ભારતમાં બેન્ક એકાઉન્ટ ધરાવતા અને વિદેશમાં રહેતા બિન-નિવાસી ભારતીયો (એનઆરઆઈ) ટૂંક સમયમાં તેમના આંતરરાષ્ટ્રીય મોબાઈલ નંબર સાથે યુનિફાઈડ પેમેન્ટ્સ ઈન્ટરફેસ (યુપીઆઈ) પ્લેટફોર્મનો ઉપયોગ કરી શકશે. નેશનલ પેમેન્ટ્સ કોર્પોરેશન ઓફ ઈન્ડિયા (NPCI) એ UPI પ્લેટફોર્મને અમુક શરતો સાથે આંતરરાષ્ટ્રીય મોબાઈલ નંબર ધરાવતા દસ દેશોના બિન-નિવાસી ખાતાધારકો (NRE/NRO એકાઉન્ટ્સ)ને ઓનબોર્ડ કરવાની મંજૂરી આપી છે. આ 10 દેશોના NRE અથવા NRO એકાઉન્ટ ધરાવતા NRI ને UPI પ્લેટફોર્મ દ્વારા ટ્રાન્ઝેક્શન કરવા માટે ભારતીય મોબાઈલ નંબરની જરૂર નથી. 10 જાન્યુઆરી, 2023ના NPCI પરિપત્ર મુજબ શરૂઆતમાં NPCI દેશના કોડ સાથે સિંગાપોર, ઓસ્ટ્રેલિયા, કેનેડા, હોંગકોંગ, ઓમાન, કતાર, યુએસએ, સાઉદી અરેબિયા, સંયુક્ત આરબ અમીરાત અને યુનાઇટેડ કિંગડમના દેશના કોડ ધરાવતા મોબાઇલ નંબરોથી ટ્રાન્ઝેક્શન ચાલુ કરશે.

જી-20 નેતાઓએ ભારતની બહારના કામદારો માટેના ઊંચા રેમિટન્સ ખર્ચના મુદ્દા પર વધુ ભાર મૂક્યો છે અને 2027 સુધીમાં રેમિટન્સના ખર્ચના દરને સરેરાશ 3 ટકા સુધી લાવવાના પ્રયાસો ચાલી રહ્યા છે, એમ નાણા મંત્રાલયના એક ટોચના અધિકારીએ રવિવારે જણાવ્યું હતું. હાલમાં, રેમિટન્સ ખર્ચ સરેરાશ ધોરણે દરેક ટ્રાન્ઝેક્શનના 6 ટકા જેટલો છે, એમ તેમણે જણાવ્યું હતું. નાણા મંત્રાલયના આર્થિક બાબતોના વિભાગના આર્થિક સલાહકાર ચંચલ સરકારે જણાવ્યું હતું કે “ભારતની બહાર નોકરી કરતા કામદારો અને મજૂરોએ ઊંચો રેમિટન્સ ખર્ચ સહન કરવો પડે છે, અને G20 નેતાઓએ આ દરમાં ઘટાડો કરવા માટે ઘણું મહત્વ આપ્યું છે. 2027 સુધીમાં તેને સરેરાશ 3 ટકા સુધી લાવવાનું લક્ષ્ય છે.”

ટાટા ગ્રુપ ટૂંકસમયમાં આઈફોનનું ઉત્પાદન કરનારું પ્રથમ ભારતીય ગ્રુપ બની જશે. ટાટા હવે તાઈવાની કોન્ટ્રાક્ટ ઉત્પાદક કંપની વિસ્ટ્રોનનો બેગ્લોર ખાતેનો પ્લાન્ટ ખરીદવાની મંત્રણા કરી રહ્યું છે. વિસ્ટ્રોન સાથે આગામી 31 માર્ચ સુધીમા આ સોદો પાર પડી જવાની શક્યતા છે. તેનાથી પહેલી એપ્રિલથી શરુ થતા નવા નાણાકીય વર્ષથી ટાટા ગ્રુપના નેતૃત્વમાં આઈફોનનું ઉત્પાદન શરૂ થાય. સુત્રો દ્વારા મળતી માહિતી મુજબ બન્ને પક્ષોએ ભાગીદારી બાબતે ચર્ચાઓ થઈ હતી. પરંતુ હવે એ નક્કી થઈ ગયુ છે કે ટાટા ગ્રુપ એક સંયુક્ત સાહસમાં બહુમતી હિસ્સો લેશે. ટાટા ગ્રુપ વિસ્ટ્રોનની મદદથી પ્લાન્ટની મુખ્ય ઉત્પાદનની કામગીરીની દેખરેખ રાખવા તૈયાર છે.

