યુક્રેન પર આક્રમણને પગલે પશ્ચિમના દેશોએ રશિયા પર મૂકેલા આર્થિક પ્રતિબંધોને પગલે વિશ્વની સંખ્યાબંધ દિગ્ગજ કંપનીઓએ રશિયાના બજારમાંથી ઉચાળા ભરવાની જાહેરાત કરી દીધી છે. આવી કંપનીઓમાં એનર્જી કંપનીઓ બીપી, શેલ, એક્ઝોમોબિલ, ઓટો કંપનીઓ વોલ્વો, ફોર્ડ, હાર્લી ડેવિડસન, રેનો, શરાબ કંપનીઓ બુડવાર, કાર્લ્સબર્ગ, વિશ્વની સૌથી મોટી શિપિંગ કંપની એ પી મોલર-મર્ક, વિમાન કંપનીઓ બોઇંગ અને એરબસ તથા એન્ટરટેઇનમેન્ટ કંપની વોનર્સ બ્રધર્સ, વોલ્ટ ડિઝની, સોની પિક્ચર, ટેકનોલોજી કંપનીઓ એપલ, ડેલ, ગૂગલ, ટિકટોક, વગેરેનો સમાવેશ થાય છે. યુક્રેન પરના હુમલાને કારણે એપલથી લઇને ફોર્ડ અને બીપી સહિતની વિશ્વની સૌથી વધુ જાણીતી કંપનીઓને રશિયાના બજારમાંથી નીકળી જવાની ફરજ પડી રહી છે. આ કંપનીઓ પોતાના પ્રતિષ્ઠા જાળવી રાખવા અને કોર્પોરેટ સોશિયલ રિસ્પોન્સિબિલિટીના ધોરણોનું પાલન કરવા માટે આ નિર્ણય કર્યો છે.

યુક્રેન પર રશિયાના આક્રમણને પગલે પશ્ચિમી દેશોએ લાદેતા પ્રતિબંધને પગલે રશિયાની સૌથી મોટી બેન્ક સ્બેરબેન્કે યુરોપિયન માર્કેટમાંથી એક્ઝિટ લેવી પડી છે. બેન્કે અસાધારણ કેશ આઉટફ્લો તથા તેના કર્મચારીઓ અને બ્રાન્ચ સામેના જોખમનું કારણ આપીને આ જાહેરાત કરી હતી. રશિયન ન્યૂઝ એજન્સીએ બેન્કના નિવેદનને ટાંકીને જણાવ્યું હતું કે હાલની સ્થિતિમાં સ્બેરબેન્કે યુરોપના બજારમાંથી નીકળી જવાનો નિર્ણય કર્યો છે.બેન્કની યુરોપ ખાતેની પેટાકંપનીઓમાંથી અસાધારણ કેશ આઉટફ્લો જોવા મળી રહ્યો છે. તેના કર્મચારીઓ અને બ્રાન્ચની સુરક્ષા સામે પણ જોખમ છે. રશિયાની બેન્કો માટે મૂડીબજારમાંથી નાણા મેળવવાનું મુશ્કેલ બનાવવાના ઉદ્દેશ સાથે યુરોપિયન યુનિયને આકરા નિયંત્રણો લાદ્યા હોવાથી બેન્ક નાણાકીય સમસ્યાનો સામનો કરી રહી છે.

અમેરિકાની દિગ્ગજ કંપની ફોર્ડે ભારતમાં તેનો સક્રિય બિઝનેસ બંધ કરી દીધો છે, પરંતુ વૈશ્વિક સ્તરે તેનું ઇન્ડિયા કનેક્ટ વધુ મજબૂત બન્યું છે. ફોર્ડે તેના નોન ઇલેક્ટ્રિક ઓટોમોબાઇલ બિઝનેસના ગ્લોબલ પ્રેસિડન્ટ તરીકે કુમાર ગલ્હોત્રાની નિમણૂકની જાહેરાત કરી છે. ગલ્હોત્રાનો જન્મ પંજાબમાં થયો હતો, તેઓ ફોર્ડના આશરે 100 બિલિયન ડોલરની વાર્ષિક આવક ધરાવતા આ બિઝનેસનું સુકાન સંભાળશે. ફોર્ડની આ જાહેરાત સાથે અમેરિકાની અગ્રણી કંપનીઓમાં ભારતીય મૂળના પ્રોફેશનલ્સની પકડ વધુ મજબૂત બની છે. ગલ્હોત્રાનો જન્મ ડિસેમ્બર 1965માં થયો હતો અને તેઓ ભારતમાં ઉછેર્યા હતા. તેમણે યુનિવર્સિટી ઓફ મિશિનગમાં મિકેનિકલ એન્જિનિયરિંગમાં બેચરલ ઓફ સાયન્સની ડિગ્રી હાંસલ કરી હતી. તેઓ આશરે 34 વર્ષથી ફોર્ડ સાથે જોડાયેલા છે.

