ટાટા ગ્રૂપની માલિકીની એરલાઇન એર ઇન્ડિયાએ ગુરુવારે ​​એક આધુનિક નવી બ્રાન્ડ ઓળખ અને નવી એરક્રાફ્ટ લિવરીનું અનાવરણ કર્યું હતું. આ નવો લોગો બોલ્ડ ન્યૂ ઇન્ડિયાનું પ્રતિનિધિત્વ કરે છે. નવો લોગો તેના નવા અવતારનું એક મહત્ત્વનું સીમાચિહ્ન છે. એર ઇન્ડિયન રાષ્ટ્રીય કંપનીમાંથી રાષ્ટ્રીય પ્રેરણા તરફ પરિવર્તન કરી રહી છે. એર ઈન્ડિયાનું નવું લોગો સિમ્બોલ – ‘ધ વિસ્ટા’ – ગોલ્ડ વિન્ડો ફ્રેમના શિખરથી પ્રેરિત છે, જે અમર્યાદિત શક્યતાઓ, પ્રગતિશીલતા અને ભવિષ્ય માટે એરલાઈન્સના બોલ્ડ, આત્મવિશ્વાસપૂર્ણ દૃષ્ટિકોણને દર્શાવે છે.

નેશનલ કંપની લો ટ્રિબ્યુનલ (NCLT)એ એન્ટરટેઇનમેન્ટ કંપની ઝી એન્ટરટેઈનમેન્ટ એન્ટરપ્રાઈસીસઅને કલ્વર મેક્સ એન્ટરટેઈનમેન્ટ (અગાઉ સોની પિક્ચર્સ નેટવર્ક્સ ઈન્ડિયા તરીકે ઓળખાતી હતી) વચ્ચેના 10 બિલિયન ડોલરના મેગા મર્જરને ગુરુવારે મંજૂરી આપી હતી. એનસીએલટીની મુંબઈ બેન્ચના વડા એચ.વી. સુબ્બારાવ અને મધુ સિંહાની બેન્ચે આ આદેશ આપ્યો હતો. આ સાથે 10 બિલિયન ડોલરની મીડિયા કંપનીનાં સર્જનનો માર્ગ મોકળો થઈ ગયો છે, જે દેશમાં સૌથી મોટી હશે. મર્જર અંગેના તમામ વાંધા ટ્રિબ્યુનલે ફગાવી દીધાં હતાં. એનસીએલટીએ ગત 11 જુલાઈએ અનેક લેણદારો વિરોધને પગલે આદેશ અનામત રાખ્યો હતો.

અમેરિકા અને યુકે જેવા વિકસિત દેશોમાં વ્યાજદરમાં સતત વધારો થઈ રહ્યો છે ત્યારે ભારતીય રિઝર્વ બેન્કે ગુરુવારે નાણા નીતિની સમીક્ષા પછી વ્યાજદરને સ્થિર રાખવાનો નિર્ણય કર્યો હતો. જોકે આરબીઆઇએ સંકેત આપ્યો હતો કે જો ખાદ્યચીજોના ભાવને કારણે ફુગાવો વધશે તો નાણા નીતિ આકરી બનાવવી પડશે. તેને કારણે ચાલુ વર્ષે વ્યાજના દર ઘટવાની સંભાવના હવે રહી નથી. આથી લોનધારકોને તેમના ઈએમઆઈમાં કોઈ ફેર નહીં પડે. આરબીઆઈની મોનિટરી પોલિસી કમિટી (MPC)ની ગુરુવારે સંપન્ન થયેલી મીટિંગમાં રેપો રેટ 6.50 ટકા યથાવત્ રાખવાનો નિર્ણય સર્વસંમતિથી કર્યો હતો. રિઝર્વ બેન્કે ચાલુ વર્ષ માટે રિટેલ ફુગાવાનો અંદાજ 5.1 ટકાથી વધારીને 5.4 ટકા કરી દીધો છે.

ભારતમાં ડોમેસ્ટિક એરલાઇન્સમાં ચાલુ વર્ષે જુલાઇ મહિના સુધીમાં કુલ 338 ટેકનિકલ ખામીઓ સર્જાઈ હતી. તેમાંથી ઇન્ડિગોમાં 206, એર ઇન્ડિયામાં 49, ગો એરમાં 22, સ્પાઇસજેટમાં 21 અને અકાશા એરમાં 18 ટેકનિકલ ખામીનો સમાવેશ થાય છે, તેવી સંસદમાં સરકારે સોમવારે માહિતી આપી હતી. નાગરિક ઉડ્ડયન રાજ્ય પ્રધાન જનરલ (નિવૃત્ત) વીકે સિંહે રાજ્યસભામાં એક લેખિત જવાબમાં જણાવ્યું હતું કે એરક્રાફ્ટમાં ટેકનિકલ ખામીઓ એરક્રાફ્ટમાં ફીટ કરવામાં આવેલા ઘટકો/ઉપકરણોની ખામીને કારણે થઈ શકે છે.