ગિનિસ વર્લ્ડ રેકોર્ડ (GWR) એ જણાવ્યું હતું કે ઈલોન મસ્કે ઇતિહાસમાં વ્યક્તિગત સંપત્તિના સૌથી મોટા નુકસાનનો વિશ્વ રેકોર્ડ મેળવ્યો છે. એક બ્લોગ પોસ્ટમાં આ સંસ્થાએ ફોર્બ્સના અંદાજને ટાંક્યો કે મસ્કને નવેમ્બર 2021 થી લગભગ $182 બિલિયનનું નુકસાન થયું છે, પરંતુ નોંધ્યું છે કે અન્ય સ્ત્રોતો સૂચવે છે કે આ આંકડો $200 બિલિયનની નજીક છે. ટ્વીટર સંબંધિત વિવાદોને કારણે ચમકેલા મસ્ક માટે આ મુંઝવણભરી સ્થિતિ છે. ગિનિસ વર્લ્ડ રેકોર્ડ્સ અનુસાર, આ અંદાજિત આંકડો છે. મસ્ક પહેલા આ રેકોર્ડ જાપાની ટેક ઈન્વેસ્ટર માસાયોશી સોનના નામે હતો. તેમણે વર્ષ 2000માં $58.6 બિલિયન ગુમાવીને આ રેકોર્ડ બનાવ્યો હતો. મસ્કનો આંકડો આના કરતા ઘણો વધારે છે.

ઓસ્કાર એવોર્ડ 2023: પાંચ ભારતીય ફિલ્મો શોર્ટલિસ્ટ થઈ

એકેડમી ઓફ મોશન પિક્ચર આર્ટસ એન્ડ સાયન્સે ઓસ્કાર એવોર્ડ માટે પાત્રતા ધરાવતી 301 ફીચર ફિલ્મોની યાદી જાહેર કરી છે. આ યાદીમાં પાંચ ભારતીય ફિલ્મોનો સમાવેશ કરવામાં આવ્યો છે, જેમાં એસએસ રાજામૌલીની RRR, સંજય લીલા ભણસાલીની ગંગુબાઈ કાઠિયાવાડી, વિવેક અગ્નિહોત્રીની ધ કાશ્મીર ફાઇલ્સ અને ઋષભ શેટ્ટીની કંતારાનો સમાવેશ થાય છે. આ ઉપરાંત યાદીમાં પાન નલિનની ફિલ્મ ધ લાસ્ટ શો (છેલ્લો ફિલ્મ શો)નો પણ સમાવેશ કરાયો છે, જેને ભારત તરફથી સત્તાવાર રીતે ઓસ્કાર માટે નોમિનેટ કરવામાં આવી હતી. આ ઉપરાંત તેમાં મરાઠી ફિલ્મો મી વસંતરાવ, તુજ્યા સાથી કહી હી, આર માધવનની રોકેટ્રીઃ ધ નામ્બી ઈફેક્ટ, કન્નડ ફિલ્મ વિક્રાંત રોનાનો પણ સમાવેશ થાય છે.

