ઈઝરાયેલ – હમાસ વચ્ચેનો જંગ હવે મંગળવારે (17 ઓક્ટોબર) અગિયારમાં દિવસમાં પ્રવેશસે, ત્યારે ઈઝરાયેલના સંરક્ષણ પ્રધાને કહ્યું હતું કે, કિંમત કદાચ મોટી હશે, પણ હમાસ સામેના જંગમાં અમારો વિજય નિશ્ચિત છે. બીજી તરફ વિશ્વના અનેક દેશોની જેમ ભારતે પણ ઈઝરાયેલમાંથી પોતાના નાગરિકોને સ્વદેશ પાછા લાવવા શરૂ કરેલા ઓપરેશન અજેય હેઠળ સોમવારે પાંચમી સ્પેશિયલ ફલાઈટ તેલ અવિવથી રવાના થઈ હતી. આ જંગમાં સત્તાવાર માહિતી મુજબ સોમવાર સુધીમાં 4,000થી વધુ લોકોનો મોત નિપજ્યા હતા, તો ઘવાયેલાઓની સંખ્યાનો અંદાજ પણ પ્રાપ્ત કરવો મુશ્કેલ છે. તો બીજી તરફ ઈઝરાયેલના વડાપ્રધાનના કાર્યાલયે એક સંદેશમાં જણાવ્યું હતું કે, ઈઝરાયેલનો જંગ હમાસ સામે છે, પેલેસ્ટાઈનની સામાન્ય જનતા સામે નથી.

અમેરિકામાં દર 10માંથી એક એશિયન અમેરિકન (11 ટકા) હવે હિન્દુ ધર્મને તેમનો ધર્મ માને છે. તાજેતરના પ્યુ રીસર્ચ સેન્ટરના એક સર્વેના તારણમાં જણાયું હતું કે, બે તૃતિયાંશ ઇન્ડિયન અમેરિકનો પોતે હિન્દુ છે અથવા તો પોતાને હિન્દુત્વની નજીક માનતા હોવાનું જણાવે છે.

અમેરિકાની રાજધાની વોશિંગ્ટનના મેરીલેન્ડ સબર્બમાં ભારતના બંધારણના ઘડવૈયા ડૉ બી આર આંબેડકરની 19 ફૂટ ઊંચી પ્રતિમાનું ઔપચારિક અનાવરણ કરાયું હતું. ભારત બહારની તે ડો. બાબસાહેબની સૌથી મોટી પ્રતિમા છે.

પાકિસ્તાનના ભૂતપૂર્વ વડા પ્રધાન નવાઝ શરીફ આગામી 21 ઓક્ટોબરે પાકિસ્તાન પરત ફરી રહ્યા છે. હાલ તેઓ વિદેશમાં દેશવટો ભોગવી રહ્યા છે. નવાઝ શરીફના પક્ષના હોદ્દેદારોએ તેમના પાકિસ્તાન પરત ફરવાની તમામ વ્યવસ્થા કરી લીધી છે.

અમેરિકામાં 2024ની પ્રેસિડન્ટની ચૂંટણી હાલમાં યોજાય તો યુએસ પ્રમુખ જો બાઇડન રિપબ્લિકન પ્રમુખપદના ઉમેદવારો નિક્કી હેલી અને રોન ડીસેન્ટિસ સામે હારી જશે, પરંતુ તેમના પુરોગામ ડોનાલ્ડ ટ્રમ્પને સાંકડી સરસાઈથી હરાવી દેશે, એમ એક નવા પોલમાં 13 ઓક્ટોબરે જણાવાયું હતું.

અમેરિકામાં કમ્યુનિટીમાં પરિવર્તન લાવવા અને ઉજ્જવળ ભવિષ્યને આકાર આપવા બદલ કિશોરવયની ઇન્ડિયન અમેરિકન ઈન્વેન્ટર ગીતાંજલિ રાવનું અમેરિકાની ફર્સ્ટ લેડી જીલ બાઇડન દ્વારા બહુમાન કરવામાં આવ્યું છે. ગીતાંજલી રાવની સાથે અન્ય 14 યુવા મહિલાઓનું પણ સન્માન કરાયું હતું.

