અગ્રણી બ્રિટિશ એશિયન હોટેલિયર અને ભારતીય ઉદ્યોગસાહસિક જસમિંદર સિંઘ OBE દ્વારા સ્થાપવામાં આવેલ એડવર્ડિયન હોટેલ્સ લંડન ગૃપે પોતાની 10 હોટેલ્સનું લગભગ £800 મિલિયનની કિંમતે યુએસ પ્રાઈવેટ ઈન્વેસ્ટમેન્ટ ફર્મ સ્ટારવુડ કેપિટલ ગ્રુપને વેચાણ કર્યુ. જેમાં સેન્ટ્રલ લંડન ખાતે આવેલી વિખ્યાત રેડિસન બ્લુ એડવર્ડિયનનો સમાવેશ થાય છે. ગૃરે તા. 12ના રોજ એક નિવેદનમાં જણાવ્યું હતું કે જૂથ સંક્રમણકાળ દરમિયાન પોર્ટફોલિયોનું સંચાલન કરશે. જો કે તે ગૃપ ‘ધ લંડનર’ અને તેની બે રેડિસન કલેક્શન હોટલ, ‘ધ મે ફેર’ અને ‘ધ એડવર્ડિયન માન્ચેસ્ટર’ને જાળવી રાખશે. જે બંને પ્રીમિયમ લાઈફસ્ટાઈલ બ્રાન્ડ રેડિસન કલેક્શનના અભિન્ન અંગ છે. બ્લૂમબર્ગના અહેવાલમાં સૂચવવામાં આવ્યું છે કે આ એક્વીઝીશન માટે લગભગ £800 મિલિયન ચૂકવવામાં આવ્યા છે. પરંતુ આ અંગે કોઈ સત્તાવાર પુષ્ટિ કરાઇ નથી.

રિલાયન્સ ઈન્ડસ્ટ્રીઝના ચેરમેન મુકેશ અંબાણીએ ગુજરાતના સુરતમાં હજીરા ખાતે દેશની પ્રથમ વર્લ્ડ કલાસ કાર્બન ફાઈબર ફેક્ટરી સ્થાપવાની જાહેરાત કરી હતી. અંબાણીએ જણાવ્યું હતું કે રિલાયન્સ 2024માં જામનગરમાં 5,000 એકરમાં ગ્રીન એનર્જી ગીગા કોમ્પ્લેક્સ સ્થાપશે. તેમણે એમ પણ કહ્યું હતું કે રિલાયન્સ અને રિલાયન્સ ફાઉન્ડેશન “ગુજરાતમાં અન્ય કેટલાક ભાગીદારો સાથે શિક્ષણ, રમતગમત અને કૌશલ્ય માળખામાં સુધારો કરવા માટે પ્રયાસ કરશે. તેનાથી વિવિધ ઓલિમ્પિક્સ સ્પોર્ટસમાં ભવિષ્યના ચેમ્પિયનો તૈયાર કરી શકાશે. મણે કહ્યું કે દુનિયાના ઘણા દેશોમાં હજુ 5G સર્વિસ નથી, પરંતુ ગુજરાત સંપૂર્ણરીતે 5G એનેબલ્ડ રાજ્ય છે. ભવિષ્યમાં આપણે ગુજરાતનું ડેટા સેન્ટર બનાવવાના છીએ.

