યુકે અને ભારત વચ્ચે મુક્ત વેપાર સમજૂતી (એફટીએ)ને આખરી ઓપ આપવા માટે બંને દેશોના અધિકારીઓ તડામાર કામગીરી કરી રહ્યાં છે અને બંને દેશોને દિવાળી સુધીની મહેતલ સુધી આ મહત્ત્વકાંક્ષી સમજૂતી કરવાનો ઊંચો આશાવાદ પ્રવર્તે છે. ભારત ખાતેના બ્રિટિશ હાઇ કમિશનર એલેક્સ એલિસે એક ઇવેન્ટમાં મંગળવાર 20 સપ્ટેમ્બરે જણાવ્યું હતું કે દિવાળીની ઉજવણી કરવાનો શ્રેષ્ઠ માર્ગ ભારત અને યુકે વચ્ચે સારી મુક્ત વેપાર સમજૂતી હશે. દિવાળી સુધી એફટીએ થવાની ઊંચી આશા છે. તે શુભતારીખ પણ છે. એફટીએના સંદર્ભમાં ભારત માટે દિવાળી ધમાકાની ધારણા રાખી શકાય કે નહીં તેવા પ્રશ્વનના જવાબમાં તેમણે જણાવ્યું હતું કે હું આવી આશા રાખીશું. ભારતના વેપાર પ્રધાન પીયૂષ ગોયલે પણ નવી દિલ્હીમાં 20 સપ્ટેમ્બરે જણાવ્યું હતું કે યુકે અને ભારત એફટીએ માટે દિવાળીની ડેડલાઇન માટે ઝડપથી કામગીરી કરી રહ્યાં છે.

ભારતના દિગ્ગજ ઉદ્યોગપતિ રતન ટાટાને વડાપ્રધાન મોદીએ પીએમ કેર્સ ફંડના ટ્રસ્ટી તરીકે નિયુક્ત કર્યા છે. આ ઉપરાંત સુપ્રીમ કોર્ટના ભૂતપૂર્વ જસ્ટિસ કેટી થોમસ અને લોકસભાના ભૂતપૂર્વ ડેપ્યુટી સ્પીકર કરિયા મુંડાને પણ પીએમ કેર્સ ફંડના ટ્રસ્ટી બનાવાયા છે, એમ સરકારે બુધવાર સત્તાવાર નિવેદનમાં જણાવ્યું હતું. 2020ના કોરોના કેર વખતે પીએમ કેર્સ ફંડની રચના કરવામાં આવી હતી. તેના અધ્યક્ષ વડાપ્રધાન મોદી પોતે છે. અહેવાલ અનુસાર દેશના બીજા કેટલાક જાણીતા વ્યક્તિઓને પણ એડવાઈઝર ગ્રુપમાં સ્થાન અપાયું છે. જેમાં ભૂતપૂર્વ સીએજી રાજીવ મહર્ષિ, ઈન્ફોસિસ ફાઉન્ડેશનના ભૂતપૂર્વ ચેરમેન સુધા મૂર્તિ, પિરામલ ફાઉન્ડેશનના ભૂતપૂર્વ સીઈઓ આનંદ શાહનો સમાવેશ થાય છે. મંગળવારે પીએમ મોદીની અધ્યક્ષતામાં પીએમ કેરના ટ્રસ્ટી બોર્ડની બેઠક યોજાઈ હતી. તેમાં ગૃહ પ્રધાન અમિત શાહ અને નાણા પ્રધાન નિર્મલા સિતારમન પણ હાજર રહ્યા હતા.

