બિન બાસમતી ચોખાની નિકાસ પર પ્રતિબંધ મૂક્યા પછી વિશ્વમાં ડુંગળીના સૌથી મોટા નિકાસકાર ભારતે શનિવાર, 19 ઓગસ્ટે ડુંગળીની નિકાસ પર 31 ડિસેમ્બર સુધી 40 ટકાની જંગી જકાત લાદી હતી. સરકારના આ નિયંત્રણોથી દેશની નિકાસમાં આશરે 60 ટકાનો જંગી ઘટાડો થવાની ધારણા છે. ઘરેલુ બજારમાં ઉપલબ્ધતામાં વધારો કરવા માટે નાણા મંત્રાલયે એક નોટિફિકેશન જારી કરીને આ નિર્ણયની જાહેરાત કરી હતી. ભારતના આ નિર્ણયથી એશિયાના દેશો માટે ડુંગળી વધુ મોંઘી બનશે, કારણ કે બીજા દેશો મર્યાદિત સ્ટોક ઓફર કરે છે. આ વર્ષના અંત ભાગમાં કેટલાંક રાજ્યોમાં વિધાનસભાની ચૂંટણી પહેલા કેન્દ્ર સરકાર ડુંગળીના ભાવને અંકુશમાં રાખવા માગે છે.

સોનાના ભાવમાં મોટો વધારો થયો હોવા છતાં વિશ્વના વિવિધ દેશોની સેન્ટ્રલ બેન્કોએ ૨૦૨૩ના કેલેન્ડર વર્ષના પ્રથમ છ મહિનામાં સોનાની રેકોર્ડ ખરીદી કરી હતી. વર્લ્ડ ગોલ્ડ કાઉન્સિલના તાજેતરના રિપોર્ટ અનુસાર એપ્રિલ-જૂન ત્રિમાસિકગાળા દરમિયાન ખરીદી સુસ્ત પડી હતી, પરંતુ પ્રથમ ક્વાર્ટરમાં ખરીદી એટલી ઊંચી હતી કે રેકોર્ડ સર્જાયો હતો. વિશ્વની મધ્યસ્થ બેન્કોએ જાન્યુઆરીથી જૂન ૨૦૨૩ દરમિયાન લગભગ ૩૮૭ ટન સોનું ખરીદ્યું હતું. જૂન 2023ના અંત સુધીમાં, પીપલ્સ બેંક ઓફ ચાઇના (PBC)નો સોનાનો ભંડાર 67.95 મિલિયન ઔંસ (1,926 ટન) પર પહોંચ્યો હતો, જે અગાઉના મહિનાની સરખામણીમાં 680,000 ઔંસનો વધારો દર્શાવે છે.

ચાલુ નાણાકીય વર્ષના પ્રથમ ક્વાર્ટરમાં નફાના સંદર્ભમાં ભારતની સૌથી મોટી બેન્ક સ્ટેટ બેન્ક ઓફ ઈન્ડિયા (એસબીઆઈ) બિલિયોનેર ઉદ્યોગપતિ મુકેશ અંબાણીની રિલાયન્સ ઈન્ડસ્ટ્રીઝ કરતાં આગળ નીકળી ગઈ હતી અને દેશની સૌથી મોટી નફાકારક કંપની બની ગઈ હતી. એસબીઆઈએ પ્રથમ ક્વાર્ટરમાં 18,736 કરોડ રૂપિયાનો ચોખ્ખો નફો નોંધાવ્યો હતો. એસબીઆઈનો શેર ચાલુ વર્ષમાં જાન્યુઆરીથી અત્યાર સુધીમાં (યર ટુ ડેટ) 8.58 ટકા ઘટ્યો હતો. રિલાયન્સ ઈન્ડસ્ટ્રીઝ આ લિસ્ટમાં બીજા સ્થાન પર હતી, જેનો નફો રૂ.18,182 કરોડ નોંધાયો હતો. ઓએનજીસીએ પ્રથમ ક્વાર્ટરમાં રૂ.16,857 કરોડનો નફો કર્યો હતો અને દેશની સૌથી મોટી નફાકારક કંપનીઓમાં ત્રીજા સ્થાન પર હતી.

સાઇબર ફ્રોડના કેસોમાં તેલંગણા અને કેરળ રાજ્ય પોલીસની સૂચનાને પગલે આ બે રાજ્યોમાં સંબંધિત બેંકો દ્વારા સુરતની ઓછામાં ઓછી 27 ડાયમંડ મેન્યુફેક્ચરિંગ અને ટ્રેડિંગ કંપનીઓના બેંક ખાતાઓ બ્લોક કરવામાં આવ્યા હતાં. આ કંપનીઓમાં કેટલીક ટોચની નેચરલ ડાયમંડ ઉત્પાદક કંપનીઓ પણ સામેલ છે જેઓ દુનિયાભરમાં પોતાની ઓફિસ ધરાવે છે. તેલંગણા અને કેરળમાં સાઈબર ફ્રોડના કેસની તપાસ દરમિયાન પોલીસને જાણવા મળ્યું કે કેટલીક ડાયમંડ પેઢીઓ શંકાસ્પદ ટ્રાન્ઝેક્શન સાથે સંકળાયેલી હતી.