શ્રી રામ જન્મભૂમિ તીર્થ ક્ષેત્ર ટ્રસ્ટ બિન-નિવાસી ભારતીયો (એનઆરઆઈ)ને 26 જાન્યુઆરી, 2024 પછી અયોધ્યામાં નવનિર્મિત રામ મંદિરમાં રામ લલ્લાના દર્શન માટે આમંત્રણ આપશે. રામ મંદિરનું ભવ્ય ઉદઘાટન 21 થી 24 જાન્યુઆરી થશે.

​​ગુજરાતના લોકપ્રિય ગરબાને આ વર્ષે યુનેસ્કો દ્વારા ગરબાને પ્રતિષ્ઠાવંત ઇન્ટેન્જિબલ કલ્ચરલ હેરિટેજ ઓફ હ્યુમનટી(આઈસીએચ) માં ગરબાનો સમાવેશ કરવામાં આવે તેવી શક્યતા છે.

ગુજરાતમાં રવિવાર, 15 ઓક્ટોબરનો મા જગદંબાની ઉપાસનાના મહાપર્વ નવરાત્રિનો મંગલમય પ્રારંભ થયો છે. નવદુર્ગાના નવ સ્વરૂપોની આરાધનાના આ મહાપર્વના પ્રથમ દિવસે લાખોની સંખ્યામાં ભક્તો શક્તિપીઠ પાવગઢ પહોંચ્યાં હતાં.

સુપ્રીમ કોર્ટે બિલ્કીસ બાનો ગેંગરેપ કેસના 11 દોષિતોની સજામાફી સંબંધિત ઓરિજિનલ રેકોર્ડ 16 ઓક્ટોબર સુધી સુપરત કરવા કેન્દ્ર અને ગુજરાત સરકારને ગુરુવારે આદેશ આપ્યો હતો.

ભારતમાં રમાઈ રહેલા વન-ડે વર્લ્ડ કપ ક્રિકેટની સૌથી ઉત્તેજનાપૂર્ણ બની રહેલી શનિવાર (14 ઓક્ટોબર) ની મેચમાં ભારતે પાકિસ્તાનને સાત વિકેટે પ્રભાવશાળી રીતે હરાવી પડોશી ક્રિકેટના કટ્ટર હરીફ સામેનો પોતાનો વર્લ્ડ કપનો અજેય રેકોર્ડ યથાવત જાળવી રાખ્યો હતો.

અફઘાનિસ્તાને વન-ડે વર્લ્ડ કપ ક્રિકેટમાં રવિવારે નવી દિલ્હીમાં મેજર અપસેટમાં ઈંગ્લેન્ડને 69 રને જંગી શિકસ્ત આપી ક્રિકેટ રસિયાઓને ચોંકાવી દીધા હતા, તો બીજી તરફ આ વર્લ્ડ કપમાં ઓસ્ટ્રેલિયા તેની પહેલી બન્ને મેચમાં પરાજય સાથે તળિયે પહોંચી ગયું હતું.

અમેરિકાના લોસ એન્જેલસમાં 2028માં યોજાનારી ઓલિમ્પિક્સમાં ક્રિકેટના સમાવેશને ઈન્ટરનેશનલ ઓલિમ્પિક્સની કારોબારીની બેઠકમાં સોમવારે બહાલી અપાઈ હતી. મુંબઈમાં યોજાયેલી બેઠકમાં ક્રિકેટ સહિત પાંચ રમતોના સમાવેશને મંજુરીની મહોર લાગી હતી.

ભારતના યુવા, ઉભરતા ઓપનિંગ બેટર શુભમન ગિલની ઈન્ટરનેશનલ ક્રિકેટ કાઉન્સિલે (ICC) સપ્ટેમ્બર મહિનાનો પ્લેયર ઓફ ધ મંથ એવોર્ડ માટે પસંદગી કરાયાની જાહેરાત ગયા સપ્તાહે કરાઈ હતી.