ભારત સરકારે તાજેતરમાં કેરળ હાઈકોર્ટમાં જણાવ્યું હતું કે એરલાઈન્સ તેમની સંચાલકીય સદ્ધરતા મુજબ હવાઈ ભાડાં વસૂલવા માટે સંપૂર્ણ સ્વતંત્ર છે અને સરકાર એરલાઈનના વ્યાપારી પાસાઓમાં દખલ કરતી નથી અથવા તેમનું ભાડું નક્કી કરતી નથી. એક એફિડેવિટમાં સરકારે જણાવ્યું હતું કે એરલાઇન્સની ડાયનેમિક પ્રાઇસિંગ પોલિસી એક વૈશ્વિક પ્રથા છે. ભાડામાં ફેરફાર અલ્ગોરિધમ્સ પર આધારિત છે, જે હરીફ ભાવ, પુરવઠો અને માંગ તથા અન્ય બાહ્ય પરિબળોને ધ્યાનમાં લે છે. ઝૈનુઆબિદ્દીન નામની વ્યક્તિએ તહેવારો દરમિયાન ગલ્ફ સેક્ટરમાં કાર્યરત એરલાઇન્સ દ્વારા ભાડામાં વધારાને કોર્ટમાં પડકાર્યો હતો.

સહારા ગ્રૂપના સ્થાપક અને ચેરમેન સુબ્રત રોયનું બુધવાર, 15 નવેમ્બરે મુંબઈની એક હોસ્પિટલમાં લાંબી બીમારી પછી અવસાન થયું હતું, એમ કંપનીએ એક નિવેદનમાં જણાવ્યું હતું. તેઓ 75 વર્ષના હતાં. સુબ્રત રોયના પરિવારમાં પત્ની સ્વપ્ના રોય અને બે પુત્રો, સુશાંતો રોય અને સીમંતો રોય છે, જેઓ વિદેશમાં રહે છે. 1948માં બિહારના અરરિયામાં જન્મેલા સુબ્રત રોયની સફળતાની કહાની 1978માં સહાર પરિવાર સાથે ચાલુ થઈ હતી અને પછી એક વિશાળ ગ્રૂપનું પતન થયું હતું. માત્ર ₹2,000ની મૂડીથી શરૂ કરીને કંપનીએ ઉદ્યોગસાહસિકતામાં લાંબો રસ્તો પસાર કર્યો છે. તેમનું ગ્રુપ સફળતાના શિખરો સર કરતું હતું અને દેશના 12 લાખ જેટલા લોકોને રોજગારી આપી હતી. તેઓ પોતાને મેનેજિંગ વર્કર તરીકે ઓળખવાનું પસંદ કરતા હતાં.

ભારતીય હોસ્પિટાલિટી જગતના માંધાતા અને ઓબેરોય ગ્રૂપના ચેરમેન એમેરિટસ પૃથ્વી રાજ સિંહ ઓબેરોય ઉર્ફે ‘બીકી’નું મંગળવાર, 14 નવેમ્બરે અવસાન થયું હતું, એમ ઓબેરોય ગ્રૂપના પ્રવક્તાએ જણાવ્યું હતું. તેઓ 94 વર્ષના હતાં. ભારતમાં હોટલ સેક્ટરને નવી દિશા આપવામાં તેમણે મહત્ત્વની ભૂમિકા ભજવી હતી. પૃથ્વી રાજ સિંહનો જન્મ 3 ફેબ્રુઆરી 1929એ દિલ્હીમાં થયો હતો. પૃથ્વી રાજે ભારત, બ્રિટન અને સ્વિટ્ઝર્લેન્ડમાં અભ્યાસ કર્યો હતો. તેમને એક પુત્ર વિક્રમ અને પુત્રી નતાશા છે. પૃથ્વી રાજ સિંહે 2002માં તેમના પિતાના અવસાન બાદ ઓબેરોય ગ્રુપની મુખ્ય કંપની EIHના ચેરમેન તરીકે કાર્યભાર સંભાળ્યો હતો.

ભારતના જાણીતા ટેક્સટાઇલ ગ્રૂપ રેમન્ડ ગ્રુપના ચેરમેન અને મેનેજિંગ ડાયરેક્ટર ગૌતમ હરિ સિંઘાનિયાએ સોમવારે પત્ની નવાઝ મોદી સિંઘાનિયા સાથે લગ્નજીવનનો અંત આણવાની સોમવારે જાહેરાત કરી હતી. ગૌતમ અને નવાઝ લગ્નજીવનના 32 વર્ષે પછી અલગ થયા હતા. ગૌતમે સિંઘાનિયાએ સોશિયલ મીડિયા પર એક પોસ્ટ શેર કરીને આ અંગેની માહિતી જાહેર કરી હતી. સિંઘાનિયા દંપતી વચ્ચે વિખવાદ ચાલી રહ્યો હોવાની બિઝનેસ વર્તુળોમાં અગાઉ અટકળો ચાલતી હતી. 58 વર્ષના ગૌતમ સિંઘાનિયાએ 1999માં ભારતીય સોલિસિટર નાદર મોદીની પુત્રી નવાઝ મોદી સાથે લગ્ન કર્યા હતા.આ પહેલા બંને 8 વર્ષ સુધી લિવ-ઈન રિલેશનશિપમાં હતા.

