એશિયાની વિકાસશીલ અર્થતંત્રોમાં દાયકા કરતા વધુ લાંબા સમયથી ચાલી રહેલા નીચા ફુગાવાનો તબક્કો હવે સમાપ્ત થવાની તૈયારી છે અને આ દેશોએ તેના પરિણામોનો સામનો કરવો પડશે, એમ ગ્લોબલ રેટિંગ એજન્સી મૂડીઝે જણાવ્યું હતું. અમેરિકા સહિતના વિકસિત દેશોમાં વ્યાજદરમાં વધારાની અસર વિકાસશીલ દેશો પર થશે. કોરોના મહામારીની અસરો તથા રશિયા અને યુક્રેન વચ્ચે યુદ્ધને કારણે સપ્લાય સામે અવરોધ છે અને આ દેશોમાં માગ વધી રહી છે. મૂડીઝના રિસર્ચના રિપોર્ટમાં જણાવ્યુ છે કે, એશિયાની ઇમર્જિંગ ઇકોનોમીમાં ધીમે ધીમે મોંઘવારી દર વધવાની શરૂઆત થશે અને ત્યારબાદ તે એક ગંભીર સ્વરપ ધારણ કરતું દેખાશે. આ વધતી મોંઘવારીની અસર એશિયાના તમામ ઉભરતા બજારોમાં જોવા મળશે. એક દાયકા કરતા વધારે સમયથી થાઇલેન્ડ, વિયતનામ, મલેશિયા, ફિલિપાઇન્સ અને ચીન જેવા એશિયન દેશોમાં કન્ઝ્યુમર ફુગાવાનો દર અત્યંત નીચા સ્તરે રહ્યો છે.

તાજેતરના સમયગાળામાં ફ્લાઇટ્સમાં ટેકનિકલ ખામીઓની સંખ્યામાં વધારો થતાં ભારતના એવિયેશન રેગ્યુલેટર ડાયરેક્ટર જનરલ ઓફ સિવિલ એવિયેશન્સ (DGCA)એ આકરું વલણ અપનાવીને એરલાઈન કંપની સ્પાઈસજેટને આગામી આઠ સપ્તાહ સુધી ફ્લાઈટ્સની સંખ્યા અડધી કરવાનો બુધવાર (27 જુલાઈ)એ આદેશ આપ્યો હતો. સ્પાઇસજેટની ફ્લાઇટ્સમાં 18 દિવસમાં ઓછામાં ઓછા આઠ ટેકનિકલ ખામી સર્જાઈ હતી. DGCAના આદેશમાં જણાવાયું છે કે, સલામત અને ભરોસાપાત્ર એર ટ્રાન્સપોર્ટ સેવા ચાલુ રાખવા માટે સ્પાઈસજેટ દ્વારા સબમિટ કરવામાં આવેલ વિવિધ સ્પોટ ચેક, ઈન્સ્પેક્શન અને શો કોઝ નોટિસના જવાબને ધ્યાનમાં રાખીને આઠ અઠવાડિયાના સમયગાળા માટે સ્પાઈસજેટની ફ્લાઈટ્સની સંખ્યા મંજૂર કરાયેલી ફ્લાઈટ્સ સંખ્યાના 50% સુધી મર્યાદિત રહેશે. આ આઠ સપ્તાહ દરમિયાન એરલાઇન એનહાન્સ્ડ સર્વેલન્સ હેઠળ રહેશે.

ગૂગલ મેપ્સે બુધવાર (27)એ ભારતના 10 શહેરો માટે તેની પેનોરેમિક સ્ટ્રીટ વ્યૂ સર્વિસ લોન્ચ કરી છે. પ્રથમ પ્રયાસ સામે નિયમનકારી અવરોધ આવ્યાના 11 વર્ષ બાદ ગૂગલે ભારતની આઇટી કંપની ટેક મહિન્દ્રા અને જેનેસિસ સાથે ભાગીદારી કરીને આ સર્વિસ લોન્ચ કરી છે. આ દસ શહેરોમાં અમદાવાદ, બરોડા, બેંગલુરુ, ચેન્નાઇ, દિલ્હી, મુંબઈ, હૈદરાબાદ, પૂણે, નાશિકનો સમાવેશ થાય છે. વિશ્વભરની સ્ટ્રીટના 360 ડિગ્રી વ્યૂ ઓફર કરતા આ ફીચર સામે ઘણા દેશોમાં પ્રાઇવેસીની ફરિયાદો થઈ છે અને તેનાથી નિયમનકારી અવરોધ આવ્યા છે.

વિશ્વના ઇકોનોમી પાવરહાઉસ ગણાતા અમેરિકાના અર્થતંત્રમાં એપ્રિલ-જૂન દરમિયાન સતત બીજા ક્વાર્ટર ઘટાડો થયો છે, એમ ગુરુવારે સરકારી ડેટામાં જણાવાયું હતું. સતત બીજા ક્વાર્ટરમાં જીડીપીમાં ઘટાડાને પગલે મંદીનો ભય વધુ ઘેરો બન્યો હતો. 43 વર્ષમાં સૌથી વધુ મોંઘવારીને ડામવા માટે ફેડ દ્વારા અપનાવવામાં આવેલ કડક નીતિને આ નકારાત્મક વૃદ્ધિદર માટે જવાબદાર ગણવામાં આવે છે. ચાલુ વર્ષના બીજા ક્વાર્ટરમાં જીડીપીમાં 0.9 ટકા ઘટાડો થયો હતો. વર્ષના પ્રથમ ત્રણ મહિનામાં પણ જીડીપીમાં મોટો ઘટાડો થયો હતો, એમ કોમર્સ વિભાગના ડેટામાં જણાવાયું હતું.

