મોંઘવારીને ડામવા માટે અમેરિકા અને યુરોપના દેશોમાં વ્યાજદરમાં ફરી વધારો કરવામાં આવ્યો હતો. અમેરિકાની ફેડરલ રિઝર્વ બુધવાર, 14 ડિસેમ્બરે વ્યાજદરમાં 0.50 ટકાનો વધારો કર્યો હતો. આની સાથે અમેરિકામાં વ્યાજદરો 15 વર્ષની ટોચે પહોંચ્યા છે. ચાલુ વર્ષે ફેડએ વ્યાજ દરોમાં સાત વખત વધારો કર્યો છે, જેમાં ચાર વખતના 0.75 ટકાના વધારાનો સમાવેશ થાય છે. બીજી તરફ રોપીયન સંઘની મધ્યસ્થ બેંક યુરોપિયન સેન્ટ્રલ બેંક (ઈસીબી)એ ૦.૫૦ ટકાનો વધારો જાહેર કર્યો હતો અને હવે અહી ટૂંકાગાળાના વ્યાજના દર બે ટકા થઇ ગયા છે.

મહારાષ્ટ્ર સરકારે ગુરુવાર 15 ડિસેમ્બરે જણાવ્યું હતું કે હિન્દુજા ગ્રુપ રાજ્યમાં રૂ. 35,000 કરોડનું રોકાણ કરશે.મુખ્યપ્રધાન કાર્યાલયે ટ્વીટ કર્યું હતું કે મુખ્યપ્રધાન એકનાથ શિંદેની હાજરીમાં રાજ્ય સરકાર અને હિન્દુજા ગ્રૂપ વચ્ચે એક સમજૂતીપત્ર (એમઓયુ) પર હસ્તાક્ષર કરવામાં આવ્યા હતા.મુખ્યપ્રધાન શિંદેની હાજરીમાં હિન્દુજા ગ્રૂપ અને મહારાષ્ટ્ર સરકાર વચ્ચે એમઓયુ પર હસ્તાક્ષર થયા હતા. હિન્દુજા જૂથના જીપી હિન્દુજા, અશોક હિન્દુજા અને પ્રકાશ હિન્દુજાની હાજરીમાં મુખ્યપ્રધાનના સત્તાવાર નિવાસસ્થાન વર્ષા ખાતે એમઓયુ પર હસ્તાક્ષર કરવામાં આવ્યા હતા.

ટાટા ગ્રુપની માલિકીની ઈન્ફિનિટી રિટેલ સમગ્ર દેશમાં 100 રિટેલ સ્ટોર્સ ખોલવાની યોજના બનાવી રહી છે. આ સ્ટોર્સમાં માત્ર એપલની પ્રોડક્ટ્સ જ વેચવામાં આવશે. ટાટા ગ્રુપ નવેમ્બરમાં આઈફોન મેન્યુફેક્ચરિંગ વિસ્ટ્રોનની ભારતમાં સ્થિતિ એકમાત્ર ફેક્ટરીને 5,000 કરોડ રૂપિયામાં ખરીદવાની વાતચીત કરી રહ્યું હતું. જો કર્ણાટક સ્થિત આ ફેક્ટરીને ખરીદવાનો સોદો નિષ્ફળ રહ્યો હતો. ટાટા તાઈવાનની વિસ્ટ્રોન સાથે જોઈન્ટ વેન્ચર કરી શકે છે. વિસ્ટ્રોન ભારતમાં આઈફોનના ટોપ વેન્ડર્સમાંથી એક છે. ઈન્ફિનિટી રિટેલ દેશભરમાં ક્રોમા સ્ટોર્સની ચેઈન પણ ચલાવે છે. રિપોર્ટસ મુજબ, ટાટા-એપલની ભાગીદારીવાળો પહેલો સ્ટોર મુંબઈમાં ખુલશે.

માઇક્રો-બ્લોગિંગ પ્લેટફોર્મના નવા બોસ ઇલોન મસ્કને પાછળ રાખીને ફ્રાન્સના બિલિયોનેર બર્નાર્ડ આર્નોલ્ટ વિશ્વના સૌથી ધનિક બન્યાં છે, એમ બ્લૂમબર્ગ બિલિયોનેર્સ ઇન્ડેક્સમાં બુધવાર (14 ડિસેમ્બર)એ જણાવાયું હતું. માઇક્રો-બ્લોગિંગ પ્લેટફોર્મની ખરીદીને પગલે મસ્કની સંપત્તિ $340 બિલિયનની ટોચ પરથી ઘટી 168.5 બિલિયન ડોલર થઈ છે, જ્યારે ફેશન જાયન્ટ LVMHના વડા અર્નોલ્ટની સંપત્તિ 172.9 બિલિયન ડોલર થઈ છે. મસ્કની સંપત્તિમાં ઘટાડાનું કારણે ટેસ્લાના શેરોમાં ધોવાણ છે. બ્લૂમબર્ગ બિલિઓનેર ઈન્ડેક્સ અને ફોર્બ્સ ઈન્ડેક્સ આ બંનેના લિસ્ટિંગમાં ઇલોન મસ્ક બીજા નંબરે પહોંચી ગયા હતા.

