ઇન્સ્ટીટ્યૂશનલ ઇન્વેસ્ટર એડવાઇઝરી સર્વિસિસે શેરધારકોને રિલાયન્સ ઇન્ડસ્ટ્રીઝ લિમિટેડના બોર્ડમાં અનંત અંબાણીની નિમણૂકની વિરુદ્ધમાં મત આપવાની ભલામણ કરી હતી. જોકે, એડવાઇઝરી કંપનીએ એક નોંધમાં ઈશા અંબાણી અને આકાશ અંબાણીને મત આપવાની ભલામણ કરી હતી. મુકેશ અંબાણીની માલિકીના રિલાયન્સના શેરધારકો ત્રણેય ભાઈ-બહેનોની નોન એક્ઝિક્યુટિવ, બિન-સ્વતંત્ર ડાયરેક્ટર તરીકે નિમણૂક પર મતદાન કરવા માટે તૈયાર છે. શેરહોલ્ડરના વોટિંગના પરિણામ 30 ઑક્ટોબરે જાહેર કરવામાં આવશે.

બિલિયોનેર અનિલ અગ્રવાલે ગુરુવારે જણાવ્યું હતું કે વેદાંત લિમિટેડમાંથી વિભાજિત કરવામાં આવેલી છ કંપનીઓ આખરે તેમની યુકે સ્થિત પેરેન્ટ વેદાંત રિસોર્સિસ કરતાં મોટી બનશે. અહીં ઉલ્લેખનીય છે કે અનિલ અગ્રવાલે નવા રોકાણકારોને આકર્ષવા અને દેવાના બોજને હળવો કરવા માટે ભારત ખાતેની વેદાંતનું છ કંપનીઓમાં વિભાજન કરવાની જાહેરાત કરી છે. 69 વર્ષના અગ્રવાલે એક (અગાઉ ટ્વિટર) જણાવ્યું હતું કે “વેદાંતના નિર્માણની મારી સફરમાં, મને સૌથી અદભૂત શેરહોલ્ડર્સ મળવાનો આશીર્વાદ મળ્યો છે.

ભારે વિરોધને પગલે ભારત સરકારે લેપટોપની આયાત પર નિયંત્રણો મૂકવાના તેના નિર્ણયને પાછો ખેંચી લીધો છે. ભારતના વેપાર સચિવ સુનીલ બર્થવાલે શુક્રવારે આ ફેરફારની જાહેરાત કરી હતી. વેપાર સચિવે દાવો કર્યો હતો કે સરકાર લેપટોપના આયાતકારો પર નજર રાખવા માંગે છે. સરકારે ઓગસ્ટ-2023માં ભારતે લેપટોપની આયાત પર પ્રતિબંધ લાદવાની જાહેરાત કરી હતી. સરકારના આ નિર્ણયની ભારે ટીકા થઈ હતી.

અબજોપતિ ઉદ્યોગપતિ મુકેશ અંબાણીએ ગુરુવારે ઉત્તરાખંડના બદ્રીનાથ ધામમાં પૂજા કરી હતી. રિલાયન્સ ઈન્ડસ્ટ્રીઝના ચેરમેન તેમના સૌથી નાના પુત્ર અનંતની મંગેતર રાધિકા મર્ચન્ટ સાથે બદ્રીનાથ ધામ પહોંચ્યાં હતા. શ્રી બદરીનાથ કેદારનાથ મંદિર સમિતિ (BKTC) ના વાઇસ પ્રેસિડેન્ટ કિશોર પવારે બિઝનેસ ટાયકૂનનું સ્વાગત કર્યું હતું. આ મુલાકાત દરમિયાન અંબાણીએ શ્રી બદ્રીનાથ-કેદારનાથ મંદિર સમિતિ. રૂ. 5 કરોડનું દાન આપ્યું હતું. અંબાણીની બદ્રીનાથની આ પહેલી યાત્રા નથી – ગયા વર્ષે તેમણે પવિત્ર યાત્રાધામની મુલાકાત પણ લીધી હતી, જ્યારે તેમણે બદરી-કેદાર મંદિર સમિતિ (BKTC)ને રૂ. 5 કરોડનું દાન આપ્યું હતું.

