ટાટા ગ્રૂપ તેની ચાર એરલાઇન બ્રાન્ડ્સને એર ઇન્ડિયા હેઠળ મર્જ કરવાની યોજના પર વિચારણા કરી રહ્યું છે. આ રીતે એર ઇન્ડિયા ઉડ્ડયન ક્ષેત્રમાં ફરી સામ્રાજ્યને ઊભું કરી શકશે, એમ સૂત્રોને ટાકીને મીડિયા અહેવાલમાં જણાવાયું હતું. આ એરલાઇન્સમાં એર ઇન્ડિયા, વિસ્તારા, એર ઇન્ડિયા એક્સપ્રેસ અને એરએશિયા એક્સપ્રેસનો સમાવેશ થાય છે. ભારતનું સૌથી મોટું ઔદ્યોગિક જૂથ વિસ્તારા બ્રાન્ડને રદ કરવાનું પણ વિચારી રહ્યું છે. વિસ્તારા બ્રાન્ડ ટાટા સન્સ અને સિંગાપોર એરલાઇન્સ વચ્ચે સંયુક્ત સાહસ છે. સૂત્રોએ જણાવ્યું હતું કે, સિંગાપોર એરલાઇન્સ સંયુક્ત એન્ટિટીમાં કેટલો હિસ્સો લેવો જોઈએ તેનું મૂલ્યાંકન કરી રહી છે.

એનર્જી અને ખાદ્ય ચીજવસ્તુઓના ભાવમાં ઉછાળાને પગલે યુકેમાં ફુગાવો ઉછળીને 41 વર્ષની ટોચે પહોંચ્યો છે. તેનાથી જીવનનિર્વાહના ખર્ચની કટોકટીમાં વધુ વકરી છે. ઓફિસ ફોર નેશનલ સ્ટેટિસ્ટિક્સ (ONS)એ બુધવારે જણાવ્યું હતું કે ઓક્ટોબરમાં કન્ઝ્યુમર પ્રાઇસ ઇન્ડેક્સ વધીને 11.1 ટકા પર પહોંચ્યો હતો, જે 1981 પછીના સર્વોચ્ચ સ્તરે છે. સપ્ટેમ્બરમાં ફુગાવો 10.1 ટકા હતો, જે 40 વર્ષમાં સૌથી વધુ હતો. ફુગાવો સતત વધતા લોકોને રાહત આપવા માટે સરકાર પર દબાણ વધી રહ્યું છે.

યુદ્ધ, વરસાદ અને આર્થિક મુશ્કેલીઓથી ચાલુ વર્ષે યુક્રેનના ઘઉંના વાવેતરમાં આશરે 40 ટકાનો ઘટાડો થયો છે. વિશ્વના અગ્રણી ઘઉં ઉત્પાદક અને નિકાસકાર દેશોમાં યુક્રેનનો સમાવેશ થાય છે, તેથી ઘઉંના વૈશ્વિક સપ્લાયને વધુ નેગેટિવ અસર થવાની ધારણા છે. વિશ્લેષકોએ જણાવ્યું હતું કે યુક્રેનમાં આ વર્ષે લગભગ 19 મિલિયન ટન ઘઉંના પાકનો અંદાજ છે, જે અગાઉની સિઝનના 33 મિલિયન ટનના રેકોર્ડથી 40% કરતાં ઓછો છે અને 2023 માં ઉત્પાદનમાં વધુ તીવ્ર ઘટાડો થવાની ધારણા છે.

ભારતમાં ગયા વર્ષે કોરોના વાયરસ અને વિઝા અંગેના નિયંત્રણો હોવા છતાં અમેરિકાના 4.29 લાખ અને બાંગ્લાદેશના 2.4 લાખ નાગરિકો સહિત 15 લાખથી વધુ વિદેશીઓએ દેશની મુલાકાત લીધી હતી, એમ અધિકારીઓએ જણાવ્યું હતું. ગૃહ મંત્રાલયના અધિકારીએ જણાવ્યું હતું કે 2021 દરમિયાન વિદેશીઓના કુલ આગમનમાં દસ દેશોનો હિસ્સો 74.39 ટકા રહ્યો હતો, જ્યારે 25.61 ટકા વિદેશીઓ બાકીના દેશોમાંથી આવ્યા હતા.