ભારતમાં 30 મિલિયન ડોલર (આશરે રૂ.226 કરોડ) કે તેનાથી વધુની ચોખ્ખી એસેટ ધરાવતા અલ્ટ્રા-હાઇ નેટવર્થ ઇન્ડિવિડ્યુઅલની સંખ્યા ગયા વર્ષે 11 ટકા વધી છે. શેરબજારમાં તેજી અને ડિજિટલ ક્રાંતિને કારણે દેશમાં ધનિકોની સંખ્યામાં વધારો થયો છે, એમ નાઇટ ફ્રેન્સે જણાવ્યું હતું. ભારતમાં અલ્ટ્રા-હાઇ નેટવર્થ ઇન્ડિવિડ્યુઅલની સંખ્યા 2021માં વધીને 13,637 થઈ છે, જે અગાઉના વર્ષે 12,287 હતી. 2021માં બિલિયોનેર્સની સંખ્યાના સંદર્ભમાં ભારત વિશ્વમાં ત્રીજા સ્થાને હતું. અમેરિકા 748 બિલિનેર્સ સાથે પ્રથમ ક્રમે છે, જ્યારે ચીન 554 બિલિયોનેર્સ સાથે બીજા ક્રમે છે. ભારતમાં બિલિયોનેર્સની સંખ્યા 145 છે.પ્રોપર્ટી કન્સલ્ટન્સ નાઇક ફ્રેન્સના વેલ્થ રિપોર્ટ 2022માં જણાવ્યા અનુસાર વિશ્વમાં અલ્ટ્રા-હાઇ નેટવર્થ ઇન્ડિવિડ્યુઅલની સંખ્યા 9.3 ટકા વધીને 6,10,569 થઈ હતી, જે અગાઉના વર્ષે આશરે 5.48 લાખ હતી. નાઇટ ફ્રેન્કે એક નિવેદનમાં જણાવ્યું હતું કે ભારતમાં હાઇ નેટવર્થ ઇન્ડિવિડ્યુઅલની સંખ્યા વાર્ષિક ધોરણે 2021માં 11 ટકા વધી હતી, જે એપીએએસીમાં સૌથી વધુ વધારો છે.

આલિયા ભટ્ટનાં બોલીવૂડમાં 10 વર્ષ પૂર્ણ

યુવા અભિનેત્રી આલિયા ભટ્ટ અત્યારે તેની નવી ફિલ્મ ‘ગંગુબાઈ કાઠિયાવાડી’ માટે જોરદાર ચર્ચામાં રહી છે. તેની આ ફિલ્મનું બમ્પર ઓપનીંગ થયું છે અને તેની વ્યૂઅરશિપ વધી રહી છે. આ ફિલ્મે પ્રથમ અઠવાડિયામાં 39 કરોડથી વધુની કમાણી કરી હતી. આ ફિલ્મનું નિર્દેશન સંજય લીલા ભણસાલીએ કર્યું છે. આલિયાની સંજય લીલા ભણસાલી સાથે આ પ્રથમ ફિલ્મ છે . આલિયા બાળપણથી તેમની સાથે કામ કરવા ઈચ્છતી હતી અને એટલા માટે જ માત્ર નવ વર્ષની ઉંમરમાં તેમની ફિલ્મ ‘બ્લેક’ માટે પ્રથમ વખત ઓડિશન આપવા માટે પહોંચી ગઈ હતી, પરંતુ તેનું સિલેક્શન નહોતું થયું. આલિયાને જોઈને ભણસાલીએ એક ભવિષ્યવાણી કરી હતી જે હવે સાચી થતી જોવા મળે છે.