કેનેડા કુમારને મળી ભારતીય નાગરિકતા

કેનેડાની નાગરિકતા માટે ઘણીવાર ટીકાઓનો સામનો કરી રહેલા બોલિવૂડ અભિનેતા અક્ષય કુમારને દેશના 77મા સ્વતંત્રતા દિવસે ભારતીય નાગરિકતા આપવામાં આવી છે. ભારતીય નાગરિકતાના દસ્તાવેજ શેર કરતા અક્ષયકુમારે જણાવ્યું હતું કે “દિલ ઔર નાગરિકતા, દોનો હિન્દુસ્તાની. સ્વતંત્રતા દિવસની શુભકામનાઓ! જય હિંદ! અક્ષય કુમારને ઘણીવાર ‘કેનેડા કુમાર’ કહીને સોશિયલ મીડિયા પર ટ્રોલ કરાતો હતો. કેનેડાની નાગરિકતા પહેલા પણ અક્ષય પાસે ભારતની નાગરિકતા હતી. ફિલ્મો સારી ચાલી રહી ન હતી ત્યારે અક્ષય કેનેડામાં રહેવાનું વિચારી રહ્યો હતો.

‘ગદર-2’ રૂ.300 કરોડની ક્લબમાં સામેલ, હવે બોર્ડર-2ની તૈયારી

સની દેઓલની ગદર-2 ફિલ્મ રિલીઝ થયાના એક જ અઠવાડિયામાં રૂ.300 કરોડની ક્લબમાં સામેલ થઈ હતી. ફિલ્મની કુલ કમાણી રૂ.304.13 કરોડ રહી હતી. આની સાથે જ ‘ગદર-2’ પહેલા જ અઠવાડિયાંમાં સૌથી વધુ કલેક્શનના મામલે બીજી સૌથી મોટી હિન્દી ફિલ્મ બની હતી. શાહરુખ ખાનની ફિલ્મ ‘પઠાન’એ પ્રથમ સપ્તાહમાં રૂ.378 કરોડની કમાણી કરી હતી. જોકે ‘ગદર 2′ એ’ KGF 2′ નો રૂ.268 કરોડ અને ‘બાહુબલી 2’નો રૂ.247 કરોડનો રેકોર્ડ તોડી નાખ્યો છે. ગદર-2ની ઐતિહાસિક સફળતા પછી સની દેઓલ, જેપી દત્તા અને નિધિ દત્તાએ બોર્ડર-2 માટેની તૈયારી ચાલુ કરી દીધી છે. બોર્ડર-2 ભારત-પાકિસ્તાનના 1971ના યુદ્ધની પૃષ્ઠભૂમિમાં બનાવવામાં આવશે.

સન્ની દેઓલના જુહુ બંગલાની હરાજી અટકી

બેન્ક ઓફ બરોડાએ ટેકનિકલ કારણોસર એક્ટર અને ભાજપના સાંસદ સની દેઓલના મુંબઈના જુહુ વિસ્તારમાં આવેલા બંગલાની હરાજીને નોટિસ સોમવારે પાછી ખેંચી લીધી હતી. અગાઉ રવિવારે હરાજીની જાહેરાત કરાઈ હતી. અભિનેતાએ બેંકમાંથી મોટી લોન લીધી છે. તેને રૂ.56 કરોડ ચૂકવ્યા ન હતાં. બેંકે નોટિસ પાછી ખેંચી લેતા કોંગ્રેસે તેના પર સવાલો ઉઠાવ્યા હતા. શનિવારે બેંક ઓફ બરોડાએ સની દેઓલના વિલાની હરાજી અંગે એક જાહેરાત બહાર પાડી હતી. સનીએ બેંકમાંથી મોટી રકમની લોન લીધી હતી. આ લોન માટે તેણે મુંબઈના જુહુમાં ‘સની વિલા’ મોર્ગેજ પર આપ્યો હતો. તેના બદલે તેણે બેંકને લગભગ રૂ. 56 કરોડ રૂપિયા ચૂકવવાના હતા.

બોલીવૂડમાં નવી ફિલ્મોમાં ગીતોની અછત, જુની ફિલ્મોમાંથી ઉઠાંતરી

બોલીવૂડમાં અત્યારે બની રહેલી કેટલીક ફિલ્મોમાં નવા ગીતોની અછત ઊભી થઇ હોવાનું જણાય છે. આ અછતને પૂર્ણ કરવા માટે જુની ફિલ્મોના લોકપ્રિય ગીતોનો સહારો લેવામાં આવી રહ્યો છે. શાહરુખ ખાનની ‘જવાન’માં દેવઆનંદની ‘બીસ સાલ બાદ’ ફિલ્મનાં ગીત ‘બેકરાર કરકે હમેં’ના ઉપયોગ પછી હવે રાજ કપૂરની ‘શ્રી420’નાં ગીત ‘રમૈયા વસ્તા વૈયા’નો પણ ઉપયોગ કરવામાં આવ્યો છે. બોલીવૂડનાં જૂનાં ગીતોની રીમિક્સ કરવાના નામે આ રીતે બેફામ ઉપયોગની દર્શકો આકરી ટીકા કરી રહ્યા છે. બોલીવૂડના ફિલ્મ સર્જકો તથા સંગીતકારોએ સર્જનાત્મકતાના નામે કંઇ કર્યું નહીં હોવાથી અને હવે નવા કર્ણપ્રિય ગીતો બનતાં નથી એટલે આ રીતે જૂનાં ગીતોનો સહારો લેવો પડે છે તેવી ટીકા થઈ હતી. અગાઉ કરણ જોહરે બનાવેલી રણવીર અને આલિયાની ‘રોકી ઔર રાની કી પ્રેમ કહાની’માં પણ સાધનાની