વર્ક ફ્રોમ હોમની સુવિધાને પગલે ભારતની આઇટી કંપનીઓમાં ઘણા કર્મચારીઓ મુનલાઈટિંગ કરતા હોવાની સમસ્યા ઊભી થઈ છે. મુનલાઇટિંગ એટલે નોકરીના કલાકો પૂરા થયા પછી પછી બીજી કંપનીઓ માટે કામ કરવું અને વધારાની કમાણી કરવી. મુનલાઇટિંગ અંગે હવે IT કંપનીઓ કડક બની છે અને બીજા માટે કામ કરનારા કર્મચારીઓને તાત્કાલિક અસરથી છૂટી કરી રહી છે. વિપ્રોએ પણ તાજેતરમાં આ કારણથી 300 લોકોને નોકરીમાંથી કાઢી મુક્યા છે. વિપ્રોના એક્ઝિક્યુટિવ ચેરમેન રિશદ પ્રેમજીએ બુધવારે આ વાતની જાહેરાત કરી હતી.

પશ્ચિમી દેશોના વિરોધ છતાં ભારતે રશિયામાંથી ડિસ્કાઉન્ટ ભાવે ક્રૂડ ઓઇલની કરીને આશરે રૂ.35,000 કરોડની બચત કરી હોવાનો અંદાજ છે. ભારતે આ વર્ષના પ્રથમ 3 મહિનામાં રશિયા પાસેથી 6.6 લાખ ટન ક્રૂડ ઓઈલની આયાત કરી હતી. બીજા 3 મહિનામાં તે વધીને 84.2 મિલિયન ટન થઈ ગયું. આ દરમિયાન રશિયાએ પણ પ્રતિ બેરલ 30 ડોલરનું ડિસ્કાઉન્ટ આપ્યું હતું. તેના કારણે પ્રથમ 3 મહિનામાં એક ટન ક્રૂડ ઓઈલની આયાતનો ખર્ચ લગભગ 790 ડોલર થયો હતો. ત્યારબાદ બીજા 3 મહિનામાં તે ઘટીને 740 ડોલર રહી ગઈ હતી. આમ ભારતને કુલ 3,500 કરોડ રૂપિયાનો ફાયદો થયો છે. આ સમયગાળામાં અન્ય સ્ત્રોતો પરથી આયાતનો ખર્ચ વધ્યો હતો. 2022માં રશિયામાંથી સસ્તા તેલની આયાતમાં 10 ગણો વધારો થયો છે.

વીતેલા યુગની અભિનેત્રી આશા પારેખને દાદાસાહેબ ફાળકે એવોર્ડ

ભારત સરકારે બોલીવુડના પીઢ ગુજરાતી અભિનેત્રી આશા પારેખને 2020 માટેનો રાષ્ટ્રીય દાદા સાહેબ ફાળકે એવોર્ડ એનાયત કરવાનો નિર્ણય કર્યો છે. આ ઇન્ડિયન ફિલ્મ ઇન્ડસ્ટ્રીનો સર્વોચ્ચ અવોર્ડ છે. કેન્દ્રીય માહિતી અને પ્રસારણ પ્રધાન અનુરાગ ઠાકુરે મંગળવારે દિલ્હીમાં આ અંગેની જાહેરાત કરી હતી. 79 વર્ષના આશા પારેખને 68મા નેશનલ ફિલ્મ અવોર્ડ દરમિયાન દાદા સાહેબ ફાળકે અવોર્ડથી સન્માનિત કરવામાં આવશે. આશા પારેખ બોલીવુડના સુવર્ણયુગ ગણાતા બ્લેક એન્ડ વાઈટ યુગથી માંડીને રંગીન ફિલ્મો સુધીના આધુનિક યુગના સાક્ષી રહ્યા છે. તેમની જાણીતી ફિલ્મોમાં કટી પતંગ, કારવા.

