અનિલ અગ્રવાલની કંપની કંપની વેદાંતાએ તાઈવાનની કંપની ફોક્સકોન સાથે મળીને સેમીકન્ડક્ટર પ્લાન્ટ સ્થાપવા માટે ગુજરાતની પસંદગી કરી છે. વેદાંત છેલ્લી ઘડી સુધી મહારાષ્ટ્ર સરકાર સાથે વાટાઘાટ કરતી હતી અને સેમીકન્ડક્ટર પ્લાન્ટ સ્થાપવાનું નક્કી ગણાતું હતું, પરંતુ અચાનક કંપનીએ ગુજરાતમાં 1.5 લાખ કરોડના રોકાણ સાથે સેમીકન્ડક્ટર પ્લાન્ટ સ્થાપવાનો નિર્ણય લીધો છે. તેનાથી મહારાષ્ટ્રમાં શિવસેનાના નેતાઓ આક્ષેપ કર્યો હતો કે કેન્દ્ર સરકારને દબાણને પગલે આ પ્લાન્ટ મહારાષ્ટ્રની જગ્યાએ ગુજરાતને અપાયો છે.

ભારતીય રિઝર્વ બેન્કે (આરબીઆઇ)એ ભારતીય ચલણ રૂપિયામાં દ્વિપક્ષીય વેપાર કરવાનું વ્યવસ્થાતંત્ર જાહેર કર્યા પછી ઘણા દેશોએ ભારત સાથે ભારતીય ચલણમાં દ્વિપક્ષીય વેપાર કરવાનો રસ દર્શાવ્યો છે. સરકારે સંપૂર્ણ કેપિટલ એકાઉન્ટ કન્વર્ટિબિલિટી અંગે પણ પગલાં લીધા છે તેમ કેન્દ્રીય નાણા પ્રધાન સીતારમણને મંગળવારે જણાવ્યું હતું. એક સમીટ 2022માં નિર્મલા સીતારામને ઉમેર્યું હતું કે હવે જૂના ફોર્મેટમાં રૂબલ-રૂપીની વ્યવસ્થા નથી. હવે તે રૂપિયામાં દ્વિપક્ષીય વેપાર છે. રિઝર્વ બેન્કે મહત્ત્વના સમયે તેની જાહેરાત કરી છે.

મુકેશ અંબાણીના વડપણ હેઠળની રિલાયન્સ ઇન્ડસ્ટ્રીઝે અમેરિકાની કંપની સેન્સહોકનો 79.4 ટકા હિસ્સો 32 મિલિયન ડોલરમાં ખરીદવા માટે બંધનકર્તા સમજૂતી કરી છે, એમ કંપનીએ મંગળવારે જણાવ્યું હતું. 2018માં સ્થાપવામાં આવેલી સેન્સહોક કેલિફોર્નિયા સ્થિત સોલર એનર્જી જનરેશન ઇન્ડસ્ટ્રી માટે સોફ્ટવેર આધારિત મેનેજમેન્ટ ટુલ્સ ડેવલપ કરે છે. સેન્સહોકની સ્થાપના 2018માં થઈ હતી અને તે શરૂઆતના તબક્કાનું સ્ટાર્ટઅપ છે. સેન્સહોક સોલર પ્રોજેક્ટને ઝડપથી આગળ વધારવામાં અને તેની પ્રોસેસ તથા ઓટોમેશનના ઉપયોગને સ્ટ્રીમલાઈન કરવામાં મદદ કરે છે.

ભારત આર્થિક વિકાસ દરની વર્તમાન ગતિને જોતા ૨૦૨૯માં ત્રીજું મોટું અર્થતંત્ર બનવાની તૈયારીમાં છે, એમ એસબીઆઈના એક રિપોર્ટમાં જણાવાયું છે. યુકેને પછાડીને ભારત ડિસેમ્બર ૨૦૨૧માં જ પાંચમુ મોટું અર્થતંત્ર બની ગયું હતું. વૈશ્વિક જીડીપીમાં ભારતનો હિસ્સો હાલમાં ૩.૫૦ ટકા છે જે ૨૦૧૪માં ૨.૬૦ ટકા હતો. ૨૦૨૭માં વૈશ્વિક જીડીપીમાં ભારતનો હિસ્સો ૪ ટકા પહોચી જવાની પણ રિપોર્ટમાં અપેક્ષા વ્યકત કરવામાં આવી છે.

