એક નવી નિયમનકારી હિલચાલ કરીને સરકાર સંખ્યાબંધ વર્ચ્યુઅલ ડિજિટલ એસેટ (VDA) ટ્રાન્ઝેક્શન મની લોન્ડરિંગ નિવારણ ધારાના દાયરા હેઠળ લાવી છે. આમ મની લોન્ડરિંગ જોગવાઈઓ હવે ભારતના ક્રિપ્ટોકરન્સી સેક્ટર પર લાગુ થશે. ક્રિપ્ટો ડીલરો, એક્સચેન્જો અને ઇન્ટરમેડિયરીઝે હવે બેન્કોની જેમ તેમના ક્લાયન્ટ અને યુઝર્સનું કેવાયસી કરવું પડશે અને રેકોર્ડ રાખવા પડશે. આ ઉપરાંત બેન્કોની જેમ શંકાસ્પદ ટ્રાન્ઝેક્શનની સત્તાવાળાને જાણ કરવી પડશે.

બ્રીડન ગ્રુપે કંપનીના ઓર્ડિનરી શેર લંડન સ્ટોક એક્સ્ચેન્જ (LSE)ના મેઇન માર્કેટના પ્રીમિયમ લિસ્ટિંગ સેગમેન્ટમાં ખસેડવાની યોજનાની જાહેરાત કરી છે. હાલમાં કંપનીનો શેર ઓલ્ટરનેટિવ ઇન્વેસ્ટમેન્ટ માર્કેટ (AIM)માં ટ્રેડ થાય છે. ઊંચી વૃદ્ધિ અને કેશ જનરેશન, મજબૂત કોર્પોરેટ ગવર્નન્સના ટ્રેક રેકોર્ડ અને વધુ વિસ્તરણ માટેની મહત્વાકાંક્ષી યોજના સાથે ડાયરેક્ટર્સ માને છે કે મેઇન માર્કેટ હવે આટલા મોટા વ્યાપ અને હેરિટેજ સાથેના ગ્રૂપ માટે લિસ્ટિંગની યોગ્ય તક ઓફર છે અને તેથી આગામી મહિનાઓમાં ઓફિશિયલ લિસ્ટના પ્રીમિયમ સેગમેન્ટમાં લિસ્ટિંગની યોજના છે.

બિલિયોનેર મુકેશ અંબાણીના વડપણ હેઠળ રિલાયન્સ ઇન્ડસ્ટ્રીઝની માલિકીની ટેલિકોમ કંપની જિયો પ્લેટફોર્મ તેની 5G અને બ્રોડબેન્ડ સર્વિસને મજબૂત કરવા માટે યુએસ સ્થિત કોમ્યુનિકેશન્સ ઇક્વિપમેન્ટ કંપની મિમોસા નેટવર્ક્સને 60 મિલિયન ડોલરમાં ખરીદશે, એમ રિલાયન્સે ગુરુવારે એક નિવેદનમાં જણાવ્યું હતું. આ ટ્રાન્ઝેક્શન જિયો પ્લેટફોર્મની સંપૂર્ણમાલિકીની પેટાકંપની રેડિસિસ કોર્પોરેશનઅને એરસ્પાન નેટવર્ક્સ હોલ્ડિંગ્સ વચ્ચેના સોદા મારફત થશે. એરસ્પાન નેટવર્કમાં રિલાયન્સ જિયો ઇન્ફોકોમ યુએસએ શેરહોલ્ડર છે.

કેન્દ્રીય ગ્રાહક બાબતો, ખાદ્ય અને જાહેર વિતરણ મંત્રાલયે શુક્રવારે જણાવ્યું હતું કે 1 એપ્રિલથી, હોલમાર્ક યુનિક આઇડેન્ટિફિકેશન (HUID) નંબર વિના સોનાના આભૂષણોના વેચાણની મંજૂરી આપવામાં આવશે નહીં. ગ્રાહક બાબતોના વિભાગના અધિક સચિવ નિધિ ખરેએ જણાવ્યું હતું કે, “ગ્રાહક હિતમાં એવું નક્કી કરવામાં આવ્યું છે કે 31મી માર્ચ, 2023 પછી HUID વિના હોલમાર્ક કરાયેલ સોનાના આભૂષણો અને સોનાની કલાકૃતિઓના વેચાણની પરવાનગી આપવામાં આવશે નહીં. અગાઉ, HUID ચાર અંકોનો હતો. અત્યારે બજારમાં બંને HUID (4- અને 6-અંક)નો ઉપયોગ થાય છે.

