ભારતની બીજા ક્રમની સૌથી મોટી આઇટી કંપની ઇન્ફોસિસમાં શેરહોલ્ડિંગને કારણે બ્રિટનના નવા વડા પ્રધાન ઋષિ સુનકના પત્ની અક્ષતા મૂર્તિને 2022માં ડિવિડન્ડ પેટે રૂ.126.61 કરોડ ($15.3 મિલિયન)ની કમાણી થઈ છે. ભારતના શેરબજારોને આપેલી નિયમનકારી માહિતી અનુસાર ઈન્ફોસિસના સહ-સ્થાપક નારાયણ મૂર્તિની પુત્રી અક્ષતા મૂર્તિ સપ્ટેમ્બરના અંત સુધીમાં ઈન્ફોસિસના 3.89 કરોડ શેર અથવા 0.93 ટકા ઇક્વિટી હિસ્સો ધરાવતા હતા. ઇન્ફોસિસના શેરના રૂ.1,527.40ના ભાવે આ ઇક્વિટી હિસ્સાનું મૂલ્ય રૂ.5,956 કરોડ (લગભગ $721 મિલિયન) થાય છે. કંપનીના સ્ટોક એક્સચેન્જ ફાઇલિંગ અનુસાર ઇન્ફોસિસે આ વર્ષે 31 મેના રોજ 2021-22 નાણાકીય વર્ષ માટે શેર દીઠ રૂ.16 અંતિમ ડિવિડન્ડ ચૂકવ્યું હતું. ચાલુ વર્ષ માટે કંપનીએ આ મહિને રૂ. 16.5ના વચગાળાના ડિવિડન્ડની જાહેરાત કરી હતી.

વડા પ્રધાન નરેન્દ્ર મોદીએ વડોદરમાં રવિવારે ભારતીય એરફોર્સ માટે યુરોપિયન સી-295 પરિવહન વિમાન માટે ઉત્પાદન સુવિધાનો શિલાન્યાસ કર્યા પછી જણાવ્યું હતું કે ભારત હવે ટ્રાન્સપોર્ટ એરક્રાફ્ટનું મુખ્ય ઉત્પાદક બનશે. શિલાન્યાસ સમારોહમાં નાગરિક ઉડ્ડયન પ્રધાન જ્યોતિરાદિત્ય સિંધિયા અને ગુજરાતના મુખ્યપ્રધાન ભૂપેન્દ્રભાઈ પટેલ પણ ઉપસ્થિત રહ્યા હતા. વડા પ્રધાને કહ્યું કે ભારત એક મુખ્ય ઉત્પાદન કેન્દ્ર બની ગયું છે અને દેશમાં આર્થિક સુધારાની નવી ગાથા લખાઈ રહી છે, કારણ કે તેમની સરકારની નીતિઓ “સ્થિર, અનુમાનિત અને ભવિષ્યવાદી” છે. તેમણે ગુજરાતના આ શહેરમાં યોજાયેલા સમારોહમાં તેમના સંબોધનમાં કહ્યું કે “આજે ભારત નવી માનસિકતા અને નવી કાર્ય સંસ્કૃતિ સાથે કામ કરી રહ્યું છે.”

છ મહિના સુધીના જાહેર અને કાનૂની વિવાદ બાદ ઇલોન મસ્કે ટ્વીટરને હસ્તગત કરવાનો 44 બિલિયન ડોલરનો સોદો ગુરુવાર (27 ઓક્ટોબર)એ પૂરો કર્યો હતો અને તરત આ માઇક્રોબ્લોગિંગ પ્લેટફોર્મના ભારતીય મૂળના સીઇઓ પરાગ અગ્રવાલ સહિતના ટોચના એક્ઝિક્યુટિવની હકાલપટ્ટી કરી હતી. વિશ્વના આ સૌથી ધનિક વ્યક્તિએ ટ્વીટરના ચીફ ફાઇનાન્શિયલ ઓફિસલ નેડ સેગલ અને કાનૂની બાબતો અને પોલિસી વેડ વિજય ગડ્ડેને પણ તેમના હોદ્દા પરથી દૂર કર્યા હતા. રોઇટર્સના અહેવાલ મુજબ આ ડીલની કામગીરી પૂરી થઈ ત્યારે પરાગ અગ્રવાલ અને સેગલ ટ્વીટરના સાન ફ્રાન્સિસ્કો ખાતેના હેડક્વાર્ટરમાં હતા અને તેમને ઓફિસની બહાર કાઢવામાં આવ્યા હતા.

