ખાલિસ્તાન તરફી સંગઠન ખાલિસ્તાન ટાઈગર ફોર્સ અને શીખ્સ ફોર જસ્ટિસ (SFJ)ની કેનેડા શાખાના વડા આતંકવાદી હરદીપ સિંહ નિજ્જરની કેનેડાના સરેમાં એક ગુરુદ્વારાના પાર્કિંગમાં અજાણ્યા હુમલાખોરો ગોળી મારીને સોમવારે હત્યા કરી હતી.
બે અજાણ્યા બંદૂકધારીઓએ 46 વર્ષીય નિજ્જરને ગોળી મારી હતી. તે બ્રિટિશ કોલંબિયાના સરેમાં ગુરુ નાનક શીખ ગુરુદ્વારાના પ્રમુખ હતો. તેને બળજબરીથી ગુરુદ્વારા પર કબજો જમાવ્યો હતો અને તેને ખાલિસ્તાની પ્રવૃત્તિઓનું કેન્દ્ર બનાવ્યું હતું. ભારત સરકારે તેને મોસ્ટ વોન્ટેડ આતંકવાદી જાહેર કર્યો હતો. તાજેતરમાં જ ભારત સરકારે 41 આતંકવાદીઓની યાદી જાહેર કરી હતી, જેમાં હરદીપ નિજ્જરનું નામ પણ સામેલ હતું.
તે પંજાબના જલંધર જિલ્લાનો રહેવાસી હતો. ગુપ્તચર એજન્સીના સૂત્રોના જણાવ્યા અનુસાર, તે છેલ્લા ઘણા સમયથી કેનેડામાં રહેતો હતો અને ત્યાંથી ભારત વિરુદ્ધ ખાલિસ્તાની આતંકવાદને વેગ આપતો હતો. નિજ્જર છેલ્લા એક વર્ષમાં ભારતીય તપાસ એજન્સીઓ માટે માથાનો દુખાવો બની ગયો હતો કારણ કે તેણે લોરેન્સ બિશ્નોઈ ગેંગના ઓપરેટિવ્સને વિદેશમાં દાણચોરી કરી હતી. વર્ષ 2022ની શરૂઆતમાં, નેશનલ ઇન્વેસ્ટિગેશન એજન્સી (NIA)એ પંજાબના જલંધરમાં એક હિન્દુ પૂજારીની હત્યાનું કાવતરું ઘડવા બદલ ભાગેડુ ખાલિસ્તાની આતંકવાદી હરદીપ સિંહ નિજ્જર પર 10 લાખ રૂપિયાનું ઈનામ જાહેર કરવામાં આવ્યું હતું. આ મામલામાં NIAએ ભારત સરકાર વિરુદ્ધ ભાવનાઓને ભડકાવવા બદલ FIR નોંધી હતી. NIAના જણાવ્યા અનુસાર, પાદરીની હત્યાનું કાવતરું ખાલિસ્તાન ટાઈગર ફોર્સ (KTF) દ્વારા ઘડવામાં આવ્યું હતું. કેનેડામાં રહેતા નિજ્જર KTFના વડા હતા.
