ભારતના અગ્રણી ઔદ્યોગિક ગ્રૂપ ટાટા ગ્રૂપે બુધવાર, 19 જુલાઇએ યુકેમાં 4 બિલિયન પાઉન્ડથી વધુના રોકાણ સાથે ગ્લોબલ બેટરી સેલ ગીગાફેક્ટરીની સ્થાપના કરવાની મેગા યોજનાની જાહેરાત કરી હતી. આ ફેક્ટરીનો હેતુ ઓટોમોટિવ ક્ષેત્રના ઇલેક્ટ્રિક મોબિલિટીમાં પરિવર્તનની પ્રક્રિયાને મદદ કરવાનો છે. નવી ગીગાફેક્ટરીમાં ઉત્પાદન 2026માં શરૂ થવાનો અંદાજ છે. આ નવી ગીગાફેક્ટરી પશ્ચિમ ઇંગ્લેન્ડના સમરસેટમાં સ્થાપવામાં આવે તેવી ધારણા છે. યુકે સરકારે ગ્રૂપની 40GW બેટરી સેલ ગીગાફેક્ટરી માટેની યોજનાઓને આવકારી હતી.

ડાયમંડ સિટી તરીકે ઓળખાતા સુરત ખાતે આવેલી ડાયમંડ બુર્સની બિલ્ડિંગ હવે અમેરિકાના પેન્ટાગોનને પાછળ રાખીને દુનિયાની સૌથી મોટી ઓફિસ બિલ્ડિંગનું સ્થાન મેળવ્યું છે. સુરત ડાયમંડ બુર્સ 15 માળનું કોમ્પ્લેક્સ છે જેની ફ્લોર સાઈઝ લગભગ 71 લાખ ચોરસ ફૂટ કરતા પણ વધારે છે. આશરે રૂ 32 અબજના ખર્ચે તૈયાર થયેલી ગુજરાતની આ બિલ્ડિંગે તેની સાઈઝના આધારે વર્લ્ડ રેકોર્ડ બનાવ્યો છે. આ કોમ્પ્લેક્સ 35 એકર કરતા વધુ જમીન પર પથરાયેલું છે. વિશ્વના ટોચના મીડિયા જૂથોએ આ સિદ્ધિની નોંધ લીધી હતી.

કટોકટીના સમયમાં અદાણી ગ્રૂપમાં અબજો ડોલરનું રોકાણ કરનારી એનઆરઆઇ રાજીવ જૈનના વડપણ હેઠળની ફ્લોરિડા સ્થિત GQG પાર્ટનર્સએ બાબા રામદેવનીની પતંજલિ ફૂડ્સમાં પણ રૂ.2400 કરોડનું રોકાણ કર્યું છે. આમ બાબા રામદેવની કંપની પતંજલિ ફૂડ્સને એક બહુ મોટા વિદેશી રોકાણકાર મળી ગયા છે. પતંજલિ ફૂડ્સે તાજેતરમાં ઓફર ફોર સેલ (OFS) લાવી હતી. જેમાં GQG પાર્ટનર્સે 5.96 ટકા હિસ્સો ખરીદ્યો હતો. પતંજલિના કુલ મળીને 2.15 કરોડ શેર ખરીદવામાં આવ્યા છે જેની કિંમત લગભગ 2400 કરોડ થાય છે. આ ઓએફએસમાં શેરની ફ્લોર પ્રાઈસ 1000 રૂપિયા રાખવામાં આવી હતી, પરંતુ નોન-રિટેલ ઈન્વેસ્ટરોને 1103 રૂપિયાના ભાવે શેર એલોટ કરાયા હતા.

ભારતની તપાસ એજન્સી ડિરેક્ટોરેટ ઓફ એન્ફોર્સમેન્ટ (ED)એ બુધવારે જેટ એરવેઝના ભૂતપૂર્વ પ્રમોટર નરેશ ગોયલ અને તેમના સહયોગીઓ સામે મની લોન્ડરિંગ કેસમાં દરોડા પાડ્યા હતા, ED દિલ્હી અને મુંબઈ સહિત અનેક શહેરોને આવરી લઇને આ કાર્યવાહી કરી હતી. અગાઉ સેન્ટ્રલ બ્યુરો ઑફ ઇન્વેસ્ટિગેશન (CBI)એ શુક્રવારે ₹538 કરોડના કથિત બેંક છેતરપિંડીમાં જેટ એરવેઝના ચેરમેન, તેમની પત્ની અને અન્યો વિરુદ્ધ FIR નોંધી હતી. જેટ એરવેઝ (ઈન્ડિયા) લિમિટેડ, નરેશ ગોયલ, તેમની પત્ની અનીતા નરેશ ગોયલ, ગૌરાંગ આનંદ શેટ્ટી અને અજાણ્યા સરકારી અધિકારીઓ અને ખાનગી વ્યક્તિઓને FIRમાં આરોપી તરીકે નામ આપવામાં આવ્યા છે.