બર્મિંગહામ સિટી યુનિવર્સિટી દ્વારા પ્રીટિ ઝિન્ટાને અનોખું સન્માન

એક સમયે બોલીવૂડમાં ખૂબ જ ચર્ચામાં રહેલી યુવા અભિનેત્રી પ્રીટિ ઝિન્ટાને યુકેની બર્મિંગહામ સિટી યુનિવર્સિટી દ્વારા માનદ ડોક્ટરેટની ડિગ્રી એનાયત કરવામાં આવી છે. પ્રીટિએ મનોરંજન અને બિઝનેસના ક્ષેત્રે આપેલા યોગદાનને ધ્યાનમાં લઇને તેને આ સન્માન આપવામાં આવ્યું હતું. બર્મિંગહામમાં દિવાળી નિમિત્તે યોજાયેલા ખાસ કાર્યક્રમમાં પ્રીટિને આમંત્રણ આપવામાં આવ્યું હતું. આ અંગે પ્રીટિએ ખુશી વ્યક્ત કરતાં જણાવ્યું હતું કે, યુનિવર્સિટીની માનદ્ ડોક્ટરેટની ડિગ્રી ખરેખર બહુ મોટું સન્માન છે અને તે મળવા બદલ હું તેને મારું સૌભાગ્ય માનું છું. હું બર્મિંગહામમાં દિવાળીનો તહેવાર ઉજવવા માટે આતુર હતી.

શાહરુખની જવાન ફિલ્મે ઇતિહાસ રચ્યો

બોલીવૂડના બાદશાહ-બાજિગર શાહરુખ ખાનની ફિલ્મ જવાન બોક્સ ઓફિસ પર સુપરહિટ ગઇ છે. વિશ્વભરમાં બોક્સ ઓફિસ પર આ ફિલ્મ રેકોર્ડ બ્રેક કમાણી કરી રહી છે ત્યારે તેણે દુબઇ એક નવો ઇતિહાસ રચ્યો છે. આ ફિલ્મે એક એવી કેટેગરીમાં સ્થાન મેળવ્યું છે જેમાં આજ સુધી ભારતની એક પણ ફિલ્મને સ્થાન મળ્યું નથી. સૂત્રોના જણાવ્યા મુજબ યુએઇમાં આ ફિલ્મ હાઇએસ્ટ ગ્રોસર ફિલ્મ સાબિત થઇ છે. ત્યાં શાહરુખના ચાહકોની સંખ્યા ખૂબ જ મોટી છે. તેથી યુએઇ બોક્સ ઓફિસ પર આ ફિલ્મે હાઇએસ્ટ ગ્રોસર ફિલ્મોની યાદીમાં સ્થાન મેળવીને 75 કરોડથી વધુની કમાણી કરી હતી.

અમર અકબર એન્થની ફિલ્મ ફરીથી બનાવવા લંડનના મેયરની અપીલ

લંડનના મેયરે એક અનોખી માગણી કરીને ભારતીયોને ચોંકાવ્યા છે. મેયર સાદિક ખાને બોલીવૂડની જુની સુપર હિટ ફિલ્મ ‘અમર અકબર એન્થની’ ફરી બનાવવા માટે આગ્રહ કર્યો હતો. લંડનમાં મેયરે જણાવ્યું હતું કે, મારી પાસે બોલીવૂડ માટે એક પ્રસ્તાવ છે. યુકેમાં અમર, અકબર એન્થની ફિલ્મનું ફરીથી નિર્માણ કરવામાં આવે. કારણકે અત્યારે અહીં રાજા તરીકે એક ક્રિશ્ચન કિંગ ચાર્લ્સ છે, હું સાદિક ખાન મેયર છું અને એક હિન્દુ ઋષિ સુનક અમારા વડાપ્રધાન છે. તે ફિલ્મમાં અમિતાભ બચ્ચને ક્રિશ્ચનની ભૂમિકા ભજવી હતું. જોકે, સાદિક ખાને મજાકમાં જણાવ્યું હતું કે, હકીકતમાં મારી ઈચ્છા અમિતાભની ભૂમિકા પાત્ર ભજવવાની છે.

‘ધૂમ’ ફેમ ડાયરેક્ટર સંજય ગઢવીનું અવસાન

હિન્દી ફિલ્મ ધૂમના દિગ્દર્શક સંજય ગઢવીનું રવિવારે સવારે મુંબઈમાં તેમના નિવાસસ્થાને અવસાન થયું હતું, એમ તેમની મોટી પુત્રી સંજીનાએ જણાવ્યું હતું. તેઓ 56 વર્ષના હતાં. સંજીના ઉપરાંત, ગઢવીના પરિવારમાં તેમની પત્ની અને બીજી પુત્રી છે. તેમના અવસાનથી બોલિવૂડમાં શોકનું મોજુ ફરી વળ્યું હતું. ત્રણ દિવસ પછી સંજય ગઢવીનો જન્મદિવસ હતો. તેઓ યશ રાજ ફિલ્મ્સની “ધૂમ” ફ્રેન્ચાઇઝી – “ધૂમ” (2004) અને “ધૂમ 2” (2006)માં બે બ્લોકબસ્ટર હિટ ફિલ્મો માટે જાણીતા હતાં. ગઢવીની પુત્રીના જણાવ્યા મુજબ, દિગ્દર્શક “સંપૂર્ણ સ્વસ્થ” હતા. આજે સવારે 9.30 વાગ્યે તેમના નિવાસસ્થાને તેમનું નિધન થયું હતું.