અમેરિકાની બે બેન્કોના પતન પછી પણ અમેરિકાની ફેડરલ રિઝર્વે બુધવાર, 22 માર્ચે વ્યાજદરમાં 0.25 ટકાનો વધારો કર્યો હતો, પરંતુ હવે તે નજીકના ભવિષ્યમાં વ્યાજદરમાં વધારા પર પૂર્ણવિરામ મૂકશે તેવો સંકેત આપ્યો છે. બીજી તરફ બેન્ક ઓફ ઇંગ્લેન્ડ(BoE)ને પણ ગુરુવારે વ્યાજદરમાં 0.25 ટકાનો વધારો કર્યો હતો. દેશની ધીમી આર્થિક વૃદ્ધિ અંગેના ભાવિ અંગે વધુ આશાવાદ વ્યક્ત કરીને સેન્ટ્રલ બેન્કની નવ સભ્યોની સમિતિએ બેન્ક રેટને વધારીને 4.25 ટકા કરવા માટે 7-2ની તરફેણમાં નિર્ણય કર્યો હતો. ડિસેમ્બર 2021માં વ્યાજદરમાં વધારો શરૂ કર્યા પછી આ 11મો વધારો છે.

બેન્ક ઓફ ઇંગ્લેન્ડે વ્યાજદરમાં ડિસેમ્બર 2021થી 11 વખત વધારો કર્યો હોવા છતાં બ્રિટનમાં ફુગાવામાં અણધાર્યો ઉછાળો આવ્યો છે. ફેબ્રુઆરી 2023માં કન્ઝ્યુમર પ્રાઇસ ઇન્ડેક્સ (સીપીઆઇ) વધી 10.4 ટકા થયો હતો. અગાઉના ત્રણ મહિના સુધી મોંઘવારીમાં ઘટાડો થયો હતો. હાલનો ફુગાવો 40 વર્ષના ઊંચા સ્તરની નજીક છે અને બેન્ક ઓફ ઇંગ્લેન્ડના બે ટકાના ટાર્ગેટ કરતાં પાંચ ગણો છે. જાન્યુઆરીમાં ફુગાવો 10.1 ટકા રહ્યો હતો અને તેનાથી બજારમાં એવી ધારણા હતી કે તે ઘટીને 9.9 ટકા થશે.

બિનનિવાસી ભારતીયો (NRI)ના બેન્ક એકાઉન્ટમાં એપ્રિલ 2022થી જાન્યુઆરી 2023 દરમિયાન 5.95 બિલિયન ડોલરનો નાણાપ્રવાહ આવ્યો હતો, જે ગયા વર્ષના સમાન ગાળાની સરખામણીમાં બમણા કરતાં વધુ હતો. ગયા વર્ષના આ ગાળામાં 2.7 બિલિયન ડોલરનો નાણાપ્રવાહ આવ્યો હતો. ભારતીય રિઝર્વ બેન્કના ડેટા મુજબ જાન્યુઆરી 2023ના અંતે NRI ડિપોઝિટ વધી 136.81 બિલિયન ડોલર થઈ હતી, જે ડિસેમ્બર 2022માં 134.48 બિલિયન ડોલર હતી.

વૈશ્વિક આર્થિક સ્થિતિ ખરાબ થઈ હોવાથી આઇટી સર્વિસ પરના ખર્ચમાં કાપ મૂકાઈ રહ્યો હોવાના વધુ સંકેત મળ્યા છે. એક્સેન્ચર ગુરુવાર, 23 માર્ચે તેની વાર્ષિક આવક અને નફાના અંદાજમાં કાપ મૂક્યો હતો અને કર્મચારીમાં આશરે 2.5 ટકાનો કાપ મૂકવાની જાહેરાત કરી હતી. કંપની નોન બિલેબલ કોર્પોરેટ ફંક્શન ડિવિઝનમાં આશરે 19,000 નોકરીમાં કાપ મૂકશે. ઊંચા ફુગાવા અને વ્યાજદરમાં વધારા વચ્ચે ગયા વર્ષના અંતિમ ભાગથી વિશ્વની દિગ્ગજ ટેકનોલોજી કંપનીઓ મોટાપાયે કર્મચારીઓની છટણી કરી રહી છે.