અમેરિકામાં ફેડ દ્વારા વ્યાજદરમાં વધારો, રશિયા અને યુક્રેન યુદ્ધ જેવા નેગેટિવ પરિબળોને કારણે વિક્રમ સંવત ૨૦૭૮માં ડોલર સામે રૂપિયો ૧૦ ટકા તૂટયો હતો. ગયા વર્ષમાં રૂપિયો ૮૩.૨૯ની ઐતિહાસિક નીચી સપાટીએ સ્પર્શ્યો હતો. જોકે બીજા દેશોની સરખામણીમાં ભારતીય કરન્સીનો દેખાવ ડોલર સામે મજબૂત રહ્યો છે.નાણાંકીય વર્ષ ૨૩માં (૨૭ સપ્ટેમ્બર સુધી) વિશ્વના મુખ્ય કરન્સી સામે ડોલર ૧૬.૧ ટકા વધ્યો હતો. આની સામે ડોલર સામે રૂપિયો ૬.૮ ટકા તૂટયો છે, જે વિકસિત અને ઉભરતી અર્થવ્યવસ્થાની તુલનામાં ભારતીય કરન્સીએ સારી કામગીરી દર્શાવે છે. 19 ઓક્ટોબરએ અમેરિકાના ડોલર સામે ભારતનો રૂપિયો 60 પૈસા તૂટીને પ્રથમ વખત 83થી નીચી સપાટીથી નીચે ગબડ્યો હતો.

માધુરીએ ખરીદ્યો મોંઘેરો ફ્લેટ

એક સમયની બોલીવૂડની ધક ધક ગર્લ તરીકે જાણીતી માધુરી દીક્ષિતે મુંબઇના વૈભવી એરિયા વરલીમાં તાજેતરમાં એક મોંઘરો ફ્લેટ ખરીદ્યો હોવાનું કહેવાય છે. તેણે અંદાજે રૂ. 48 કરોડમાં 53મા માળે આલિશાન ફ્લેટ ખરીદ્યો છે. આ ફ્લેટમાંથી સમુદ્રનો સુંદર નઝારો માણી શકાય છે. સૂત્રોના જણાવ્યા મુજબ માધુરીએ 5384 ચોરસ ફૂટના ઘર માટે પ્રતિ સ્કે. ફૂટ રૂ. 90,000 ચૂકવ્યા હતા. તેને આ ફ્લેટ સાથે સાત કારનું પાર્કિંગ થઇ શકે તેટલી જગ્યા ફાળવવામાં આવી છે. આ સોસાયટીમાં ફૂટબોલ, ક્રિકેટ પીચ, સ્વિમિંગ પુલ સહિતની વૈભવી સવલતો ઉપલબ્ધ છે. કહેવાય છે કે, આ જ સોસાયટીમાં માધુરી અત્યારે ભાડાના એક ઘરમાં રહેતી હતી અને તે પણ સી વ્યૂ અપાર્ટમેન્ટ હતો, જેનું ભાડું મહિને 12 લાખ રૂપિયા હતું અને તે 5500 ચોરસ ફૂટ જગ્યામાં હતો.

સિદ્ધાર્થ – કિયારાને પૈણ ચઢ્યું?

