ગ્લોબલ રેટિંગ એજન્સી ફિચે વિશ્વના સૌથી મોટા અર્થતંત્ર અમેરિકાનું ક્રેડિટ રેટિંગ AAAથી ઘટાડીને AA+ કર્યું હતું. આ રેટિંગની સાથે ‘સ્ટેબલ’ આઉટલૂક આપવામાં આવ્યું હતું. ફિચના અંદાજ મુજબ આગામી ત્રણ વર્ષમાં અમેરિકાની નાણાકીય સ્થિતિ વધુ કથળશે. અમેરિકામાં ફાઈનાન્સ અને ડેટની સ્થિતિ ખરાબ થઈ હોવાથી તેના રેટિંગમાં ઘટાડો કરવામાં આવ્યો છે. 2011માં બીજી રેટિંગ એજન્સી સ્ટાન્ડર્ડ એન્ડ પુઅર્સે 70 વર્ષના ઇતિહાસમાં પ્રથમ વખત અમેરિકાના રેટિંગને AAAથી ઘટાડીને AA+ કર્યું હતું. આ પછી એસ એન્ડ પીએ રેટિંગમાં કોઇ ફેરફાર કર્યો નથી.

ભારતના ટોચના 50 બેન્ક ડિફોલ્ટરમાં ભાગેડુ બિઝનેસમેન મેહુલ ચોક્સીની ગીતાંજલી જેમ્સ ટોચના સ્થાને છે. ભારતના નાણા મંત્રાલયે સંસદમાં આ અંગેની માહિતી આપી હતી. ટોચના વિલફૂલ ડિફોલ્ટરો પાસેથી બેન્કોએ કુલ રૂ.87,295 કરોડ વસુવવાના બાકી છે. મેહુલ ચોક્સીની ગીતાંજલી જેમ્સે બેન્કોને રૂ.8,738 કરોડનો ચુનો લગાવ્યો છે. આ યાદીમાં બીજા નંબર પર એરા ઈન્ફ્રા એન્જિનિયરિંગ લિમિટેડ છે, જેણે રૂ.5,750 કરોડની રકમ ચુકવવાની બાકી છે. સૌથી મોટા ડિફોલ્ટરોની યાદીમાં REI એગ્રો ત્રીજા ક્રમે છે, જેણે ₹5,148 કરોડની લોન ભરપાઈ નથી કરી, જ્યારે એબીજી શિપયાર્ડની ₹4,774 કરોડની લોન બાકી છે.

વાર્ષિક સેલ્સ વોલ્યુમના આધારે વિશ્વની સૌથી મોટી ટુ વ્હિલર કંપની હીરો મોટોકોર્પના ચેરમેન પવન મુંજાલના નિવાસસ્થાને ભારતની તપાસ એજન્સી એન્ફોર્સમેન્ટ ડિરેક્ટોરે (ઇડી)એ મંગળવારે દરોડા પાડ્યા હતા. મની લોન્ડરિંગ તપાસના ભાગરૂપે દિલ્હી અને ગુરુગ્રામમાં પવન મુંજાલ સંબંધિત સ્થળો પર સર્ચ કાર્યાવાહી કરાઈ હતી. હીરો મોટોકોર્પ 2001માં એક કેલેન્ડર વર્ષમાં સેલ્સ વોલ્યુમની દ્રષ્ટિએ વિશ્વની સૌથી મોટી ટુ-વ્હીલર ઉત્પાદક બની હતી અને છેલ્લા 20 વર્ષથી સતત આ ટાઇટલ જાળવી રાખ્યું છે. કંપની એશિયા, આફ્રિકા અને દક્ષિણ અને મધ્ય અમેરિકામાં ફેલાયેલા 40 દેશોમાં હાજરી ધરાવે છે.

હિન્ડનબર્ગ રિસર્ચના રીપોર્ટ પછી ગૌતમ અદાણીના અદાણી ગ્રૂપે પ્રથમ એક્વિઝિશન કર્યુ કર્યું છે. અદાણી ગ્રૂપની કંપની અંબુજા સિમેન્ટે 600 મિલિયન ડોલરના સોદામાં ગુજરાત સ્થિત સિમેન્ટ કંપની સાંઘી ઇન્ડસ્ટ્રીઝને હસ્તગત કરી હતી. અદાણીએ ગયા વર્ષે સ્વીચ કંપની હોલ્સિમ પાસેથી 10.5 બિલિયન ડોલરમાં અંબુજા સિમેન્ટ ખરીદી હતી. અંબુજા સિમેન્ટ અને સાંઘી ઇન્ડસ્ટ્રીઝ વચ્ચેના આ સોદા અંગે અદાણી ગ્રૂપના ચેરમેન ગૌતમ અદાણીએ જણાવ્યું હતું કે આ સંપાદન સાથે અમે વર્ષ 2028 સુધીમાં અમારી સિમેન્ટ ક્ષમતા બમણી કરીશું.

