ભારતની સૌથી મોટી રિટેલર રિલાયન્સ રિટેલ વેન્ચર્સ યુકે સ્થિત ફેશન રિટેલર સુપરડ્રાઈના એશિયાના ત્રણ દેશો ખાતેના લાઇસન્સ અને બ્રાન્ડ એસેટ હસ્તગત કરશે. મુકેશ અંબાણીની કંપની ભારત, બાંગ્લાદેશ અને શ્રીલંકા ખાતેની કંપનીની આ એસેટ આશરે 40 મિલિયન પાઉન્ડ ($48 મિલિયન)માં હસ્તગત કરશે. આનાથી વિદેશી બ્રાન્ડ સાથે રિલાયન્સનું જોડાણ મજબૂત બનશે. બીજી તરફ મુશ્કેલીનો સામનો કરી રહેલી સુપરડ્રાયને ખૂબ જ જરૂરી ભંડોળ મળશે. ભારત, શ્રીલંકા અને બાંગ્લાદેશને આવરી લેતી સુપરડ્રાય બ્રાન્ડ, તેના ટ્રેડમાર્ક્સ અને અન્ય બૌદ્ધિક સંપદા અસ્કયામતો એક અલગ એકમમાં ટ્રાન્સફર કરવામાં આવશે.

દેશની સૌથી મોટી કાર ઉત્પાદક કંપની મારુતિ સુઝુકીને આવકવેરા વિભાગે રૂ.2,160 કરોડ ટેક્સ નોટિસ આપી હતી. આઈટી વિભાગની ડ્રાફ્ટ નોટિસ પ્રમાણે મારુતિ સુઝુકીએ વર્ષ 2019-20ના ગાળા માટે 2160 કરોડનો ટેક્સ ચુકવવાનો બાકી છે. આ અંગેની માહિતી આપતા મારુતિ સુઝુકીએ શેરબજારને જણાવ્યું કે કંપનીને નાણાકીય વર્ષ 2019-20 માટે ડ્રાફ્ટ એસેસમેન્ટ ઓર્ડર મળ્યો છે. આ અંગે કંપની વાંધો ઉઠાવશે અને ડિસ્પ્યુટ રિઝોલ્યુશન પેનલ સમક્ષ તેના વાંધા રજુ કરશે. કંપનીએ ખાતરી આપી છે કે આ ડ્રાફ્ટ એસેસમેન્ટ નોટિસથી તેના ફાઈનાન્સ, ઓપરેશન્સ અથવા કંપનીને લગતી બીજી કામગીરી પર કોઈ અસર નહીં પડે.

ઓરિજિનલ ઈક્વિપમેન્ટ ઉત્પાદકો, મૂળ ડિઝાઈન ઉત્પાદકો અને પાર્ટસ એન્ડ કમ્પોનન્ટ કંપનીઓના ભારે રોકાણને કારણે ભારત હવે મોબાઈલ ફોન માટે બીજા ક્રમનું સૌથી મોટું મેન્યુફેક્ચરિંગ હબ બન્યું છે, એમ મંગળવારે એક અહેવાલમાં જણાવાયું હતું. કાઉન્ટરપોઈન્ટ રિસર્ચના રીપોર્ટ અનુસાર, 2023માં ભારત તેના કુલ એસેમ્બલ મોબાઈલ ફોનના લગભગ 22 ટકા નિકાસ કરે તેવી અપેક્ષા છે. જોકે, ચીનની મેન્યુફેક્ચરિંગ અને સપ્લાય ચેઇન હજુ પણ લાંબા ગાળે તેની અગ્રણી ભૂમિકા જાળવી રાખશે,એમ વરિષ્ઠ સંશોધન વિશ્લેષક ઇવાન લેમે જણાવ્યું હતું.

ક્રિકેટ વર્લ્ડ કપથી યજમાન દેશ ભારતના અર્થતંત્રમાં રૂ.22,000 કરોડ (2.6 બિલિયન ડોલર)નો વેગ મળવાનો અંદાજ છે. એમ બેન્ક ઓફ બરોડાના રીપોર્ટમાં જણાવાયું હતું. ગુરુવારે ચાલુ થયેલી અને મધ્ય નવેમ્બર સુધી ચાલનારી આ ટુર્નામેન્ટથી દેશ વિદેશના ચાહકો આવશે. ક્રિકેટ વિશ્વની આ સૌથી મોટી ટુર્નામેન્ટથી ટ્રાવેલ, હોટેલ, એન્ટરટેઇમેન્ટ, ટુરિઝમ સહિતના ક્ષેત્રોને લાભ થશે. અર્થશાસ્ત્રીઓ જાહ્નવી પ્રભાકર અને અદિતિ ગુપ્તાએ બુધવારે એક નોંધમાં લખ્યું હતું કે, 10 શહેરોમાં મેચો રમાશે. તેનાથી ટ્રાવેલ અને હોસ્પિટાલિટી ક્ષેત્રને લાભ થશે. 2011 પછી ભારતમાં પ્રથમ વખત આયોજિત કરવામાં આવી રહેલી આ ઇવેન્ટની સાથે ત્રણ મહિનાની તહેવારોની સિઝન પણ ચાલુ થઈ છે.

ડિજિટલ પ્લેટફોર્મ પર સૌથી મોંઘી અભિનેત્રી કોણ છે?