બોલીવૂડની જાણીતી યુવા જોડી- સિદ્ધાર્થ મલ્હોત્રા અને કિયારા અડવાણી નજીકના ભવિષ્યમાં લગ્ન કરે તેવી ચર્ચા થઇ રહી છે. આમ તો તે બંને પોતાના સબંધો પર જાહેરમાં ઓછી જ વાત કરે છે પણ તેઓ વારંવાર સાથે જોવા મળે છે. તે બંને એક બીજા સાથે ગાઢ સંબંધમાં હોવાનું પણ કહેવાય છે. ચર્ચા તો એવી પણ છે કે, આવનારા છ મહિનામાં સિદ્ધાર્થ અને કિયારા લગ્ન કરશે. તેઓ એપ્રિલ-2023માં લગ્ન કરશે અને તેઓ માત્ર નજીકના મિત્રો અને પરિવારના સભ્યોની હાજરીમાં લગ્ન કરવાની યોજના બનાવી રહ્યા છે. ત્યારપછી તેઓ મુંબઈમાં એક ભવ્ય રિસેપ્શન સમારોહનું આયોજન કરશે. સિદ્ધાર્થ અને કિયારા પ્રથમવાર શેરશાહ ફિલ્મમાં સાથે જોવા મળ્યા હતા.

આયુષમાન ખુરાનાએ ફી કેમ ઘટાડી?

બોલીવૂડમાં સફળતાનો સ્વાદ ચાખી ચૂકેલો અભિનેતા આયુષમાન ખુરાના આજકાલ થોડો નિરાશ છે. તેની છેલ્લી બે ફિલ્મો ‘અનેક’ અને ‘ચંદીગઢ કરે આશિકી’ નિષ્ફળ જતાં આયુષમાને પોતાની ફીમાં ધરખમ ઘટાડો કરી નાખ્યો છે. કહેવાય છે કે અત્યાર સુધી ફિલ્મ દીઠ 25 કરોડ રૂપિયા જેવી ધરખમ રકમ લેતાં આયુષમાને હવે પોતાની ફી ઘટાડીને 15 કરોડ કરી નાખી છે. આયુષમાન અભિનેતા ઉપરાંત સારો ગાયક પણ છે. ‘ડૉ.જી’ ફિલ્મ માટે તેણે હમણાં ‘ઓ સ્વીટી સ્વીટી…’ મુખડાવાળું ગીત ગાયું, જેને કંપોઝ અમિત ત્રિવેદીએ કર્યું છે. આયુષ્યમાન કહે છે, ‘હું તો પહેલેથી જ સંગીતનો ચાહક રહ્યો છું. મેં અને અમિતે ‘અંધાધૂંધ’માં પણ સાથે કામ કર્યું હતું.’

સુષ્મિતા સેન દેખાશે પડકારરૂપ ભૂમિકામાં

સુષ્મિતા સેન હોટસ્ટારની વેબસિરીઝ ‘આર્યા’માં દમદાર અભિનય આપ્યા પછી ફરીથી સુષ્મિતા સેન હવે એક નવી વેબ સીરિઝમાં દેખાશે. હવે આવનારી વેબ સીરિઝ માટેનો તેનો પહેલો લૂક તાજેતરમાં જાહેર કર્યો છે. સુષ્મિતા સેનનો આ લૂક જોઈને સ્પષ્ટ જણાય છે કે તે ટ્રાન્સજેન્ડરનો રોલ કરશે. આવું પ્રથમવાર બનશે કે, કોઇ મિસ યુનિવર્સ ટ્રાન્સજેન્ડરની ભૂમિકા ભજવશે. કહેવાય છે કે, સુષ્મિતા સેન તેની નવી વેબસિરીઝમાં જાણીતી ટ્રાન્સજેન્ડર ગૌરી સાવંતનો રોલ કરશે. આ વેબસિરીઝ દ્વારા એક્ટિવિસ્ટ ગૌરી સાવંતના જીવનને દુનિયાની સામે લાવશે. ગૌરી સાવંતે ફક્ત ટ્રાન્સજેન્ડરના સમુદાયની સામે અવાજ ઉઠાવ્યો પણ સમાજમાં તેમને ઈજ્જત અને સન્માન મળે તે માટે ઘણું કામ કર્યું.