કંગનાએ રણબીર-આલિયાનાં લગ્નને નકલી કહીને વિવાદ છેડ્યો

બોલીવૂડમાં છેલ્લા કેટલાક સમયથી જુદા જુદા વિવાદો ઊભા કરવામાં યુવા અભિનેત્રી કંગના રણોતનું નામ મોખરે છે. સોશિયલ મીડિયા દ્વારા તે દિગ્ગજ ફિલ્મકારોની ટીકા કરવાનું છોડતી નથી. હવે તેણે એક દંપત્તી અંગે નવી વાત કહીને ફરીથી વિવાદ છેડ્યો છે. જોકે, તેણે તેમનું નામ નથી આપ્યું પણ આ દંપત્તીનાં વિદેશ પ્રવાસની વાત કરી છે. કંગનાએ જણાવ્યું કે, “આ ટ્રિપમાં પત્ની અને પુત્રી નહોતાં ગયા.” ઉલ્લેખનીય છે કે તાજેતરમાં રણબીર કપૂર માતા નીતુનાં જન્મ દિવસે લંડનમાં હતો, જ્યારે આલિયા ભટ્ટ અને દીકરી રાહા ભારતમાં જ હતા. કંગનાએ ઇન્સ્ટાગ્રામ સ્ટોરીમાં લાંબી પોસ્ટમાં લખ્યું છે, “એક નકલી પતિ-પત્ની અલગ અલગ ફ્લોર પર રહે છે. કપલ હોવાનો દેખાડો કરે છે.

સલમાન ખાનને ‘બિગ બોસ’ માટે વિશેષ લગાવ

સલમાન ખાન કહે છે કે, ‘બિગ બોસ ઓટીટી 2’થી તેને ખાસ લગાવ છે. આ શો તે છોડી રહ્યો હોવાની ચર્ચા ચાલી હતી. તે સેટ પર ​એટલે કે સ્ટેજ પર સિગારેટ સાથે જોવા મળ્યો હતો. આ શો બે અઠવાડિયાં લંબાવવામાં આવ્યો હોવાની ચર્ચા છે. જોકે સલમાન એને છોડી રહ્યો હોવાનું કહેવામાં આવી રહ્યું હતું. આ વિશે પૂછતાં સલમાન ખાને કહ્યું કે ‘મારા માટે ​‘બિગ બોસ’ એક ઇમોશન છે. હું હંમેશાં કહું છું કે હું અટેચમેન્ટથી દૂર રહું છું, પરંતુ ‘બિગ બોસ’ અલગ છે. મેં એને ઘણાં વર્ષોથી હોસ્ટ કર્યો છે અને મને એવું લાગે છે કે એ મારી લાઇફનું જ એક એક્સટેન્શન છે.’

અજય દેવગણે મુંબઇમાં રૂ.45 કરોડની બે ઓફિસો ખરીદી

અજય દેવગણ બોલિવૂડના સૌથી લોકપ્રિય કલાકારોની યાદીમાં સામેલ છે. કહેવાય છે કે, તેણે મુંબઇમાં પ્રોપર્ટીમાં મોટું રોકાણ કર્યું છે. સૂત્રોના જણાવ્યા મુજબ, અજયે મુંબઈના અંધેરી વેસ્ટ વિસ્તારમાં ઓફિસ સ્પેસમાં આ રોકાણ કર્યું છે. સત્તાવાર જગ્યા કુલ 13 હજાર 293 ચોરસ ફૂટ વિસ્તારમાં ફેલાયેલી છે. પ્રથમ એકમ 8 હજાર 405 ચોરસમાં બનેલો વિસ્તાર છે. આ યુનિટ સિગ્નેચર બિલ્ડીંગ, ઓશિવારાના 16મા માળે આવેલું છે. યુનિટની કિંમત રૂ. 30.35 કરોડ હોવાનું કહેવાય છે અને અજયે તેના માટે રૂ. 1.82 કરોડની સ્ટેમ્પ ડ્યુટી પર પણ ભરી લીધી છે.

ડિજિટલ પ્લેટફોર્મ પર જેનેલિયાનું પદાર્પણ

બોલીવૂડ અને સાઉથ ઇન્ડિયન ફિલ્મોની જાણીતી અભિનેત્રી જેનેલિયા ડિસોઝા દેશમુખનું ડિજિટલ પદાર્પણ થઇ રહ્યું છે. જેનેલિયાની આ પ્રથમ ઓટીટી ફિલ્મ ‘ટ્રાયલ પીરિયડ’ છે. જેનેલિયાએ તેમાં બંગાળી માતાનો રોલ કર્યો છે, જે એકલા હાથે સંતાનને ઉછેરે છે. દીકરાની દરેક ઈચ્છા પૂરી કરવા માટે ઝઝૂમતી એકલ માતાની અનોખી કહાની આ ફિલ્મમાં જોવા મળશે. આ ભૂમિકા અંગે જેનેલિયાએ જણાવ્યું હતું કે , અગાઉ ક્યારેય બંગાળી મહિલાનો રોલ કર્યો નથી. તેથી આ પ્રકારનું કેરેક્ટર મારા માટે નવું શીખવાની તક સમાન છે.