કોરોના મહામારી અને યુક્રેન યુદ્ધને કારણે વિશ્વના દેશો મોંઘવારીની નાગચૂડમાં ફસાઈ રહ્યાં છે ત્યારે વર્લ્ડ બેન્કના પ્રેસિડન્ટ ડેવિડ માલપાસે બુધવારે જણાવ્યું હતું કે યુક્રેનમાં રશિયાના યુદ્ધ તથા તેનાથી ફૂડ અને એનર્જીના ભાવ પરની અસરને કારણે વૈશ્વિક મંદી આવી શકે છે. માલપાસે યુએસ ચેમ્બર ઓફ કોમર્સના ઉપક્રમે યોજાયેલી એક કાર્યક્રમમાં આ ચોંકાવનારું નિવેદન આપ્યું હતું. દાવોસમાં તાજેતરમાં યોજાયેલી વર્લ્ડ ઇકોનોમિ ફોરમની બેઠકમાં પણ મંદી અંગે સ્પેશ્યલ સેશનનું આયોજન કરવામાં આવ્યું હતું. આઈઈએના કાર્યકારી ડિરેક્ટર ફાતિહ બિરોલે પણ ચેતવણી આપી કે, ઉનાળામાં ક્રૂડની માગમાં વધારો વૈશ્વિક મંદીનું કારણ બની શકે છે. તેમણે કહ્યું કે, વૈશ્વિક ઊર્જા બજારમાં ક્રૂડની કિંમતોને વધતી રોકવા માટે દરેક દેશે યોગદાન આપવાની જરૂર છે.

બ્રિટને ઓઇલ એન્ડ ગેસ કંપનીઓના નફા પર 25 ટકા વિન્ડફોલ ટેક્સની ગુરુવારે જાહેરાત કરી છે. આ સાથે લોકોને એનર્જીના વધતાં બિલમાં રાહત આપવા માટે 15 બિલિયન પાઉન્ડના પેકેજની પણ જાહેરાત કરવામાં આવી છે. આ હિલચાલથી યુકેમાં પરિવારોને તેમના એનર્જી બિલમાં 400 પાઉન્ડનું ડિસ્કાઉન્ટ મળશે. નીચી આવક ધરાવતા પરિવારોને વધુ રાહત મળશે. આ નિર્ણય વડાપ્રધાન બોરિસ જોન્સન સરકારના હૃદય પરિવર્તનનો સંકેત આપે છે, કારણ કે સરકાર અગાઉ માનતી હતી કે આવા ટેક્સથી રોકાણ સામે અવરોધ ઉભો થશે. એનર્જીના વધતાં બિલ સામે આ વર્ષે સરકારે બીજીવાર નીતિવિષયક દરમિયાનગીરી કરી છે. જોન્સન સરકાર એનર્જી બિલમાં લોકોને વધુ સહાય પૂરી પાડવાના રાજકીય દબાણનો સામનો કરી રહી છે. વિપક્ષો અને કેમ્પેનર્સે તેને કોસ્ટ ઓફ લિવિંગ ક્રાઇસિસ ગણાવી હતી.

વેદાંત ભારતમાં તેના 20 બિલિયન ડોલરના સેમિકન્ડક્ટર અને ડિસ્પ્લે પ્લાન્ટ્સ માટેનું સ્થળ જૂનના મધ્ય સુધીમાં નક્કી કરશે અને બે વર્ષમાં પ્રથમ ચીપ પ્રોડક્ટ તૈયાર હશે, એમ વેદાંતના ચેરમેન અનિલ અગ્રવાલે દાવોસમાં વર્લ્ડ ઇકોનિમિક ફોરમ દરમિયાન એક ઇન્ટરવ્યૂમાં બુધવારે (25મે)એ જણાવ્યું હતું. ઓઇલથી લઇને મેટલ સુધીના બિઝનેસ કરતા વેદાંત ગ્રૂપે ફેબ્રુઆરીમાં જણાવ્યું હતું કે તે તે ચીપ ઉત્પાદનમાં પ્રવેશ કરશે અને ભારતને સેમિકન્ડક્ટર મેન્યુફેક્ચરિંગનું હબ બનાવવાની વડાપ્રધાન નરેન્દ્ર મોદીની યોજનાને સપોર્ટ કરવા તાઇવાનની ફોક્સકોન સાથે સંયુક્ત સાહસની રચના કરશે.