અમિતાભ અડિખમ @ 80

આધુનિક બોલીવૂડમાં દંતકથા સમાન અને સદીના મહાનાયક અમિતાભ બચ્ચન અત્યારે 80 વર્ષની ઉંમર છતાં ટોચનાં અભિનેતાઓ કરતાં પણ વ્યસ્ત રહે છે. સાડા છ દાયકાની ઝળહળતી કારકિર્દી ધરાવતા બીગ બીને ભારતીય મનોરંજન ઉદ્યોગનાં આદર્શ માનવામાં આવે છે. પાકટ વય અને નાદુરસ્ત તબિયત હોવા છતાં તેઓ એ જ જુસ્સાથી કામ કરે છે અને સંપૂર્ણ સમર્પણ સાથે ફિલ્મો, બ્રાન્ડ પ્રમોશનિંગ તથા કેબીસી-15ના શૂટિંગમાં વ્યસ્ત છે. અમિતાભનાં અનેક સમકાલીન હીરો આજે હયાત નથી અને જે છે તે વર્ષો પહેલાં નિવૃત્ત થઈ ગયા છે પરંતુ અમિતાભ આજે પણ અડીખમ છે.

આદિત્ય નારાયણ ‘સા રે ગા મા પા’માં હોસ્ટ તરીકે જોવા મળશે

ઝી ટીવી ફરી એકવાર સિંગિંગ રિયાલિટી શો ‘સા રે ગા મા પા’ લઈને આવી રહ્યો છે. આ વર્ષે આ શોમાં હોસ્ટ તરીકે આદિત્ય નારાયણ જોવા મળશે. તેની સાથે નિર્ણાયકોની પેનલમાં હિમેશ રેશમિયા, નીતિ મોહન અને અનુ મલિક જોડાયા છે. આદિત્ય એ હંમેશા એક પ્રતિભાશાળી હોસ્ટ રહ્યો છે, જેનો જાદુ અને ગાયકીની ક્ષમતા સા રે ગા મા પાએ બહુ નાની ઉંમરમાં જ જોઈ હતી. દરેક આગળ વધતી સીઝનની સાથે તેની પ્રસિદ્ધિ વધી છે અને ફરીથી તેની અદભૂત મસ્તીની સાથે દર્શકોને જકડી રાખવા માટે નિર્ણાયકો અને સ્પર્ધકની સાથે એક સરખું જ સંયોજન કરી દર્શકોનું મનોરંજન કરવા તૈયાર છે.

અક્ષય કુમારને સ્વતંત્રતા દિવસ પર ફરી ભારતીય નાગરિકતા મળી

કેનેડાની નાગરિકતા માટે ઘણીવાર ટીકાઓનો સામનો કરી રહેલા બોલિવૂડ અભિનેતા અક્ષય કુમારને દેશના 77મા સ્વતંત્રતા દિવસે ભારતીય નાગરિકતા આપવામાં આવી છે. ભારતીય નાગરિકતાના દસ્તાવેજ શેર કરતા અક્ષયકુમારે જણાવ્યું હતું કે “દિલ ઔર નાગરિકતા, દોનો હિન્દુસ્તાની. સ્વતંત્રતા દિવસની શુભકામનાઓ! જય હિંદ! અક્ષય કુમારને ઘણીવાર ‘કેનેડા કુમાર’ કહીને સોશિયલ મીડિયા પર ટ્રોલ કરાતો હતો. કેનેડાની નાગરિકતા પહેલા પણ અક્ષય પાસે ભારતની નાગરિકતા હતી. ફિલ્મો સારી ચાલી રહી ન હતી ત્યારે અક્ષય કેનેડામાં રહેવાનું વિચારી રહ્યો હતો.

પીઢ અભિનેત્રી અને પૂર્વ સાંસદ જયા પ્રદાને છ મહિનાની જેલ

વીતેલા જમાનાની અભિનેત્રી અને પૂર્વ સાંસદ જયા પ્રદાને ચેન્નાઇની કોર્ટે કેટલાંક વર્ષ જૂના એક કેસમાં છ મહિનાની જેલની સજા અને રૂ.5,000નો દંડ ફટકાર્યો છે. આ કેસમાં અભિનેત્રીની સાથે તેના બિઝનેસ પાર્ટનર રામ કુમાર અને રાજા બાબુને પણ દોષી ઠેરવવામાં આવ્યાં હતાં. અહેવાલો અનુસાર જયા પ્રદા અને બિઝનેસ પાર્ટનરો તે સમયે ચેન્નાઈમાં એક મૂવી થિયેટર ધરાવતા હતાં. પરંતુ ખોટને કારણે સિનેમા હોલ બંધ કરી દીધો હતો. થિયેટરોમાં કામ કરતા સ્ટાફ સભ્યોએ તેમના પગારમાંથી કાપવામાં આવેલી ESI રકમની ચુકવણી ન કરવા બદલ જયા પ્રદા વિરુદ્ધ કેસ દાખલ કર્યો હતો. આ પછી શ્રમ સરકારી વીમા નિગમે જયા પ્રદા, રામ કુમાર અને રાજા બાબુ વિરુદ્ધ ચેન્નાઈની એગ્મોર મેજિસ્ટ્રેટ કોર્ટમાં કેસ દાખલ કર્યો હતો. કોર્ટે કેસની સુનાવણી કરી સજા અને દંડનો ચુકાદો આપ્યો હતો.