આ વર્ષે બોલીવૂડની ઘણી અભિનેત્રીઓની અનેક ફિલ્મો અને વેબસીરિઝો પ્રદર્શિત થઈ છે. આ વેબસીરિઝનું રેટિંગ પણ સારું છે. અહીં એવી અગ્રણી અભિનેત્રી અંગે માહિતી રજૂ કરવામાં આવી છે જે ફિલ્મોની સાથે વેબસીરિઝમાં પણ ઇચ્છિત ફી મેળવી રહી છે. તમન્ના ભાટિયા લસ્ટ સ્ટોરીઝ માટે ચાર કરોડ ફી લીધી લસ્ટ સ્ટોરીઝમાં વિજય વર્મા સાથે રોમેન્ટિક સીન્સ આપીને ચર્ચા જગાવનાર તમન્ના ભાટિયાએ આ વેબસીરિઝ માટે ફી પેટે ચાર કરોડ લીધા હોવાનું કહેવાય છે. કાજોલ ધ ટ્રાયલ માટે 2 કરોડ લીધા કાજોલની વેબસીરિઝ ધ ટ્રાયલ પણ આ વર્ષે રિલીઝ થઈ હતી. કહેવાય છે કે તેને આ વેબસીરિઝના નિર્માતા તરફથી એક એપિસોડ માટે રૂ. 20થી 25 લાખ ચૂકવવામાં આવ્યા હતા. એટલે કે આઠ એપિસોડની આ સીરિઝ માટે તેને રૂ. 1.6 કરોડથી 2 કરોડ મળ્યા હતા.

બોની કપૂરે પાંચ વર્ષે ખોલ્યું શ્રીદેવીના મૃત્યુનું રહસ્ય

ભારતીય સિનેમાના પ્રથમ મહિલા સુપરસ્ટાર શ્રીદેવીનું 2018માં અકાળે અવસાન થયું હતું. શ્રીદેવીના મોત પછી તેમના પતિ અને ફિલ્મમેકર બોની કપૂરે આ મુદ્દે મૌન રહ્યા હતા. જોકે, શ્રીદેવીના મૃત્યુના પાંચ વર્ષ પછી બોની કપૂરે આ મુદ્દે કેટલીક સ્પષ્ટતા કરી છે. તેમણે જણાવ્યું હતું કે, શ્રીદેવી ખૂબ જ સ્ટ્રિક્ટ ડાયટ લેતા હતા. તેઓ મીઠા (નમક) વગરનું ભોજન કરતા હતા. ક્રેશ ડાયટિંગના લીધે શ્રીદેવીને બ્લેકઆઉટ્સ થતાં હતા એટલે કે તેઓ થોડા વખત માટે બેભાન થઈ જતાં હતા. બોની કપૂરે નાગાર્જુન સાથેની ફિલ્મની ઘટનાનો પણ ઉલ્લેખ કર્યો છે. નાગાર્જુન સાથે ફિલ્મ કરી રહેલા શ્રીદેવી બેભાન થઈ ગયા હતા અને તેના કારણે તેમનો દાંત પણ તૂટી ગયો હતો.

અનિલ કપૂરને આર્ટિફિશિયલ ઇન્ટેલિજન્સનો ડર લાગ્યો?

અત્યારે આધુનિક ટેકનોલોજીના જમાનામાં આર્ટિફિશિયલ ઈન્ટેલિજન્સની વધી રહેલી અસરથી સામાન્ય નાગરિકો પણ બાકાત રહી શક્યા નથી. આવી ટેકનોલોજીનો ઉપયોગના કારણે સેલિબ્રિટીઝ માટે ઘણીવાર અનેક સમસ્યાઓ પણ સર્જાય છે. આર્ટિફિશિયલ ઈન્ટેલિજન્સની મદદથી મોટી હસ્તીઓના અવાજ અને ફોટોગ્રાફને મોર્ફ કરવાની પ્રવૃત્તિ સોશિયલ મીડિયા પર વ્યાપક રીતે જોવા મળે છે. કેટલાક લોકો આર્ટિફિશિયલ ઈન્ટેલિજન્સનો ઉપયોગ એટલી ચાલાકીથી કરે છે કે, ઓરિજિનલ અને ફેઇક વચ્ચેનો તફાવત ઓળખવો મુશ્કેલ બની જાય છે.

અભિનેતા શાહરૂખ ખાનને Y+ સુરક્ષા કવચ

મહારાષ્ટ્ર પોલીસે બોલિવૂડ સુપરસ્ટાર શાહરૂખ ખાનને તેના જીવન માટે સામે સંભવિત જોખમોને ધ્યાનમાં રાખીને Y+ સુરક્ષા કવચ પૂરું પાડ્યું છે, એમ એક અધિકારીએ સોમવારે જણાવ્યું હતું. Y+ સુરક્ષા કવરમાં છ કમાન્ડો સહિત 11 સુરક્ષા કર્મચારીઓ અને પોલીસ એસ્કોર્ટ વાહનનો સમાવેશ થાય છે. અધિકારીએ જણાવ્યું કે 57 વર્ષના શાહરુખને તેની નવી ફિલ્મ “જવાન”ની રિલીઝ પછી ધમકીઓ મળી રહી છે. આ સુરક્ષા કવચ ચુકવણીના આધારે આપવામાં આવે છે. ખાને તેમની સુરક્ષા માટે ચૂકવણી કરવી પડશે.