યુરોપિયન સેન્ટ્રલ બેંક (ECB)એ 27 જુલાઈના રોજ વ્યાજ દરોમાં 0.25 ટકાનો વધારો કરતાં યુરોપમાં વ્યાજદરો 23 વર્ષમાં તેમના સર્વોચ્ચ સ્તરે પહોંચ્યાં હતા. બીજી તરફ અમેરિકાની ફેડરલ રિઝર્વે પણ બુધવારે વ્યાજદરમાં 0.25 ટકાનો વધારો કરતાં વ્યાજદરો 2001 પછીના સર્વોચ્ચ સ્તરે પહોંચ્યા હતા. ECBએ સતત નવમી વખત વ્યાજદરમાં વધારો કરતાં હવે વ્યાજદરો 3.75 ટકા થઈ ગયા હતા. જે 2001 પછીનું તેનું સર્વોચ્ચ સ્તર છે. અમેરિકામાં ફેડરલ રિઝર્વે બુધવારે તેના બેન્ચમાર્ક લેન્ડિંગ રેટમાં 0.25 ટકાનો વધારો કર્યો હતો. આની સાથે અમેરિકામાં વ્યાજદર 2001 પછીની સૌથી સ્તરે પહોંચ્યા હતા.

1990ના દાયકામાં આર્થિક ઉદારીકરણ પછી અનેક વિદેશી FMCG કંપનીઓનો ભારતમાં આવી છે, પરંતુ 94 વર્ષ જૂની પારલે બ્રાન્ડની લોકપ્રિયતા હજુ પણ અકબંધ છે, એમ તાજેતરના એક સરવેમાં બહાર આવ્યું છે. આ બ્રાન્ડ વિદેશી બ્રાન્ડ્સને પણ હંફાવી રહી છે. ભારતમાં સૌથી વધુ પસંદ કરવામાં આવતી કન્ઝ્યુમર બ્રાન્ડ્સના રેન્કિંગમાં પાર્લે પ્રોડક્ટ્સેને ટોચનું સ્થાન મળ્યું છે. પારલે પ્રોડક્ટ્સની સ્થાપના 1929માં થઈ હતી. પારલે-જી બિસ્કિટથી જાણીતી બ્રાન્ડ સળંગ 11 વર્ષથી ટોચનું સ્થાન જાળવી રહી છે. ત્યાર પછીના ક્રમે બ્રિટાનિયા, અમૂલ, ક્લિનિક પ્લસ અને ટાટા કન્ઝ્યુમર પ્રોડ્ક્ટસ આવે છે.

ભારત સરકારે ગુજરાતમાં નવા ફાઇનાન્શિયલ હબમાં કંપનીઓના શેરના લિસ્ટિંગને મંજૂરી આપી છે. તેનાથી ભારતીય કંપનીઓ સસ્તુ વિદેશી ફંડ સરળતાથી એકત્ર કરી શકશે, એમ કેન્દ્રીય કેન્દ્રીય નાણાપ્રધાન નિર્મલા સીતારામને જણાવ્યું હતું. અત્યાર સુધી ભારતની કંપનીઓ માત્ર ડિપોઝિટરી રિસિટ્સ મારફત વિદેશી શેરબજારોમાં લિસ્ટિંગ કરાવી શકતી હતી. લિસ્ટેડ અને અનલિસ્ટેડ કંપનીઓ ગુજરાત ઈન્ટરનેશનલ ફાઈનાન્સિયલ ટેક સિટી (GIFT)માં સ્થિત ઈન્ટરનેશનલ ફાઈનાન્સિયલ સર્વિસ સેન્ટર (IFSC)માં તેમના શેરનું લિસ્ટિંગ કરાવી શકશે.

ભારતની જાણીતી આઈટીસી લિમિટેડ કંપનીએ તાજેતરમાં જણાવ્યું હતું કે, તે તેનો હોટેલ બિઝનેસ અલગ કરશે અને આઈટીસી હોટેલ્સ લિમિટેડ નામની સંપૂર્ણ સબસિડિયરી કંપની બનાવશે. તેના કારણે કંપની યોગ્ય રોકાણકારોને અને સ્ટ્રેટજિક પાર્ટનર્સને આકર્ષી શકશે. કંપનીએ જણાવ્યું હતું કે, હોટેલ બિઝનેસ હવે વૃદ્ધિ પામી રહ્યો છે. આઈટીસીએ રેગ્યૂલેટરી ફાઈલિંગમાં કહ્યું હતું કે ‘કંપનીના બોર્ડની 24 જુલાઈએ મીટિંગ મળી હતી જેમાં હોટેલ બિઝનેસ માટેના વિવિધ વૈકલ્પિક સ્ટ્રક્ચર્સ વિશે સમીક્ષા કરીને હોટેલ બિઝનેસને અલગ કરવાની સૈદ્ધાંતિક મંજૂરી આપવામાં આવી હતી.