શર્મિલા ટાગોરે રાજેશ ખન્ના સાથે કામ કરવાનું કેમ બંધ કર્યું હતું?

બોલીવૂડના પ્રથમ સુપરસ્ટાર સ્વ. રાજેશ ખન્નાની દસમી પૂણ્યતિથિ તાજેતરમાં હતી. લાંબો સમય બીમાર રહ્યા પછી, રાજેશ ખન્નાનું નિધન થયું હતું. તેમની સાથે અનેક સફળ ફિલ્મોમાં કામ કરનાર પીઢ અભિનેત્રી શર્મિલા ટાગોરે રાજેશ ખન્ના સાથેની અનેક અનોખી વાતો જણાવી હતી. જેમાં તેમણે રાજેશ ખન્ના ઉર્ફે ‘કાકા’ ના સ્વભાવ, કામ કરવાની સ્ટાઈલ અને સબંધો માટેના આગવા અભિગમ વિશે જણાવ્યું હતું. શર્મિલા ટાગોરે કહ્યું હતું કે, એક સમયે હું રાજેશ ખન્નાથી નારાજ હતી. તેઓ સવારે 9 વાગ્યાની શિફ્ટમાં 12 વાગે પહોંચતા હતા અને તેમના કારણે સમગ્ર ફિલ્મ ક્રૂનો સમય ખરાબ થતો હતો. હું જાણતી હતી કે, અમારા બંનેની જોડીને લોકો ખૂબ જ પસંદ કરતા હતા પણ તેમના મોડા આવવાની ટેવના કારણે મેં તેમની સાથે ફિલ્મો કરવાનું બંધ કર્યું હતું અને બીજા એક્ટર્સ સાથે કામ કરવાનું શરુ કર્યું હતું.

‘બડે મિયાં છોટે મિયાં’નું શૂટિંગ સ્કોટલેન્ડ-યુરોપમાં થશે

ગત વર્ષના અંતમાં બોલિવૂડની અત્યાર સુધીની સૌથી મોંઘી ફિલ્મની જાહેરાત કરવામાં આવી હતી. જેમાં જુદા-જુદા સમયના બે એક્શન સુપર સ્ટાર્સ જોવા મળશે. આ ફિલ્મનું નામ ‘બડે મિયાં છોટે મિયાં’ રાખવામાં આવ્યું છે. અક્ષયકુમાર અને ટાઈગર શ્રોફને ચમકાવનારી આ ફિલ્મનું બજેટ રૂપિયા 350 કરોડની આસપાસ છે. જેનું દિગ્દર્શન અલી અબ્બાસ ઝફર કરશે. આ ફિલ્મનો ફર્સ્ટ લૂક પણ રિલીઝ કરવામાં આવ્યો છે. જેમાં ટાઈગર અને અક્કી ધમાકેદાર એક્શન સિક્વન્સ પરફોર્મ કરતા નજર આવ્યા હતા. હવે, આ ફિલ્મના બજેટ મુજબ, ફિલ્મને પણ યુરોપના વિવિધ લોકેશન્સ પર શૂટ કરવાની તૈયારી કરવામાં આવી છે અને તે ત્યાં તપાસ કરવા માટે પણ ટીમ જશે.

મિકા સિંહને મળી ગઈ તેની જીવનસાથી

જાણીતા ગાયક મિકા સિંહે પોતાની જીવનસાથીને પસંદ કરવા માટે એક સ્વયંવર રચ્યો હતો અને તે સ્ટાર ભારત ચેનલ પર દર્શાવવામાં આવ્યો હતો. આ શો દ્વારા અનેક યુવતીઓ મિકાને પોતાનો જીવનસાથી બનાવવા પહોંચી હતી. જોકે બાજી તો કોઈ બીજું જ મારી ગયું છે. એ બીજું કોઈ નહીં, પરંતુ મિકાની જ બેસ્ટ ફ્રેન્ડ આકાંક્ષા પુરી છે. આકાંક્ષાની સાથે પ્રંતિકા દાસ અને નીત મહલ ફાઇનલ રાઉન્ડમાં હતી. મિકાએ આ ત્રણમાંથી આકાંક્ષાને જીવનસાથી તરીકે પસંદ કરી છે. આ બન્ને એક દાયકા કરતાં પણ વધુ સમયથી એકબીજાને ઓળખે છે.

ગીત ગાવાની શોખીન તારા સુતરિયા

બોલીવૂડની યુવા અભિનેત્રી તારા સુતરિયા કહે છે કે તેને ગીતો ગાવાનો ખૂબ જ શોખ છે. તેને હંમેશાં ફિલ્મોમાં ગીતો ગાવાની ઇચ્છા હોય છે. તેની નવી ફિલ્મ ‘એક વિલન રિટર્ન્સ’માં તેણે અભિનયની સાથે જ ગીત પણ ગાયું છે. તે બાળપણથી જ ગીત ગાવામાં માહેર છે. ‘એક વિલન રિટર્ન્સ’માં તેણે ‘શામત’ ગીત ગાયું છે. આ ફિલ્મનું દિગ્દર્શન મોહિત સૂરીએ કર્યું છે. આ ફિલ્મમાં તેની સાથે અર્જુન કપૂર, દિશા પટની અને જોન એબ્રાહમ પણ મુખ્ય ભૂમિકામાં છે. પોતાના શોખ અંગે તેણે કહ્યું કે, ‘મારી હંમેશાંથી ઇચ્છા રહી છે કે હું મારી ફિલ્મોમાં ગીત ગાઉં. મોહિત સર સાથે મારી અઢી વર્ષ અગાઉ મુલાકાત થઈ હતી.