ધ એલિફન્ટ વ્હીસ્પરર્સ: દિગ્દર્શકે ઓસ્કાર ‘માતૃભૂમિ ભારત’ને સમર્પિત કર્યો

કાર્તિકી ગોન્સાલ્વિસ દ્વારા દિગ્દર્શિત તમિલ ડોક્યુમેન્ટ્રી ધ એલિફન્ટ વ્હીસ્પરર્સે 95મા એકેડેમી એવોર્ડ્સમાં ડોક્યુમેન્ટરી શોર્ટ સબ્જેક્ટ કેટેગરીમાં એવોર્ડ જીતનારી પ્રથમ ભારતીય ફિલ્મ બનીને ઈતિહાસ રચ્યો હતો. એવોર્ડ સ્વીકારતા ગોન્સાલ્વેસે જણાવ્યું હતું કે, “હું આજે અહીં આપણા અને આપણા કુદરતી વિશ્વ વચ્ચેના પવિત્ર બંધન, આદિવાસી સમુદાયોના આદર અને અન્ય જીવો પ્રત્યે સહાનુભૂતિ અને સહઅસ્તિત્વની ભાવના અંગે બોલવા માગું છું. દિગ્દર્શકે એકેડેમી, નિર્માતા ગુનીત મોંગા, તેમના પરિવારનો આભાર માન્યો હતો અને એવોર્ડ “માતૃભૂમિ ભારત”ને સમર્પિત કર્યો હતો.

નાટુ નાટુ ગીતનું શૂટિંગ યુક્રેનના મહેલમાં થયું હતું

નાટુ નાટુ આ ગીતનું શૂટિંગ યુક્રેનના પ્રેસિડેન્શિયલ પેલેસના પ્રાંગણમાં થયું છે. યુક્રેનની રાજધાની કીવની નિપ્રો નદીના કાંઠે આવેલા આ આલિશાન પેલેસનું નામ છે ‘મેરિન્સ્કી પેલેસ’ (Mariinskyi Palace). આ પેલેસ અત્યારના યુક્રેનિયન પ્રેસિડન્ટ વોલોદિમિર ઝેલેન્સ્કીનું સત્તાવાર રહેઠાણ છે. જોકે તેઓ આ મહેલમાં સતત રહેવાને બદલે પોતાના નાગરિકોની પડખે અને યુનિફોર્મ પહેરીને રશિયા સામે લડી રહેલા પોતાના સૈનિકોની પડખે વધુ ઊભા રહે છે તે અલગ વાત છે. પરંતુ આ પેલેસ બહારથી અને અંદરથી જેટલો સુંદર છે, તેટલો જ તેનો ઇતિહાસ ભયાવહ છે.

બોલીવૂડના પીઢ ફિલ્મકાર સતીશ કૌશિકનું 66 વર્ષની વયે નિધન

બોલિવૂડના જાણીતા એક્ટર, ડાયરેક્ટર, પ્રોડ્યુસર, કોમેડિયન અને સ્ક્રીન રાઈટર સતીષ કૌશિકનું ગુરુવારે હાર્ટ એટેકથી દિલ્હીમાં અવસાન થયું હતું. તેઓ કારમાં મુસાફરી કરતા હતા ત્યારે હાર્ટ એટેક આવ્યો હતો. તેમની ઉંમર 66 વર્ષ હતી. એક્ટર અનુપમ ખેરે ગુરુવારે વહેલી સવારે ટ્વિટ કરીને આ દુઃખદ માહિતી આપી હતી. સતીષ કૌશિકના નિધનના સમાચારથી મનોરંજન ઈન્ડસ્ટ્રીમાં શોકનું મોજું ફરી વળ્યું હતું. હોળી-ધૂળેટીનું પર્વ મંગળ-બુધવારે ઉજવવામાં આવ્યું હતું.

તારક મહેતા…માં જૂના દયાભાભીની ગેરહાજરીની અસર દેખાઇ

ભારતીય ટેલિવિઝનના સૌથી લોકપ્રિય કોમેડી શો અને અનેક રેકોર્ડ પોતાને નામે કરનાર ‘તારક મહેતા કે ઉલ્ટા ચશ્મા’ના જેઠાલાલ એટલે કે, દિલીપ જોશી દયાભાભીને મિસ કરી રહ્યા છે. છેલ્લા પાંચ વર્ષથી શોથી દૂર દિશા વાકાણી (દયાભાભી) લગ્ન પછી, બે બાળકોને જન્મ આપી ચૂક્યા છે અને ભવિષ્યમાં પણ શો સાથે જોડાશે કે નહીં તે રહસ્ય પણ હજુ અકબંધ છે. આ શોના ચાહકો દિશા વાકાણીના કમબેકની આતુરતાથી રાહ જોઈ રહ્યા છે.