અક્ષય-ટાઇગર બન્યા બડે મિંયા છોટે મિંયા

અક્ષય કુમાર અને ટાઇગર શ્રોફ નવી ફિલ્મમાં સાથે જોવા મળશે. તેમની નવી ફિલ્મ બડે મિંયા છોટે મિંયાની જાહેરાત કરવામાં આવી છે. આ બન્ને કલાકારો એકશન અને સ્ટંટમાં માહેર હોવાથી આ ફિલ્મમાં ભરપૂર એકશન દ્રશ્યો જોવા મળશે. આ ફિલ્મની હિરોઇન વિશે હજી કોઇ જાહેરાત કરવામાં આવી નથી. ફિલ્મનું ટીઝર રજુ કરવામાં આવ્યું છે. જેમાં અક્ષય અને ટાઇગર સ્ટાઇલિશ રીતે ફાઇટ કરતા જોવા મળે છે. ટીઝરને વિદેશી ફિલ્મોને અનુસરીને બનાવામાં આવ્યું છે. આ ટીઝરમાં જોવા મળે છે કે, થોડી ફાઇટ પછી અક્ષય ટાઇગરને પૂછે છે કે, તુ અહીં શું કરી રહ્યો છે અને તારી કઇ ફિલ્મ આવવાની છે, ત્યારે ટાઇગર કહે છે કે, વર્ષ 2023માં ક્રિસમસમાં છોટે મિયાં. જ્યારે અક્ષય કહે છે કે, મારી બડે મિયાં રિલીઝ થવાની છે.

હવે કરીના ટીવી પડદે જોવા મળશે

કરીના કપૂર ખાન ટૂંક સમયમાં જ એક ટીવી સીરિયલમાં દેખાશે. સૂત્રોના જણાવ્યા અનુસાર, કરીના કપૂર ટીવી સીરિયલ ‘સ્પાય બહુ’થી નાના પડદા પર પદાર્પણ કરવા જઇ રહી છે. આ સીરિયલમાં એક દિલચસ્પ રોમાન્ટિક વાર્તા દર્શાવવામાં આવશે. સ્પાય બહુમાં સના સૈયદ અને સેહબાન આઝીમ પણ મુખ્ય ભૂમિકામાં જોવા મળશે. આ સીરિયલની વાર્તા એક મહિલા જાસૂસ અને એક સંદિગ્ધ આતંકવાદીની આજુબાજુ ફરતી રહેશે. કહાની એવી રીતે બનાવવામાં આવી છે કે આ લવ સ્ટોરી દર્શકોના દિલમાં વસી જશે. જોકે, કરીના કપૂર પહેલા રેખાએ પણ ટીવી સીરિયલ ‘ગુમ હૈ કિસી કે પ્યાર મેં’ અને મિથુન ચક્રવર્તીએ સીરિયલ ‘ચીકુ કી મમ્મી’માં ભૂમિકા ભજવી હતી.ટીવી સીરિયલના પ્રોમોમાં કરીના કપૂર વાર્તા સંભળાવતી દેખાશે. કરીના કપૂર પણ આ પ્રોજેક્ટને લઇને ખૂબ ઉત્સાહિત છે. એક ઇન્ટરવ્યુમાં કરીના કપૂરે કહ્યું હતું કે, તેને લવ સ્ટોરીઝ ખૂબ જ પસંદ છે. લવસ્ટોરીઝ બધાને પસંદ હોય છે.

બોલીવૂડનું યુક્રેન સાથે કનેક્શન

24 ફેબ્રુઆરી 2022ના રોજ જ્યારે રશિયાએ યુક્રેન પર હુમલો કર્યો હતો ત્યારે આખું વિશ્વ ચોંકી ગયું હતું.મહિનાઓથી ચાલી રહેલા તણાવની વચ્ચે રશિયન રાષ્ટ્રપતિ વ્લાદિમીર પુતિને યુક્રેન પર સૈન્ય હુમલો કર્યો હતો. પછી સતત એરસ્ટ્રાઈક અને ધમાકાની સતત ખબરોએ દુનિયા હચમચી ગઇ હતી. પરંતુ પોતાના સોંદર્યને કારણે યુક્રેન ભારતીય ફિલ્મોના શૂટિંગ માટે યુક્રેન પ્રથમ પસંદગીનો દેશ રહ્યો છે. સલમાન ખાનથી લઈને અક્ષયકુમાર સુધીની ફિલ્મો યુક્રેનમાં શૂટ કરવામાં આવી હતી. યુક્રેનમાં બોલિવૂડની અનેક ફિલ્મોનું શૂટિંગ કરવામાં આવ્યું હતું. આ ફિલ્મોમાં યુક્રેનના સુંદર લોકેશનનો ભરપૂર ઉપયોગ કરવામાં આવ્યો હતો. 2021માં કોવિડ-19 દરમિયાન રશિયા અને યુક્રેને ટૂરિસ્ટોને આવવાની મંજૂરી આપી હતી, જેના કારણે આરઆરઆરના મેકર્સે પણ કેટલાક સીનનું શૂટિંગ યુક્રેનમાં કર્યું હતું. સાવચેતીપૂર્વક સંપૂર્ણ આયોજન કરીને આરઆરઆરની ટીમ યુક્રેન ગઈ હતી અને આઈકોનિક નાટૂ નાટૂ… ગીતનું શૂટિંગ પણ ત્યાં જ કરવામાં આવ્યું હતું.