિ થઈ રહી છે અને તેના સારા પરિણામો મળશે. બ્રિટનમાં રાજકીય ગતિવિધિને કારણે થોડો અવરોધ ત્યાં સુધી તેમાં ઘણી જ ઝડપથી પ્રગતિ થઈ રહી હતી. સદનસીબે, હવે સ્થિર સરકાર છે. હું મારા યુકેના સમકક્ષના સંપર્કમાં છું. અમે સંભવતઃ ટૂંક સમયમાં રૂબરૂ મીટિંગ કરવા માટે સાથે મળીને કામ કરી રહ્યા છીએ. અમારી ટીમો પહેલેથી કાર્યરત છે.

થમ્સ અપ, ગોલ્ડ સ્પોટ અને લિમ્કા જેવી જાણીતી સોફ્ટ ડ્રિન્ક બ્રાન્ડ્સ કોકા કોલાને વેચ્યાના આશરે ત્રણ દાયકા પછી રમેશ ચૌહાણ બિસ્લેરી ઇન્ટરનેશનલનું ₹6,000-7,000 કરોડમાં ટાટા કન્ઝ્યુમર પ્રોડક્ટ્સ લિમિટેડ (TCPL)ને વેચાણ કરશે. ટાટા ગ્રુપ સાથેના સોદાના ભાગરૂપે કંપનીનું વર્તમાન મેનેજમેન્ટ બે વર્ષ સુધી ચાલુ રહેશે. 82 વર્ષના ચૌહાણનું આરોગ્ય પણ મજબૂત નથી અને કહે છે કે તેમની પાસે બિસ્લેરીને વિસ્તરણના આગામી સ્તર પર લઈ જવા માટે કોઈ અનુગામી નથી. ચૌહાણે કહ્યું કે દીકરી જયંતિ બિઝનેસમાં બહુ ઉત્સુક નથી. બિસ્લેરી ભારતની સૌથી મોટી પેકેજ્ડ વોટર કંપની છે.

મધ્ય ચીનમાં આવેલી વિશ્વની સૌથી મોટી આઇફોન ફેક્ટરીમાં બુધવારે કોરોના નિયંત્રણો અને વેતનના મુદ્દે કર્મચારીઓએ બુધવારે હિંસક દેખાવો કર્યા હતા. કર્મચારીઓ અને સુરક્ષા જવાનો વચ્ચે અથડામણ થઈ હતી અને તેના પર સમગ્ર વિશ્વનું ધ્યાન ગયું હતું. એક નિવેદનમાં, કંપનીએ જણાવ્યું હતું કે કામદારોએ પ્લાન્ટમાં પગાર અને કોરોના નિયંત્રણો વિશે ફરિયાદ કરી હતી, પરંતુ કંપનીએ ઝેંગઝોઉ ફેક્ટરીમાં કોવિડ-પોઝિટિવ સ્ટાફની નવી ભરતી કરી હોવાનો ઇનકાર કર્યો હતો.

હોંગ કોંગમાં જ પોતાનું પ્રાદેશિક હેડ કવાર્ટર ધરાવતી અમેરિકન કંપનીઓની સંખ્ય કરતાં ચીની કંપનીઓની સંખ્યા 30 વર્ષમાં પહેલીવાર વધુ રહી છે. આ વર્ષે 1લી જુનના રોજ હોંગ કોંગમાં પ્રાદેશિક હબ ધરાવતી અમેરિકન કંપનીઓની સંખ્યા 240ની હતી, જે એક વર્ષ અગાઉ 254 હતી. આ વર્ષની 240ની સંખ્યા 2002 પછીની સૌથી ઓછી છે. સેન્સસ એન્ડ સ્ટેટિસ્ટિક્સ ડીપાર્ટમેન્ટ દ્વારા જાહેર કરાયેલી માહિતીમાં દર્શાવાયું છે કે, હોંગ કોંગમાં ચીની કંપનીઓની સંખ્યા 1લી જુન, 2022ના રોજ 251ની હતી.