‘પઠાણ’ ફિલ્મમાં દીપિકાની ભગવી બિકિનીના મુદ્દે વિવાદ

બોલિવૂડ અભિનેતા શાહરુખ 25 જાન્યુઆરી 2023એ રિલીઝ થનારી તેની ફિલ્મ ‘પઠાણ‘ સાથે ફિલ્મી પડદે કમબેક કરી રહ્યાં છે, પરંતુ તાજેતરમાં રિલીઝ થયેલું આ ફિલ્મનું પહેલું ગીત ‘બેશરમ રંગ’ વિવાદમાં સપડાયું છે. રિલીઝ થયા બાદ સોશ્યલ મીડિયા પર ઘણું ટ્રોલ થયું હતું અને ફિલ્મને બોયકોટ કરવાની સોશ્યલ મીડિયા પર ઝુંબેશ ચાલી રહી છે. આ વિવાદ વચ્ચે કોલકત્તા ઇન્ટરનૅશનલ ફિલ્મ ફેસ્ટિવલના ઉદ્ઘાટન સમારંભમાં પઠાણ વિવાદ પર શાહરૂખે આપી પોતાની પ્રથમ પ્રતિક્રિયા આપી હતી. તેમણે આ વિવાદ પર જવાબ આપતા કહ્યું હતું કે,

અવતાર-ટુ રિલીઝ પહેલા જ ભારતમાં છવાઈ ગઈ

હોલિવૂડ ફિલ્મ અવતારઃ ધ વે ઓફ વોટરે 16 ડિસેમ્બર 2022ના રોજ રીલીઝ પહેલા ભારતમાં જબરદસ્ત આકર્ષણ ઊભું કર્યું છે. જેમ્સ કેમેરોનની આ ફિલ્મની ગુરુવાર સવારે 10 વાગ્યા સુધીમાં એડવાન્સમાં 5.49 લાખ ટિકિટનું વેચાણ થયું હતું. અવતાર 2 ફિલ્મને 3ડી અને આઈમેક્સ સ્ક્રીનમાં વ્યાપક રીતે રિલીઝ કરવામાં આવી છે. અમુક શહેરોમાં શો માટે ટિકિટોની કિંમત 2500-3000 રુપિયા જેટલી વધુ છે. આમાંથી ઘણા શો રવિવાર સુધી વેચાઈ ચૂક્યા છે. જેમ્સ કેમરુનની અવતાર 2 શુક્રવારે ભરાતીય બૉક્સ ઑફિસ પર 40-50 કરોડ સુધી પહોંચવાની અપેક્ષા છે

ફિલ્મમાં બજેટ કરતા સ્ટોરીનું મહત્ત્વ વધુ છેઃ નવાઝુદ્દીન

અનેક વર્ષોની સખત મેહનત પછી, બોલિવૂડમાં મજબૂત સ્થાન જમાવનાર ટેલેન્ટેડ એક્ટર નવાઝુદ્દીન સિદ્દીકી તેમની નવી ફિલ્મ ‘હડ્ડી’ અંગે ચર્ચામાં છે. આ ફિલ્મમાં નવાઝે ટ્રાન્સજેન્ડરની ભૂમિકા ભજવી છે. તેણે આ ભૂમિકા ભજવવા માટે 20થી 25 ટ્રાન્સજેન્ડર્સ સાથે અનેક દિવસ રહ્યો હતો અને તેમના જીવનને નજીકથી જાણ્યું હતું. તાજેતરમાં એક ઈન્ટરવ્યૂ દરમિયાનમાં નવાઝે બોલિવૂડ ફિલ્મોને મળી રહેલી નિષ્ફ્ળતા અંગે પોતાનું મંતવ્ય આપ્યું હતું. તેણે કહ્યું હતું કે, એક ફિલ્મ માટે રૂ. 100 કરોડ જેટલી મોટી રકમ ચાર્જ કરનાર એક્ટર્સ જ ફિલ્મને નુકસાન પહોંચાડે છે.

રાજામૌલીની ફિલ્મ ‘RRR’ ગોલ્ડન ગ્લોબ એવોર્ડની બે કેટેગરીમાં નોમિનેટ થઇ

ઘણા દેશોની બોક્સ ઓફિસ પર ધમાલ મચાવનાર એસ. એસ રાજામૌલીની ‘RRR’ હજુ પણ તેનો જાદુ ઓછો થયો નથી. આ ફિલ્મને પ્રતિષ્ઠિત ગોલ્ડન ગ્લોબ એવોર્ડની બે કેટેગરીમાં નોમિનેટ કરવામાં આવી છે. જુનિયર એનટીઆર અને રામ ચરણ અભિનીત ફિલ્મને શ્રેષ્ઠ બિન અંગ્રેજી ભાષાની ફિલ્મ અને નાચો નાચો માટે શ્રેષ્ઠ મૂળ ગીત માટે નામાંકિત કરવામાં આવી છે. RRR એકમાત્ર ભારતીય ફિલ્મ છે જેણે અંતિમ પાંચમાં સ્થાન મેળવ્યું છે.