ગુજરાતના મુખ્ય પ્રધાન ભૂપેન્દ્ર પટેલે જણાવ્યું છે કે તેમની સરકારે ભારતના જીડીપીમાં 10 ટકા યોગદાન આપવાનું અને 2026-27 સુધીમાં $500 બિલિયનનું અર્થતંત્ર બનવાનું લક્ષ્ય નક્કી કર્યું છે. ગુજરાત હાલમાં દેશની જીડીપીમાંમાં 8.3 ટકાનું યોગદાન આપે છે. વાઇબ્રન્ટ ગુજરાત ગ્લોબલ સમિટ પહેલા એક ઇન્ટરવ્યૂમાં તેમણે જણાવ્યું હતું કે ગુજરાતની વસ્તી દેશની કુલ વસ્તીના વસ્તીના 5 ટકા છે, પરંતુ દેશની જીડીપીમાં 8.3 ટકાથી વધુ યોગદાન આપે છે. પાછલા વર્ષમાં, રાજ્યનો ભારતની કુલ વેપારી નિકાસમાં નોંધપાત્ર 33 ટકા હિસ્સો હતો. ટેક્સટાઇલ, કેમિકલ અને પેટ્રોકેમિકલ્સ, જેમ્સ, જ્વેલરી અને સિરામિક્સ જેવા ક્ષેત્રોમાં અગ્રેસર હોવા ઉપરાંત, ગુજરાત ઓટોમોબાઇલ સેક્ટરના હબ તરીકે પણ ઉભરી આવ્યું છે, જેણે પોતાને દેશના આર્થિક પાવરહાઉસ તરીકે સ્થાપિત કર્યું છે.

યુએઇની ગ્લોબલ લોજિસ્ટિક્સ મેનેજમેન્ટ એન્ડ સર્વિસિસ કંપની ડીપી વર્લ્ડે ગુજરાત સરકાર સાથે રૂ.25,000 કરોડના કરારો કર્યા છે, જેના ભાગરૂપે તે નવા બંદરો, ટર્મિનલ્સ અને ઇકોનોમિક ઝોન વિકસાવશે. કંપનીએ એક નિવેદનમાં જણાવ્યું હતું કે વાઇબ્રન્ટ ગુજરાત ગ્લોબલ સમિટ 2024 દરમિયાન ગાંધીનગર ખાતે આ અંગે મેમોરેન્ડા ઑફ અન્ડરસ્ટેન્ડિંગ (એમઓયુ) પર હસ્તાક્ષર કરાયા હતા. ડીપી વર્લ્ડ ગ્રુપના ચેરમેન અને સીઈઓ સુલતાન અહેમદ બિન સુલેમે વડાપ્રધાન નરેન્દ્ર મોદી અને યુએઈના પ્રમુખ શેખ મોહમ્મદ બિન ઝાયેદ અલ નાહયાનની હાજરીમાં ગુજરાત સરકારના અધિક મુખ્ય સચિવ એમ કે દાસ સાથે ગુજરાતમાં સંભવિત રોકાણ અંગેના કરારો પર હસ્તાક્ષર કર્યા હતા. આ સમજૂતી હેઠળ ડીપી વર્લ્ડ દક્ષિણ ગુજરાત અને પશ્ચિમ દરિયાકાઠામાં મલ્ટી પર્પઝ ડીપ ડ્રાફ્ટ પોર્ટ વિકસાવશે.

બોલીવૂડમાં કોને મળ્યું અયોધ્યામાં જવાનું નિમંત્રણ?

ભારતમાં અત્યારે અયોધ્યા-રામમંદિર-રામલલ્લાની જ ચર્ચા છે.અયોધ્યાના રામલલ્લાના પ્રાણ પ્રતિષ્ઠા મહોત્સવ માટે દેશ-વિદેશના અનેક લોકોને નિમંત્રણ પાઠવવામાં આવ્યા છે, તેમાંથી બોલીવૂડના સેલેબ્સ પણ બાકાત નથી. રણબીર કપૂર અને આલિયા ભટ્ટ પછી રણદીપ હુડ્ડાને અયોધ્યા રામ મંદિરનું નિમંત્રણ મળ્યું છે. રણદીપે પોતાના ઓફિશિયલ ઈન્સ્ટાગ્રામ એકાઉન્ટ પર પણ પત્ની સાથે ફોટો પોસ્ટ કર્યો છે અને તેની પત્ની આમંત્રણ પત્રિકા દેખાડી રહી છે.

શાહરુખ અને કરણ જોહર ફરીથી સાથે….