વિદ્યુત જામવાલ-નંદિતાનું બ્રેકઅપ થયું

બોલિવુડ એકશન સ્ટાર અને ફિટનેસ આઇકોન વિદ્યુત જામવાલ અને ફેશન ડિઝાઇનર નંદિતા મહતાની છેલ્લા ઘણા સમયથી ડેટ કરી રહ્યા હતા. પ્રેમના પ્રતીક એવા તાજમહેલની સામે વર્ષ 2021માં બંનેએ સગાઇ કરી હતી. પરંતુ હવે આ કપલે અલગ થવાનો નિર્ણય લીધો છે. સગાઇના બે વર્ષ બાદ બંનેનું બ્રેકઅપ થઇ ગયું છે. તાજેતરમાં વિદ્યુત અને નંદિતા ડિયાન પાંડેયની પુત્રી અલાનાના લગ્નમાં સાથે જોવા મળ્યા હતા. જોકે, આ દરમિયાન બંનેએ એકબીજાથી અંતર જાળવી રાખ્યું હતું.

હવે જમાનો પર્ફોર્મન્સનો છેઃ આયેશા ઝુલ્કા

વીતેલા જમાનાની અભિનેત્રી આયેશા ઝુલ્કા ઘણા સમયથી ગ્લેમર જગતથી દૂર હતી. પણ વર્ષો પછી તેણે સ્ક્રીન પર પુનરાગમન કર્યું છે. 2022માં આવેલી વેબ સીરિઝ ‘હુશ હાથ’થી તેણે ઓટીટી પર પદાર્પણ કર્યું છે. આગળ પણ તે બીજા ઘણા પ્રોજેક્ટ કરવાની ઇચ્છા ધરાવે છે. આયેશા ઝુલ્કાએ સલમાન ખાન, આમિર ખાન, અક્ષયકુમાર જેવા કલાકારો સાથે અભિનય કર્યો છે. આયેશાનું કહેવું છે કે, મને હંમેશાં એવું લાગતું રહ્યું છે કે, એક કલાકાર તરીકે મારી પ્રતિભાઓ દર્શાવવાની તક મળી નથી.

મિસીસ ચેટરજી વર્સીસ નોર્વે ફિલ્મથી નોર્વેના એમ્બેસેડર નારાજ

લાંબા બ્રેક પછી રાની મુખરજીની ફિલ્મ રિલીઝ થઈ છે. મિસીસ ચેટરજી વર્સીસ નોર્વેને ઈમોશનલ ડ્રામા જોનરની ફિલ્મ ગણવામાં આવે છે. રાની મુખરજીની એક્ટિંગ માટે વખણાયેલી આ ફિલ્મથી ભારત ખાતેના નોર્વેના એમ્બેસેડર હેન્સ જેકબ ફ્રીડેન્લુન્ડ નારાજ છે. તેઓ કહે છે કે, પોતાના દેશ અંગે ફિલ્મમાં અસત્ય અને ગેરમાર્ગે દોરનારું નિરુપણ થયું છે. તેમણે નિર્માતા સામે નારાજગી વ્યક્ત કરી છે. એક આર્ટિકલમાં તેમણે લખ્યું હતું કે, નોર્વેનો સત્તાવાર અભિગમ રજૂ કરવો અને તથ્યદોષ દૂર કરવા મારા માટે મહત્ત્વનું છે. ફિલ્મમાં સાંસ્કૃતિક ભિન્નતાને જ એક માત્ર કારણ ગણાવાઈ છે, જે ખોટું છે.

તાપસીનો ડાયેટિશિયન માટે અધધધ..ખર્ચ

યુવા અભિનેત્રી તાપસી પન્નુ ધીરે ધીરે પણ મક્કમતાથી બોલીવૂડમાં પોતાનું સ્થાન જમાવી રહી છે. તે હવે શાહરુખ ખાનની સાથે ડંકી ફિલ્મમાં જોવા મળશે. તાજેતરમાં જ તાપસીએ એક ઇન્ટરવ્યૂ આપ્યો છે. જેમાં અનેક સ્પષ્ટતા કરી હતા. તાપસી પન્નુએ 1984માં સિખ રમખાણો દરમિયાન પરિવાર સાથે થયેલા ખરાબ અનુભવ વિશે વાત કરી હતી. આ સાથે જ કહ્યું હતું કે, જ્યારે આ રમખાણો થયા ત્યારે તેનો જન્મ થયો ન હતો. તેણે ખાસ વાત તો એ જણાવી હતી કે, તે દર મહિને ડાયેટિશિયન પાછળ એક લાખ રૂપિયાનો ખર્ચ કરે છે ત્યારે માતા-પિતા સાથે ઝઘડો થાય છે તે અંગે પણ વાત કરી હતી.