ભારતીય મૂળના નીતિન પાસ્સીએ સ્થાપેલી અને ઝડપથી યુકેની સૌથી મોટી ઓનલાઇન ફાસ્ટ-ફેશન કંપનીઓમાં સ્થાન હાંસલ કરનારી ફાસ્ટ-ફેશન રિટેલર મિસગાઇડેડ હવે પતનના આરે છે. સપ્લાય ચેઇનની સમસ્યા, માલ ભાડામાં વધારો તથા હરીફો બૂહુ અને ચીની કંપની શીનની વધતી જતી સ્પર્ધા વચ્ચે મિસાઇડેડના અસ્તિત્વ સામે સવાલ ઊભા થયા છે. કંપનીના લેણદારોએ સમેટી લેવાની પિટિશન ઇશ્યૂ કરી છે. આશરે 330 કર્મચારી ધરાવતી આ રિટેલર ટૂંકસમયમાં વહીવટદારોને હાથમાં આવે તેવી શક્યતા છે. અગાઉ ફાઇનાન્સ કંપની ઓલ્ટેરી ઇન્વેસ્ટર્સે મિસગાઇડેડને ઉગારી લીધી હતી. તાજેતરના સમયગાળામાં ઓલ્ટેરી પણ આ ફાસ્ટ ફેશન બિઝનેસના વેચાણ માટે પ્રયાસ કરી રહી છે.

આ વર્ષે મલાઇકા-અર્જુન લગ્ન કરશે?

મલાઈકા અરોરા પોતાના કરતાં 12 વરસ નાના અર્જુન કપૂર સાથે આ વર્ષના અંત સુધીમાં લગ્ન કરશે તેવી ચર્ચાઓ બોલીવૂડમાં થઇ રહી છે. તેઓ છેલ્લાં પાંચ વર્ષથી રિલેશનશિપમાં છે તે જગજાહેર છે. હવે તેમની નજીકના સૂત્રો જણાવે છે કે, મલાઈકા અને અર્જુન આ વર્ષે નવેમ્બર કે ડિસેમ્બરમાં એક સાદા સમારંભમાં લગ્ન કરી લેશે. આ સમારંભમાં માત્ર ગણતરીના મહેમાનો અને પરિવારજનો જ હાજર રહેશે. લગ્ન પછી બંને કેટલાક મિત્રો માટે એક વેડિંગ પાર્ટી પણ યોજશે. મલાઈકા અને અરબાઝ ખાને 2008માં લગ્ન કર્યાં હતાં અને તેમનો પુત્ર અરહાન અત્યારે 19 વર્ષનો છે. મલાઈકાએ 2016માં અરબાઝ સાથે છૂટાછેડા લીધા હતા.