બોલીવૂડમાં પણ નવરાત્રિનાં નવરંગનું આકર્ષણ

ફિલ્મો તરફ દર્શકોને આકર્ષવા માટે નિર્માતા-દિગ્દર્શકો તેમાં અવનવા પ્રયોગો કરતા રહે છે. ખાસ તો દર્શકોને ધ્યાનમાં રાખીને તહેવાર સંબંધિત ગીત-સંગીતનો તેમાં ઉપયોગ કરે છે. ઘણા લાંબા સમયથી બોલીવૂડની ફિલ્મો નવરાત્રિનું પણ આકર્ષણ જોવા મળ્યું છે. સમયની સાથે ફિલ્મોમાં પણ નવરાત્રિનું સ્વરૂપ બદલાયું છે. અત્યારની ફિલ્મોમાં નવરાત્રિનું આધુનિક સ્વરૂપ જોવા મળી રહ્યું છે. અહીં આવી જ કેટલીક ફિલ્મો અને તેના ગીતો વિશે જણાવવામાં આવ્યું છે જેમાં નવરાત્રિના રૂપરંગને આવરી લેવામાં આવ્યા હોય. સત્યપ્રેમ કી કથા (2023) આ ફિલ્મમાં કાર્તિક આર્યન અને કિયારા અડવાણીએ ‘સુન સજની…’ ગીત પર ગરબામાં જમાવટ દેખાડી છે. આ વર્ષની નવરાત્રિના ગીતોમાં તે સૌથી મોખરે છે. મજાની વાત તો એ છે કે ચાહકોએ આ ગીતને લોકપ્રિય ગુજરાતી ગરબો ‘મારી મહિસાગરને આરે…’ ટ્રેક સાથે સરખાવ્યું છે.

અક્ષયકુમારે કેનેડાની નાગરિકતા કેમ છોડી દીધી?

અક્ષયકુમારે 1990 પછી કેનેડાની નાગરિકતા મેળવી હતી. પછી તેણે તે નાગરિકતા છોડી દીધી હતી અને તાજેતરમાં તે ભારતનો નાગરિક બની ગયો હતો. જોકે, કેનેડાની નાગરિકતાને કારણે સોશિયલ મીડિયા પર તેની ટીકા થઇ હતી. થોડા દિવસ અગાઉ એક ઈન્ટરવ્યુ દરમિયાન અક્ષયકુમારે કેનેડાની નાગરિકતાના મુદ્દે સ્પષ્ટતા કરી હતી. અક્ષયકુમારે કહ્યું કે, ફિલ્મો નહોતી ચાલતી એટલે હું કેનેડિયન બન્યો, ત્યાં ધંધો હતો. દેશમાં ઘણા લોકો આવું કરે છે. હું કાર્ગોનો ધંધો કરતો હતો. પછી છેલ્લી બે-ત્રણ ફિલ્મો ચાલી અને ત્યાં સુધીમાં પાસપોર્ટ આવી ગયો હતો. હવે હું પાછો આવી ગયો છું અને ફિલ્મો રિલીઝ થઇ અને તે સફળ થઇ રહી હતી પછી મારા મગજમાંથી પાસપોર્ટનો મુદ્દો નીકળી ગયો હતો.

ક્રિતીને કેવો જોઇએ છે મનનો માણિગર?

બોલીવૂડની યુવા અભિનેત્રી ક્રિતી સેનને તેના સંબંધો અંગે સ્પષ્ટતા કરી છે. તેણે જણાવ્યું છે કે, તે હજુ પણ એકલી જ છે. એટલે તે કોઇની સાથે ડેટ કરી રહી નથી. તે છેલ્લે ‘આદિપુરુષ’ ફિલ્મમાં જોવા મળી હતી. આ ઉપરાંત તે કરીના કપૂર ખાન સાથે ‘ધ ક્રૂ’માં, શાહિદ કપૂર સાથે એક ફિલ્મમાં અને ટાઇગર શ્રોફ સાથે ‘ગનપત’માં જોવા મળશે. પ્રભાસ સાથે તેના રીલેશનની ચર્ચા હતી. હવે તેણે અફવાઓને ફગાવતા જણાવ્યું હતું કે, ‘હું સૌને સ્પષ્ટતા કરવા ઇચ્છું છું કે હું એકલી જ છું. હું તમને સહુને કહું કે, મારે કેવો પાર્ટનર જોઈએ છે. મને લાગે છે કે હું રોમેન્ટિક છું. હું પણ પ્રેમમાં પડવા ઇચ્છું છું.

12 મહિના સુધી બિઝી છે અજય દેવગણ

અજય દેવગણ આવનારા 12 મહિના સુધી ખૂબ જ બિઝી છે. આ સમયગાળા દરમિયાન અજયની સાત ફિલ્મો રિલીઝ થવાની છે. અજયે નીરજ પાંડે સાથેની ફિલ્મ ઔરો મેં કહાં દમ થા, માધવન-જ્યોતિકા સાથેની થ્રિલરનું શૂટિંગ પૂર્ણ કરી લીધું છે. ભત્રીજા અમાન દેવગણ સાથેની ફિલ્મ પણ બની રહી છે. રોહિત શેટ્ટી સાથેની સિંઘમ અગેઈનનું શૂટિંગ ચાલી રહ્યું છે. ત્યારપછી આગામી વર્ષે રેઈડ 2, દે દે પ્યાર દે 2 અને ગોલમાલ 5 શરૂ થવાની છે. આમ, આવનારા 12 મહિનામાં અજયની સાત ફિલ્મો નક્કી થયેલી છે. તાજેતરમાં આ યાદીમાં સન ઓફ સરદારની સીક્વલ ફિલ્મનો પણ સમાવેશ થયો છે.