જેકી શ્રોફ અને સુભાષ ઘાઇ ફરીથી સાથે

બોલીવૂડના શોમેન-ફિલ્મકાર સુભાષ ઘાઇ ઓકટોબરમાં પોતાની નવી ફિલ્મ સલાખેનું શૂટિંગ શરૂ કરવાના છે. જેમાં જેકી શ્રોફ મહત્વના રોલમાં કામ કરતો જોવા મળશે. આ ફિલ્મની જાહેરાત થતાં જ લોકો માનવા લાગ્યા હતા કે, આ ફિલ્મ ખલનાયકની સિકવલ બની રહી છે. જેમાં જેકીએ રામકુમાર નામના એક ઇમાનદાર પોલીસ ઓફિસરની ભૂમિકા ભજવી હતી. જોકે, જેકીએ આ ફિલ્મ ખલનાયકની સીકવલ છે કે નહીં તે વિશે જણાવ્યું હતું કે, મને નથી લાગતું કે આટલા લાંબા સમય પછી ખલનાયકની સીકવલ ફિલ્મ બનવી શક્ય છે.

શાંતિપ્રિયાનો અક્ષયકુમાર પર મદદ નહીં કરવાનો આરોપ

હિન્દી ફિલ્મોમાં એવા ઘણા નામ છે જે ક્યારે આવ્યા અને ક્યારે ગાયબ થઇ ગયા તેની કોઈને ખબર પણ નથી રહી. આવા જુદા જુદા નામોમાં શાંતિપ્રિયાનું નામ લેવામાં આવે છે. અક્ષયકુમારની પ્રથમ ફિલ્મ ‘સોગંદ’ માં શાંતિપ્રિયા મુખ્ય ભૂમિકામાં હતી. હવે શાંતિપ્રયાએ અક્ષયકુમાર પર ગંભીર આરોપો લાગાવ્યા છે જેને કારણે બોલીવૂડમાં ચર્ચા જાગી છે, કારણ કે, શાંતિપ્રિયાએ જ્યારે બોલીવૂડમાં ફરીથી કામ કરવાની ઈચ્છા દર્શાવી હતી ત્યારે અક્ષયકુમારે તેને વચન આપ્યું હતું કે તે મદદ કરશે, પરંતુ અક્ષયે આ વચન પાળ્યું નહીં અને શાંતિપ્રયાને કોઈ પણ પ્રકારનો જવાબ આપ્યો પણ નહિ !

હવે પરવીન બાબીની બાયોપિક બનશે

ગત મહિને કાન ફેસ્ટિવલ દરમિયાન રૂ. 276 કરોડનો નેકલેસ પહેરીને છવાઈ ગયેલી ઉર્વશી રાઉતેલાએ થોડા સમય પહેલા મુંબઈ ખાતે રૂ.190 કરોડનો બંગલો ખરીદ્યો હતો. જીવનમાં સફળતાના શિખરો સર કરી રહેલી ઉર્વશીને બોલિવૂડમાંથી પણ સારા સમાચાર મળ્યા હતા. એક સમયની આકર્ષક અભિનેત્રી પરવીન બાબીની બાયોપિક બનવાની છે, જેમાં મુખ્ય ભૂમિકા માટે ઉર્વશીની પસંદગી કરવામાં આવી છે. ઉર્વશીએ સોશિયલ મીડિયા પર પોસ્ટ કરીને પોતે ગર્વ અનુભવતી હોવાનું જણાવ્યું છે. તેણે સોશિયલ મીડિયામાં પરવીન બાબીનો અને પોતાનો ફોટોગ્રાફ પોસ્ટ કર્યો છે. બોલિવૂડમાં પાછલા કેટલાક સમયથી બાયોપિકનો પવન ચાલી રહ્યો છે. અત્યાર સુધી ઘણાં સ્ટાર્સ બાયોપિકમાં કામ કરી ચૂક્યા છે.

રીટા રીપોર્ટર અને રોશનભાભી નવા શોમાં સાથે દેખાશે

ઘરે ઘરે લોકપ્રિય બનેલા તારક મહેતા કા ઉલટા ચશ્મા શો ઘણી બાબતોમાં ચર્ચામાં રહે છે. અગાઉ શોમાં કામ કરી ચૂકેલી અભિનેત્રી જેનિફર મિસ્ત્રીએ શો ના નિર્માતા પર ઘણા ગંભીર આરોપ લગાવ્યા હતા. જેનિફર પછી શો માં રીટા રિપોર્ટરનું કામ કરી ચૂકેલી અભિનેત્રી પ્રિયા આહુજાએ પણ શો ના મેકર્સ પર ઘણા આરોપ લગાવ્યા હતા. હવે એવું લાગી રહ્યું છે કે પ્રિયા આહુજા અને જેનિફર મિસ્ત્રી કોઈ નવા શો માટે એક સાથે આવી ગયા છે. પ્રિયાએ એક વીડિયો શેર કર્યો છે. આ વીડિયોમાં બંને એક્ટ્રેસને લાવણી કરતી જોઈ શકાય છે. બંનેના ડાન્સિંગને ચાહકો ખૂબ પસંદ કરી રહ્યા છે. પ્રિયા અને પોતાનો મેકઅપ જેનિફરે જાતે જ કર્યો છે. બંને એક્ટ્રેસ મરાઠી લૂકમાં ખૂબ સ્ટાઈલિશ લાગી રહી છે. બંને એક્ટ્રેસને સાથે ચાહકો ખૂબ પસંદ કરી રહ્યા છે.