એક્ટ્રેસ રીચા ચઢ્ઢાએ આર્મીની મજાક ઉડાવતા વિવાદ

બોલિવૂડ અભિનેત્રી રિચા ચઢ્ઢા ગુરુવારે ટ્વીટર પર આર્મી ઓફિસરનું અપમાન કરતી એક પોસ્ટને કારણે વિવાદમાં સપડાઈ હતી અને આખરે માફી માગી હતી. રિચા ચઢ્ઢાએ પાકિસ્તાન-અધિકૃત કાશ્મીર (PoK)ને પાછું લેવા અંગેના ટોચના સૈન્ય અધિકારીના નિવેદનની ચીન સાથેની ગલવાન અથડામણનો ઉલ્લેખ કરીને મજાક ઉઠાવી હતી. પાકિસ્તાન દ્વારા ગેરકાયદેસર રીતે કબજે કરાયેલા કાશ્મીરના પરત લેવા અંગે સંરક્ષણ પ્રધાન રાજનાથ સિંહના નિવેદન પર પ્રતિક્રિયા આપતા નોર્ધન આર્મી કમાન્ડર ઉપેન્દ્ર દ્વિવેદીએ કહ્યું હતું કે આર્મી પાકિસ્તાનને યોગ્ય જવાબ આપવા માટે “હંમેશા તૈયાર” છે.

ધ કાશ્મીર ફાઇલ્સ ફિલ્મ અંગેની ઇઝરાયેલી નિર્માતાની ટીપ્પણી પછી વિવાદ

ગોવામાં ઈન્ટરનેશનલ ફિલ્મ ફેસ્ટિવલ ઓફ ઈન્ડિયા (IFFI)માં ‘ધ કાશ્મીર ફાઈલ્સ’ ફિલ્મ અંગે ઈઝરાયેલી ફિલ્મમેકર અને જ્યૂરી હેડ નાદવ લેપિડના એક નિવેદનના કારણે મોટો વિવાદ ઊભો થયો હતો. તેમણે ગોવામાં આયોજિત 53માં ફિલ્મ ફેસ્ટિવલ સમારોહમાં ‘ધ કાશ્મીર ફાઈલ્સ’ને ‘વલ્ગર પ્રોપેગેન્ડા’ ગણાવી છે. લેપિડે ગઈકાલે કહ્યું હતું કે ફેસ્ટિવલમાં આ ફિલ્મના સ્ક્રીનિંગ વખતે જ્યુરી “વ્યગ્ર બન્યા હતા અને આઘાત લાગ્યો” હતો.

અમિતાભ બચ્ચનના નામ, ફોટો અને અવાજનો ઉપયોગ કરવા હવે તેમની મંજૂરી લેવી પડશે

બોલીવૂડના પીઢ અને મિલેનિયમ સ્ટાર અમિતાભ બચ્ચનની મંજૂરી વગર અનેક બાબતોમાં તેમની તસવીર, નામ અને અવાજનો બેરોકટોક દુરુપયોગ થતો હતો. આ બાબત અમિતાભ બચ્ચનના ધ્યાનમાં આવતા તેમણે કોર્ટમાં અરજી કરી હતી, જેના પર તાજેતરમાં સુનાવણી શરૂ થઇ હતી. આ અંગે દિલ્હીની હાઇકોર્ટે ચૂકાદો આપ્યો હતો કે, અરજદાર અમિતાભ બચ્ચનની મંજૂરી વગર તેમના ફોટો, અવાજ અને તસવીરોનો ઉપયોગ કરી શકાશે નહીં.

વધુ એક સ્ટાર ક્રિકેટર અભિનેત્રી સાથે લગ્નબંધનમાં બંધાશે

ભારતીય ક્રિકેટર કે એલ રાહુલ અને બોલિવૂડ એક્ટ્રેસ અથિયા શેટ્ટી ટૂંકસમયમાં લગ્નબંધનમાં જોડાય તેવા અહેવાલ છે. બંને લાંબા સમયથી એકબીજા સાથે રિલેશનશિપમાં છે. જો કે હવે બંનેના લગ્નની તારીખ અને લગ્નનો આઉટફિટ પણ નક્કી થઈ ગયો હોવાનું માનવામાં આવે છે. તાજેતરના અહેવાલો મુજબ બંને આવતા વર્ષે જાન્યુઆરીમાં લગ્નના બંધનમાં બંધાવા જઈ રહ્યા છે. એક ન્યૂઝ પોર્ટલના રિપોર્ટ અનુસાર રાહુલ અને અથિયાએ લગ્નની તારીખ નક્કી કરી લીધી છે. જાન્યુઆરી 2023માં બંને જીવનભર એકબીજાના બની જશે.