બોલીવૂડના બાદશાહ શાહરુખ ખાન અને જાણીતા દિગ્દર્શક કરણ જોહરે સાથે મળીને ‘કુછ કુછ હોતા હૈં’, ‘કભી ખુશી કભી ગમ’, ‘માય નેમ ઇઝ ખાન’ અને ‘કભી અલવિદા ના કહેના’ જેવી સુપરહીટ ફિલ્મો આપી હતી. તેના ચાહકો ઈચ્છે છે કે શાહરુખ અને કરણ જોહર ફરીથી સાથે મળીને કામ કરે અને બોલીવૂડમાં જાદુ કરે. મીડિયા રિપોર્ટ મુજબ શાહરુખ અને કરણ જોહર ફરીથી સાથે કામ કરે તેવી પ્રબળ સંભાવનાઓ છે.

શેફાલી જરીવાલાનું ટીવી પડદે પદાર્પણ

મનોરંજન જગતમાં ગુજરાતી મૂળની શેફાલી જરીવાલા કાંટા લગા ગર્લ તરીકે ઓળખાય છે. તે ટૂંક સમયમાં ‘શૈતાની રસ્મેં’ દ્વારા ટીવી પર પદાર્પણ કરી રહી છે. આ શોમાં તે કપલિકાની ભૂમિકા ભજવી રહી છે. એ માટે તેણે ઘણી તૈયારી કરી હતી. આ અંગે શેફાલીએ કહ્યું કે, ‘હું રિયલ લાઇફમાં પણ કપલિકાની ભૂમિકા ભજવી રહી છું. હું મારા પાત્ર માટે મારું શ્રેષ્ઠ આપવાનો પ્રયાસ કરવા હું આ પાત્રની જેમ જ રહેતી હતી. મારી ચાલ, મારી વાતો, લોકોને હું જે રીએક્શન આપું છું એ બધામાં મેં કપલિકાના પાત્ર મુજબ ફેરફાર કર્યા હતા. આ પાત્રમાં રૂપાંતર થવા માટે હું પોતાને બેડરૂમમાં બંધ કરી દઉં છું. મારું પાત્ર થોડું ડાર્ક છે. લોકોને ઑન સ્ક્રીન શેફાલી છે કે કપલિકા એની વચ્ચે તફાવત જોવા ન મળે એવું હું ઇચ્છું છું.’

પ્રખ્યાત શાસ્ત્રીય ગાયિકા પ્રભા અત્રેનું 92 વર્ષની વયે અવસાન

પ્રખ્યાત શાસ્ત્રીય ગાયિકા અને પદ્મ વિભૂષણ વિજેતા ડૉ. પ્રભા અત્રેનું શનિવારે વહેલી સવારે 92 વર્ષની વયે પૂણેમાં તેમના નિવાસસ્થાને હાર્ટ એટેકને કારણે અવસાન થયું હતું. હિંદુસ્તાની શાસ્ત્રીય સંગીતના કિરાણા ઘરાનાના અત્રેને ભારત સરકાર દ્વારા ત્રણેય પદ્મ પુરસ્કારોથી સન્માનિત કરવામાં આવ્યા હતાં. એક સૂત્રે જણાવ્યું હતું કે અત્રેને તેમના નિવાસસ્થાન પર ઊંઘમાં હાર્ટ એટેક આવ્યાં હતો. તેમને દીનાનાથ મંગેશકર હોસ્પિટલમાં લઈ જવામાં આવ્યા હતા, જ્યાં તેમને સવારે 5.30 વાગ્યે મૃત જાહેર કરાયા હતા. શાસ્ત્રીય ગાયક હોવા ઉપરાંત, પ્રભા અત્રે એક ઉત્કૃષ્ટ વિદ્વાન, સંશોધક, સંગીતકાર અને લેખક પણ હતાં. વિજ્ઞાન અને કાયદામાં સ્નાતક થયેલા અત્રેએ સંગીતમાં ડોક્ટરેટની પદવી લીધી હતી.