આયેશા ઝુલ્કા – જુહી ચાવલાનું ડિજિટલ ડેબ્યુ

આજથી વીસેક વર્ષ અગાઉ બોલીવૂડમાં જાણીતી બનેલા કલાકારો અત્યારે ફિલ્મોમાં ઓછા જોવા મળે છે. તેઓ પોતાનું કામ આગળ વધારવા માટે નવા જમાનાના ડિજિટલ માધ્યમનો ઉપયોગ કરી રહ્યા છે. ડિજિટલ ક્ષેત્ર-વેબસીરિઝ થકી તેઓ પોતાનું નસીબ અજમાવી રહ્યા છે અને તેમને તેમાં સારું કામ પણ મળી રહ્યું છે. માધુરી દીક્ષિત, રવિના ટંડન તથા કાજોલ સહિતની અભિનેત્રીઓ આ ક્ષેત્રમાં આવી ચુકી છે. અનેક અભિનેત્રીઓ તો એવું પણ માને છે કે, તેમના સમયમાં બનતી ચોક્કસ પ્રકારની ફોર્મ્યુલા આધારિત ફિલ્મોને કારણે તેમની અભિનય ક્ષમતાનો યોગ્ય ઉપયોગ થયો જ નથી અને હવે તેઓ વેબસીરીઝમાં પડકારરૂપ ભૂમિકાઓ ભજવીને ખુશ થઇ રહી છે.

હવે બોબી દેઓલે નવા પ્રોજેક્ટની તૈયારી શરૂ કરી

હીમેન- ધર્મેન્દ્ર પુત્ર બોબી દેઓલ ભલે છેલ્લા એક દાયકાથી સિનેમામાં જોવા મળ્યો નથી પરંતુ તે તેની આશ્રમ-3 વેબસીરિઝથી વધુ ચર્ચામાં છે. તાજેતરમાં જ આવેલી તેની આશ્રમ-3 પણ સફળ રહી હતી. તેણે ફિલ્મ બરસાતથી બોલીવૂડમાં પદાર્પણ કર્યું હતું. પછી ગુપ્ત, સોલ્જર, બાદલ અને બિચ્છુ જેવી ફિલ્મોમાં તેણે કામ કર્યું હતું. જોકે, તે શરૂઆતની ફિલ્મોમાં થોડો સફળ થયો હતો પણ પછીથી તે નિષ્ફળ થતો ગયો. પ્રકાશ ઝાની આશ્રમ સીરિઝે તેને નવી ઓળખ આપી. હાલમાં આશ્રમની ત્રણેય સીરિઝ સફળ રહી છે અને હવે તેના ચાહકો આશ્રમ-4ની રાહ જોઇ રહ્યા છે અને આ તરફ બોબી તેનો નવો પ્રોજેક્ટ ‘શ્લોકઃ ધ દેશી શરલોક’ લઇને આવી રહ્યો છે.

હવે આશિકીની ત્રીજી રીમેક બનશે

1990ના દાયકાની મ્યુઝિકલ સુપરહિટ આશિકી સિરીઝની ત્રીજી ફિલ્મ બનાવવાની જાહેરાત નિર્માતાઓ દ્વારા કરવામાં આવી છે. આ ફિલ્મમાં કાર્તિક આર્યનને મુખ્ય ભૂમિકા ભજવવા માટે સાઇન કરવામાં આવ્યો છે. કાર્તિકની કરીઅર અત્યારે સડસડાટ રીતે આગળ વધી રહી છે. થોડા દિવસ અગાઉ જ તેની ગુજરાતી બેકગ્રાઉન્ડ ધરાવતી ફિલ્મ સત્ય પ્રેમ કી કથાનું શૂટિંગ શરૂ થયું છે. આશિકી પ્રથમવાર 1990માં બની હતી. મહેશ ભટ્ટનાં દિગ્દર્શનમાં બનેલી આ ફિલ્મના મુખ્ય કલાકારો રાહુલ રોય અને અનુ અગ્રવાલ હતા, આ તદ્દન નબળી ફિલ્મનું મ્યુઝિક સુપરહિટ થયું હતું અને તેનાથી નદીમ-શ્રવણ સંગીતકાર તરીકે તથા કુમાર શાનુ ગાયક તરીકે ખૂબ જ લોકપ્રિય બની ગયા હતા.