ક્રિટિક્સ ચોઈસ એવોર્ડ્સઃ RRRને શ્રેષ્ઠ વિદેશી ભાષાની ફિલ્મ અને શ્રેષ્ઠ ગીતનો એવોર્ડ

એસએસ રાજામૌલીની ફિલ્મ RRRએ 28મા ક્રિટિક્સ ચોઈસ એવોર્ડ્સમાં એક નહીં, પરંતુ બે એવોર્ડ જીતીને ફરી ભારતને ગૌરવ અપાવ્યું હતું.15 જાન્યુઆરીએ લોસ એન્જલસમાં આયોજિત એક સમારોહમાં ફિલ્મને તેના વાયરલ સોંગ નાટુ નાટુ માટે શ્રેષ્ઠ ગીતનો તથા શ્રેષ્ઠ વિદેશી ભાષાની ફિલ્મનો એવોર્ડ મળ્યો હતો. અગાઉ ફિલ્મના નાટુ નાટુ ગીતને શ્રેષ્ઠ ગીતનો ગોલ્ડન ગ્લોબ એવોર્ડ પણ મળ્યો હતો. RRRના અધિકૃત ટ્વિટર એકાઉન્ટે આ સમાચાર શેર કર્યા અને એમએમ કીરાવાનીનો એવોર્ડ સ્વીકારતો વિડિયો પણ શેર કર્યો હતો. તેમણે જણાવ્યું હતું કે બેસ્ટ સોંગ માટેનો ક્રિટિક્સચોઇસ એવોર્ડ મળ્યો છે તે જાણકારી આપતા ઘણો જ આનંદ થયો છે.

‘લાસ્ટ ફિલ્મ શો’ના ભાવિન રબારીને IPAનો એવોર્ડ

ઇન્ટરનેશનલ પ્રેસ એકેડમી (આઇપીએ)ના 27માં સેટેલાઇટ એવોર્ડ સમારંભમાં ગુજરાતી ફિલ્મ ‘લાસ્ટ ફિલ્મ શો’ (છેલ્લો શો)ના યુવા અભિનેતા ભાવિન રબારીને બ્રેકથ્રુ પરફોર્મન્સ એવોર્ડ મળ્યો છે, જ્યારે એસએસ રાજામૌલી દ્વારા દિગ્દર્શિત તેલુગુ ફિલ્મ RRR ને ઓનરરી સેટેલાઇટ એવોર્ડ મળ્યો હતો. ઓસ્કાર માટે ભારતની સત્તાવાર એન્ટ્રી બનેલી ડિરેક્ટર પાન નલિનની ફિલ્મ ‘લાસ્ટ ફિલ્મ શો’ (છેલ્લો શો)ને વધુ એક સફળતા મળી હતી. ભાવિન રબારી આ પ્રતિષ્ઠિત એવોર્ડ જીતનારો સૌથી નાની વયનો એક્ટર બની ગયો છે. આ એવોર્ડ જીતવાની સાથે જ ભાવિન રબારી એડવર્ડ નોર્ટન, નિકોલ કિડમેન, ચાર્લિઝ થેરોન, રસેલ ક્રો અને હેલ બેરી જેવા દિગ્ગજ એક્ટર્સ-એક્ટ્રેસની યાદીમાં સામેલ

શિવાજીની ભૂમિકામાં અક્ષય

અક્ષયકુમાર અત્યારે પોતાની મરાઠી ફિલ્મ અંગે ચર્ચામાં છે. તે આ ફિલ્મમાં છત્રપતિ શિવાજી મહારાજની ભૂમિકા ભજવશે, જેનું શૂટિંગ શરૂ થઈ ગયું છે. અક્ષયકુમારની આ પ્રથમ મરાઠી ફિલ્મ છે જેનું નામ ‘વેદત મરાઠે વીર દૌડલે સાત’ છે. તેણે સોશિયલ મીડિયામાં એક ખાસ પોસ્ટ મુકીને ફિલ્મના શૂટિંગની શરૂઆત વિશે માહિતી આપી હતી અને થોડા સમય પછી એક વીડિયો પણ શેર કર્યો જેમાં તે છત્રપતિ શિવાજી મહારાજના લૂકમાં જોવા મળી રહ્યો છે. તેણે છત્રપતિ શિવાજી મહારાજનો એક ફોટો શેર કર્યો છે, જેમાં અક્ષય કુમારની ઝલક સ્પષ્ટ દેખાઈ રહી છે.