સોનમ કપૂરનું બિઝનેસમાં પદાર્પણ

બોલિવૂડની ફેશન અને સ્ટાઈલ આઈકોન તરીકે જાણીતી સોનમ કપૂરે સુંદરતાની સાથે સ્માર્ટનેસ પણ સાબિત કરીને બિઝનેસમાં ઝંપલાવ્યું છે. ઈન્ડસ્ટ્રિયાલિસ્ટ ફેમિલીમાં મેરેજ કરનારી સોનમ કપૂર પાસે ઈન્વેસ્ટમેન્ટ કરવાની ટેલેન્ટ પણ છે. સોનમે તાજેતરમાં બ્લોકચેઈન બેસ્ડ ગેમ મેકાફાઈટક્લબમાં ઈન્વેસ્ટ કર્યું છે, જેને ઓનલાઈન ગેમિંગ સ્ટાર્ટ અપ ઈરરેવરન્ટ લેબ્સે લોન્ચ કરી છે. પોતાના ઈન્વેસ્ટમેન્ટ અંગે જાહેરાત કરતાં સોનમે ટ્વિટર પર લખ્યુ હતું કે, વીડિયો ગેમ્સ રમતા હું મોટી થઈ છું અને મને તેની દરેક બાબત ગમે છે. ગેમની આર્ટ, સ્ટોરી ટેલિંગ અને તેને ડેવલપ કરવામાં મદદરૂપ થતી ક્રીએટિવિટી ખૂબ એક્સાઈટિંગ છે. વીડિયો ગેમિંગ ઈન્ડસ્ટ્રીને વેબ 3.0માં લઈ જવાનું કામ આ સ્ટાર્ટ અપ કરશે તેવો સોનમે વિશ્વાસ છે. આ વીડિયો ગેમમાં એલિયનના અત્યાચારોથી માનવજાતને બચાવવાના મિશનની સ્ટોરી છે. ઈન્વેસ્ટમેન્ટની સાથે સોનમ એક્ટિંગમાં પણ એક્ટિવ રહે છે.

અર્જુનને ગમે છે પડકારજનક પાત્રો

40થી વધુ ફિલ્મોમાં અભિનય આપનાર અર્જુન રામપાલ ફિલ્મોમાં પડકારજનક ભૂમિકા ભજવવાનું પસંદ કરે છે. તેણે ‘લંડન ફાઈલ્સ’ નામની વેબસિરીઝ કામ કર્યું છે. તેમાં તેણે એક નિષ્ક્રિય પોલીસ અને હત્યાકાંડની તપાસ કરનાર જાસૂસની ભૂમિકા ભજવી છે. અર્જુન રામપાલ કહે છે કે તેને આ પાત્ર માટે ઘણી પૂર્વ તૈયારી કરવી પડી હતી. આ સિરીઝમાં અર્જુન એક એવા જાસૂસની ભૂમિકા ભજવે છે, જેને એક જટીલ કેસ સોંપવામાં આવે છે અને તેમાં જોડાયા પછી તેની પોતાની માન્યતાઓ સામે પ્રશ્નો ઊભા થાય છે. ઓમ સિંઘ નામના આ પાત્ર વિશે અર્જુન કહે છે, ‘મેં અત્યાર સુધીમાં કરેલી ભૂમિકાથી આ તદ્દન જુદી જ છે. આ પાત્ર અત્યંત રસપ્રદ છે. તે કોઈ સામાન્ય પ્રકારનો જાસૂસ નથી, પણ એક નિષ્ક્રિય પોલીસ છે.

તારક મહેતા…ના દયાભાભીએ પુત્રને જન્મ આપ્યો

લોકપ્રિય ટીવી સિરિયલ તારક મેહતા કા ઊલ્ટા ચશ્મામાં દયાબેનનું ભજવનાર દિશા વાકાણીએ તાજેતરમાં પુત્રને જન્મ આપ્યો છે. તેમના પતિ મયૂર પડિયા અને ભાઈ મયૂર વાકાણીએ આ સમાચારની પુષ્ટિ કરી છે. મયૂરે જણાવ્યું હતું કે, ફરી એક વખત મામા બન્યો હોવાથી તે ખૂબ ખુશ છે. આ સીરિયલમાં ફરીથી જોડવાના સમાચાર છે ત્યારે જ તેમનાં પરિવારમાં વધુ એક ખુશીના સમાચાર આવ્યા છે. જોકે, પુત્રના જન્મના કારણે સીરિયલમાં દિશાનું કમબેક થોડા સમય માટે અટકે તેવી સંભાવના છે. સીરિયલમાં સુંદરમામાનું પાત્ર ભજવી રહેલા મયુર વાકાણીએ જણાવ્યું હતું કે, 2017માં દિશાએ પુત્રીને જન્મ આપ્યો હતો. હવે ફરી વખત દિશા માતા બન્યા છે.