પાન નલિનની ગુજરાતી ફિલ્મ ‘છેલ્લો શો’ ઓસ્કર માટે નો‌મિનેટ

ગુજરાતી મૂળના હોલીવૂડના ફિલ્મ સર્જક અને એક્ટર પાન નલિનની આંતરાષ્ટ્રીય સ્તરે નામના મેળવનારી ફિલ્મ ‘છેલ્લો શો’ (અંગ્રેજી ટાઇટલ લાસ્ટ ફિલ્મ શો)ની ઓસ્કાર્સ 2023માં ભારતની સત્તાવાર એન્ટ્રી તરીકે પસંદ કરવામાં આવી છે. ફિલ્મને આગામી એકેડમી એવોર્ડસમાં બેસ્ટ ફોરેન ફિલ્મ કેટેગરી માટે નોમિનેટ કરાઈ છે. ફિલ્મ ફેડરેશન ઓફ ઇન્ડિયાએ મંગળવારે આ જાહેરાત કરી હતી. ભારત તરફથી આ વખતે આરઆરઆર અથવા કાશ્મીર ફાઈલ્સ ફિલ્મ ઓસ્કરમાં જઈ શકે છે તેવી અટકળો ચાલતી હતી. જોકે, ભારતીય ફિલ્મ ફેડરેશનની જ્યૂરીએ ‘છેલ્લો શો’ ની પસંદગી કરી છે.

સ્વરા ભાસ્કર કોનાથી નારાજ છે?

પોતાના બિન્દાસ વલણ માટે જાણીતી સ્વરા ભાસ્કર શાહરુખ ખાન અને આદિત્ય ચોપરાથી નારાજ હોય તેવી ચર્ચા બોલીવૂડમાં થઇ રહી છે. સ્વરાનો આક્ષેપ છે કે, આ બંનેએ તેની લવલાઇફ ખતમ કરી છે. સામાન્ય રીતે સામાજિક અને રાજકીય મુદ્દા પર વિવાદાસ્પદ નિવેદન આપનારી સ્વરાએ પોતાની નવી ફિલ્મ ‘જહાં ચાર યાર’ના પ્રમોશન દરમિયાન લવ લાઈફ વિશે ચર્ચા કરી હતી. સ્વરાએ આ અંગે એક ઈન્ટરવ્યુમાં જણાવ્યું હતું કે, આદિત્ય ચોપરા અને શાહરૂખ ખાનને મારી લવલાઈફ બરબાદ કરવા માટે જવાબદાર છે.

સાંસારિક જીવનમાં નિષ્ફળ રહી છે રશ્મિ દેસાઇ

મૂળ ગુજરાતી રશ્મિ દેસાઇ એક જાણીતી અભિનેત્રી છે. તેણે મુંબઇની ટીવી અને ફિલ્મ ઇન્ડસ્ટ્રીમાં પોતાની મહેનતથી આગવું સ્થાન બનાવ્યું છે. તેણે પોતાની કારકિર્દીની શરૂઆત 2006માં રાવણ સીરિયલથી કરી હતી. જોકે, રશ્મિ દેસાઇ ઉતરણ સીરિયલમાં તપસ્યાની ભૂમિકાથી તે વધુ જાણીતી બની હતી. આમ, રશ્મિ દેસાઇની પ્રોફેશનલ જીવન સારું રહ્યું હતું પરંતુ અંગત જીવનમાં હંમેશાં ઉતાર-ચઢાવ જોવા મળ્યો હતો. રશ્મિને પહેલા નંદીશ સંધૂ સાથે પ્રેમ થયો હતો. તેઓ ઉતરણના સેટ પર મળ્યાં હતા. તેમણે 2012માં લગ્ન કરી લીધાં હતા અને ચાર વર્ષમાં છૂટાછેડા પણ થઇ ગયા હતા.

રણબીર કપૂર સોમનાથના દર્શનાર્થે

બોલીવૂડનું નવદંપત્તી રણબીર કપૂર અને આલિયા ભટ્ટ તેમની નવી ફિલ્મ ‘બ્રહ્માસ્ત્ર’ સુપરડુપર હિટ જતાં ખૂબ જ ખુશ છે. આ ફિલ્મ પોતાની સિનેમેટોગ્રાફી અને અન્ય વિવાદોને કારણે વધુમાં ચર્ચામાં રહી છે. ફિલ્મની સફળતા પછી ડાયરેક્ટર અયાન મુખરજી અને અભિનેકા રણબીર કપૂરે શુક્રવારે વેરાવળ ખાતેના પ્રથમ જ્યોર્તિલિંગ સોમનાથ મહાદેવના દર્શન કરવા ગયા હતા. જોકે, આલિયા ભટ્ટ તેની ગર્ભાવસ્થાને કારણે ત્યાં ગઇ નહોતી તેવું કહેવાય છે. આ સિવાય આલિયા, રણબીર અને અયાને અમદાવાદમાં ફિલ્મનું પ્રમોશન કર્યું હતું.