હવે નવા વિષયો પર ફિલ્મ બનાવવાનો સમય આવ્યો છેઃ રાજુકમાર રાવ

રાજકુમાર રાવની મર્ડરમિસ્ટ્રી ફિલ્મ ‘મોનિકા ઓ માય ડાર્લિંગ’ 11 નવેમ્બરે સીધી ડિજિટલ પ્લેટફોર્મ પર પ્રદર્શિત થઈ છે. દર્શકોએ ફિલ્મ અને રાજકુમારના અભિનયની પ્રશંસા કરી છે. આ વર્ષે અગાઉ, તેની ‘બધાઈ દો’ નામની ફિલ્મ મોટા પડદે રિલીઝ થઈ હતી, પરંતુ ખાસ સફળતા મેળવી શકી ન હતી. રાજકુમારે આ વર્ષે બોલિવૂડ પર લાગેલા ગ્રહણની વાતને સ્વીકારી છે અને નવા વર્ષમાં જોરદાર કમબેક કરવાની આશા વ્યકત કરી છે. રાજકુમારે બોલિવૂડને મળેલી નિષ્ફ્ળતા સ્વીકારતાં કહ્યું હતું કે, આપણે બધા એક જ વાત કરી રહ્યા છીએ કે, જુઓ આ ફિલ્મ ન ચાલી.

આદિપુરુષમાં ક્રિતિ સેનન સીતાની ભૂમિકામાં

પ્રભાસની મલ્ટિસ્ટારર ફિલ્મ ‘આદિપુરુષ’ની રિલીઝ પહેલાં જ વિવાદ સર્જાયો છે. ભગવાન હનુમાન અને રાવણ જેવા પાત્રોનું ખોટી રીતે નિરુપણ થયું હોવાનું લાગતાં ફિલ્મને નેટિઝન્સે ખૂબ જ ટ્રોલ કરી છે. આદિપુરુષ માટે બોયકોટ ટ્રેન્ડ શરૂ થતાં જ ફિલ્મ નિર્માતાઓ ચિંતિત છે અને તેમણે વીએફએક્સમાં ફેરફાર શરૂ કર્યો છે. ફિલ્મમાં રાવણની દાઢી દૂર કરવાથી લઇને ભગવાન હનુમાનના દેખાવમાં ફેરફાર કરવા માટે વીએફએક્સની મદદ લેવાશે અને તેના માટે રૂ. ૩૦ કરોડનો ખર્ચ થશે.

રાણી મુખરજી લેખિકા બની

ફિલ્મ નિર્માતા આદિત્ય ચોપરા સાથે સંસાર શરૂ કર્યા પછી રાણી મુખરજી હવે પોતાની આત્મકથા લખી રહી છે. આ આત્મકથા આવતાં વર્ષે માર્ચમાં તેના જન્મદિને પ્રકાશિત કરવાનું આયોજન છે. ‘કુછ કુછ હોતા હૈ’, ‘કભી અલવિદા ના કહેના’ તથા ‘વીર ઝારા’ જેવી ફિલ્મોમાં અભિનય આપીને રાણીએ બોલીવૂડમાં પોતાનું સ્થાન જમાવ્યું છે.તેણે બોલીવૂડનાં સૌથી મોટાં બેનર ગણાતાં યશરાજ ફિલ્મ્સના માલિક આદિત્ય ચોપરા સાથે ખૂબ જ ગુપ્ત ઈટલીમાં લગ્ન કર્યાં હતાં તેની પણ બહુ ચર્ચા થઈ હતી. જોકે હવે તે એક બાળકીની માતા પણ છે. રાણીની બંટી ઔર બબલી ફિલ્મ બહુ સફળ ગઈ હતી પરંતુ તેની સિકવલ ફિલ્મ સુપર ફ્લોપ ગઈ હતી.

શું હવે કેટરિનાનો વારો છે?

આલિયા ભટ્ટ અને બિપાશા બાસુ તાજેતરમાં જ માતા બન્યા પછી હવે છે. હવે બોલીવૂડમાં કેટરિના કૈફ અને વિકી કૌશલના માતા-પિતા બનવાની ચર્ચા ચાલી રહી છે. વરુણ ધવનની પત્ની નતાશા દલાલ પણ પ્રેગ્નન્ટ હોય એવી ચર્ચા છે. આ તમામની વચ્ચે હવે કેટરિના પણ પ્રેગ્નન્ટ હોવાની વાતો બહાર આવી રહી છે. તેણે ગયા વર્ષે ડિસેમ્બરમાં લગ્ન કર્યાં હતાં. તેમનાં લગ્નને એક વર્ષ પૂરું થવા આવ્યું છે. તેની નવી ફિલ્મ ‘મેરી ક્રિસમસ’ના સેટ પરનો તેનો એક ફોટો વાઇરલ થયો છે. આ ફોટોમાં તેનું બેબી બમ્પ દેખાઈ રહ્યું હોવાનું અનુમાન તેના ચાહકો લગાવી રહ્યા છે.