ભારત સાથે વેપાર મંત્રણાઓમાં સાનુકુળતા ઉભી કરવા યુકે ભારતીયો માટે વીસા નિયમો હળવા બનાવવાની અને મોટી સંખ્યામાં ભારતીયો થોડા વર્ષો માટે યુકેમાં જોબ – વ્યવસાય માટે આવી શકે તેમજ વસવાટ કરી શકે તેવી દરખાસ્તો રજૂ કરવાની યોજના ઉપર યુકે સરકાર કામ કરી રહી હોવાનું જાણવા મળે છે. યુકેના આંતરરાષ્ટ્રીય વેપાર સેક્રેટરી એન-મેરી ટ્રેવેલયાન આ મહિનામાં જ ભારતના પ્રવાસે જવાના છે અને તેમની ભારત યાત્રાનો હેતુ ભારત-યુકે વચ્ચે વેપાર મંત્રણાઓનો આરંભ કરવાનો છે.

યુકે સરકારે વિદેશી હેલ્થ સહાયકો અને કેર ટેકર્સને આકર્ષવા માટે વિઝા નીતિમાં છૂટછાટો જાહેર કરી છે. કેર સેક્ટર્સમાં પ્રવર્તી રહેલી સહાયકોની અછતને પૂર્ણ કરવા માટે વિદેશી કેરટેકર્સને એક વર્ષ માટે યુકેના વિઝા મળશે. હોમ સેક્રેટરી પ્રીતિ પટેલે જણાવ્યું હતું કે નવી વિઝા નીતિથી દેશમાં કેરટેકર્સની અછત ઘટશે.

લંડન ખાતેના ભારતીય હાઈ કમિશને એક અખબારી યાદીમાં તા. 31 ડીસેમ્બર, 2021ના રોજ જણાવ્યું હતું કે, ભારત સરકારે હાલમાં કોરોના વાઈરસના રોગચાળાના સંદર્ભમાં અગાઉ 19 એપ્રિલ, 2021ના રોજ વિદેશમાં સ્થાયી થયેલા ભારતીયો – ઓવરસીઝ સિટિઝન્સ ઓફ ઈન્ડિયાની સુવિધા માટે ઓસીઆઈ કાર્ડ અંગે જે રાહતો આપી હતી, તે સંદર્ભમાં લોકોને નવા ઓસીઆઈ કાર્ડ લેવાની જરૂરત ઉભી થઈ હોય તેમના માટે તેની સમય મર્યાદા વધુ એક વર્ષ લંબાવીને 31 ડીસેમ્બર, 2022 કરવામાં આવી છે.

અમેરિકામાં સોમવારે (ત્રીજી જાન્યુઆરી) એક મિલિયન (10 લાખ) થી વધુ લોકો કોરોનાગ્રસ્ત હોવાનું નિદાન થયું હતું, જે વિશ્વના કોઈપણ દેશ માટે એક દિવસમાં નવા દર્દીઓની સંખ્યાનો એક નવો રેકોર્ડ બની રહ્યો છે.

ભારતમાં આશરે 6000 એનજીઓના વિદેશી ફંડ માટેના લાઇસન્સ શનિવારે રદ થયા છે. તેનાથી આ એનજીઓ હવે વિદેશી ફંડ નહીં મેળવી શકે. આ એનજીઓએ લાઇસન્સ રિન્યૂ કરવા માટે અરજી કરી ન હતી અથવા તે ગૃહ મંત્રાલયે અરજી માન્ય રાખી ન હતી.

વર્ષ 2020ના ડિસેમ્બરની તુલનાએ આ રવિવારે વધુ માઇગ્રન્ટ્સે ચેનલ પાર રપી હતી. 21-માઇલના ડોવર સ્ટ્રેટમાં ગાઢ ધૂમ્મસનો અવરોધ હોવા છતાં બ્રિટિશ અધિકારીઓએ 11 બોટમાં 274 લોકોને બચાવ્યા હતા. જ્યારે ડિસેમ્બર 2020માં 16 બોટમાં 211 લોકો આવ્યા હતા.

દેશમાં અને ગુજરાતમાં વધી રહેલા કોરોનાના નવા કેસની સ્થિતિમાં ગાંધીનગરમાં ઉત્તરાયણ પહેલા વાઇબ્રન્ટ ગુજરાત ગ્લોબલ ઇન્વેસ્ટર્સ સમિટ યોજાશે કે નહીં તેવી ચર્ચા થઇ હતી.

ગુડ ગવર્નન્સ ઇન્ડેક્સના કમ્પોઝિટ રેન્કિંગમાં ગુજરાત ટોચના સ્થાન હાંસલ કર્યું છે. આ પછી બીજો ક્રમ મહારાષ્ટ્ર અને ત્રીજો ક્રમ ગોવાનો આવ્યો છે. બીજી તરફ ઉત્તરપ્રદેશે ગુડ ગવર્નન્સ ઇન્ડેક્સના વિવિધ ઇન્ડેકેટર્સમાં 8.9 ટકાનો નોંધપાત્ર સુધારો હાંસલ કર્યો છે.

ગુજરાતમાં મુખ્યપ્રધાન ભૂપેન્દ્ર પટેલે સોમવાર, 3 જાન્યુઆરીથી 15-18 વર્ષના બાળકોના રસીકરણનો શુભારંભ કરાવ્યો હતો.. તેમણે ગાંધીનગર જિલ્લામાં કોબામાં આવેલી સ્કૂલમાં સવારે અભિયાનનો પ્રારંભ કરાવ્યા પછી બાળકોના રસીકરણ સેન્ટર પર લાઈનો લાગી રહી હતી.

ભારતે સાઉથ આફ્રિકા પ્રવાસમાં સેન્ચુરીઅન ખાતેની પ્રથમ ટેસ્ટ મેચમાં 113 રનથી શાનદાર વિજય મેળવી એક વધુ ઈતિહાસ સર્જ્યો હતો. સામાન્ય રીતે સાઉથ આફ્રિકાનો ગઢ ગણાતા સેન્ચુરીઅનના સુપર સ્પોર્ટ્સ પાર્કમાં એક આખા દિવસની રમત વરસાદમાં ધોવાઈ ગયા છતાં ભારતે અહીં સૌપ્રથમવાર વિજય હાંસલ કર્યો હતો.

ભારતીય વન-ડે ટીમનો નવો કેપ્ટન રોહિત શર્મા તેની પગના સ્નાયુની ઈજાના કારણે સાઉથ આફ્રિકા સામેની વન-ડે શ્રેણીમાં પણ રમી શકશે નહીં. હવે તેના સ્થાને યુવા બેટ્સમેન કે. એલ. રાહુલની વન-ડે ટીમના કેપ્ટન તરીકે પસંદગી કરાઈ છે.

સાઉથ આફ્રિકાના વિકેટકિપર બેટ્સમેન ક્વિન્ટન ડી કૉકે અચાનક જ ટેસ્ટ ક્રિકેટમાંથી નિવૃત્તિની જાહેર કરી ક્રિકેટ જગતને ચોંકાવી દીધું હતું. સેન્ચુરીઅન ટેસ્ટમાં સાઉથ આફ્રિકાના પરાજય પછીના ગણતરીના કલાકોમાં જ ક્રિકેટ સાઉથ આફ્રિકાએ એક નિવેદનમાં જાહેરાત કરી હતી કે, ક્વિન્ટન ડી કૉકે ટેસ્ટ ક્રિકેટમાંથી તાત્કાલિક અસરથી નિવૃત્તિ લીધી છે.