‘બાર્બી’નો $1 બિલિયનથી વધુની કમાણીનો રેકોર્ડ

વોર્નર બ્રધર્સની લોકપ્રિય બાર્બી ડોલ પર આધારિત મૂવી સુપર હિટ બની રહી છે અને રીલીઝના ત્રીજા વીકમાં ફિલ્મે વૈશ્વિક સ્તરે $1 બિલિયનથી વધુની કમાણી બોક્સ ઓફિસ ઉપર કરી હતી. આ વર્ષે આ સિદ્ધિ મેળવનારી બીજી મોટી ફિલ્મ બની છે. વોર્નર બ્રધર્સે રવિવારે (6 ઓગસ્ટ) જણાવ્યું હતું કે મૂવીએ તેના ત્રીજા સપ્તાહમાં યુએસ અને કેનેડામાં $53 મિલિયન તેમજ આંતરરાષ્ટ્રીય સ્તરે વધારાના $74 મિલિયનની કમાણી કરી હતી. મૂવીએ હવે સ્થાનિક સ્તરે $459.4 મિલિયન અને વિશ્વભરમાં $1.03 બિલિયનની કમાણી કરી છે.

‘કાશ્મીર ફાઇલ્સ’નું નવું વર્ઝન હવે ડિજિટલ પ્લેટફોર્મ પર

ભારતમાં કાશ્મીરી પંડિતો પર અત્યાચાર અને પલાયનની ઘટના પર બનેલી ફિલ્મ ‘ધ કાશ્મીર ફાઇલ્સ’નું નવું વર્ઝન ‘ધ કાશ્મીર ફાઇલ્સ અનરીપોર્ટેડ’નું ટ્રેલર તાજેતરમાં લોંચ કરવામાં આવ્યું હતું. વિવેક અગ્નિહોત્રીએ બનાવેલી ફિલ્મ ‘ધ કાશ્મીર ફાઇલ્સ’ માર્ચ 2022માં રિલીઝ થઈ ત્યારે તેને પ્રોપેગેન્ડા ગણાવીને તેની ટીકા કરવામાં આવી હતી. બોક્સ ઓફિસ પર આ ફિલ્મે જોરદાર સફળતા મેળવી હતી. એ સમયે વિવેક અગ્નિહોત્રીએ જણાવ્યું હતું કે તેઓ કાશ્મીર ફાઇલ્સ માટે કરેલા રીસર્ચ, આર્કાઇવલ ફૂટેજ અને ઇન્ટરવ્યુ પરથી સીરિઝ બનાવશે. આ સિરીઝ ડોક્યુમેન્ટ્રી પ્રકારની છે.

તારક મહેતા….શોમાં દિશા વાકાણી ફરીથી જોવા મળશે તેવો નિર્માતાને આશાવાદ

લોકપ્રિય ટીવી શ્રેણી ‘તારક મહેતા કા ઉલ્ટા ચશ્મા’માં દયાભાભીના પાત્રમાં દિશા વાકાણીને પરત લાવવા માટે પ્રયત્નશીલ છે અને તેનું સકારાત્મક પરિણામ આવશે તેવો આશાવાદ નિર્માતા આસિતકુમાર મોદીએ વ્યક્ત કર્યો છે. અંદાજે 10 વર્ષ સુધી શોમાં દયાભાભીનું પાત્ર ભજવનાર દિશા વાકાણી 2017માં મેટરનિટી લીવ પર ગઈ હતી. પછી તેણે શોના એક એપિસોડમાં કેમિયો પણ કર્યો હતો. ત્યાર પછી તે ક્યારેય તેમાં જોવા મળી નથી. દિશા અત્યારે બે બાળકોની માતા છે અને પારિવારિક જિંદગી માણી રહી છે. આ તરફ ‘તારક મહેતા કા ઉલ્ટા ચશ્મા’ના મેકર્સે દયાભાભીના પાત્રમાં નવી અભિનેત્રીને લેવાની તૈયારી કરી હોવાનું કહેવાય છે.

ઈલિયાના ડિક્રૂઝે પુત્રને જન્મ આપ્યો

બોલિવૂડ અભિનેત્રી ઇલિયાના ડિક્રૂઝે શનિવારે પુત્રને જન્મ આપ્યો હતો. આ ખુશખબરી તેને સોશિયલ મીડિયામાં આપી હતી. અગાઉ ઈલિયાના બોયફ્રેન્ડ સાથે લગ્ન કર્યા વગર પ્રેગ્નેન્ટ થતાં ખૂબ કોન્ટ્રોવર્સી થઈ હતી અને તે ટ્રોલિંગનો શિકાર પણ બની હતી. નરગિસ ફખરી, આથિયા શેટ્ટી, આસ્થા શર્મા, ડબ્બૂ રત્નાની, આશિ દુઆ, હુમા કુરૈશી તેમજ કરણવીર શર્મા સહિતના બોલિવૂડના સમિત્રોએ ઈલિયાનાને અભિનંદન પાઠવ્યા હતા. ઈલિયાના ડિક્રૂઝે પ્રેગ્નેન્સીની જાહેરાત કરી ત્યારથી તેના આવનારા બાળકનો પિતા કોણ છે તે અંગે ઘણા સવાલ ઉઠી રહ્યા હતા. એક્ટ્રેસનું નામ પહેલા કેટરીના કૈફના ભાઈ સ્ટેબસ્ટિયન લૌરેંટ માઈકલ સાથે લિંક થયું હતું. ત્યારે આ બાળક તેનું જ હશે તેવી અટકળો હતી. પરંતુ જુલાઈ મહિનાના મધ્યમાં ઈલિયાનાએ બોયફ્રેન્ડ સાથેની ડિનર ડેટની તસવીરો શેર કરીને આ અફવા પર પૂર્ણવિરામ મૂક્યું હતું.