રામાનંદ સાગર દ્વારા 35 વર્ષ અગાઉ દૂરદર્શન પર રજૂ થયેલી રામાયણ સીરિયલ અને તેના કલાકારો દેશભરમાં ખૂબ જ લોકપ્રિય થયા હતા. અત્યારે દરેક પાત્ર પણ બધાને યાદ હશે, અને મોટાભાગના લોકોનું બાળપણ તો આ સીરિયલ જોઇને વિત્યું હશે. એ સીરિયલના રામ અને સીતાને પણ કોણ ભૂલી શકે? આજે પણ જ્યારે રામાયણની વાત થાય છે ત્યારે રામ અને સીતાનું પાત્ર ભજવનાર અરુણ ગોવિલ અને દીપિકા ચિખલિયાની જોડી યાદ આવી જાય છે. આ તેમના કેરેક્ટરની અસર હતી કે, હકીકતમાં લોકો તેમને ભગવાનની જેમ પૂજતા હતા. હવે 35 વર્ષ પછી આ જોડી ફરીથી ટીવી પર જોવા મળશે.
દીપિકાએ સોશિયલ મીડિયામાં આ નવા શોનો બિહાઇન્ડ ધ સીન્સ વીડિયો પોસ્ટ કર્યો છે, જેમાં તે શૂટિંગ કરતી જોવા મળી રહી છે. વીડિયોમાં તે વેનિટી વેનની અંદર બેસીને તેની સ્ક્રિપ્ટ વાંચતી જોવા મળે છે અને ક્યારેક ઝૂલા પર ઝૂલતી જોવા મળે છે. એક વીડિયોમાં દીપિકા સાડી પહેરીને પૂજા કરતી જોવા મળે છે, તો એક દૃશ્યમાં તે ઘરની અંદરની એક ઝલક બતાવે છે, જેમાં અરુણ ગોવિલ તેની સામે બેઠા છે. સ્પષ્ટ છે કે અરુણ ગોવિલ અને દીપિકા એક નવા પ્રોજેક્ટ પર સાથે કામ કરી રહ્યા છે. વેનિટી વેનમાં એક કાગળની સ્લિપ હતી. જેમાં ઉપર શારદાનું નામ અને નીચે દીપિકાનું નામ લખેલું છે. જેથી અનુમાન લગાવી શકાય છે કે, આ નવા પ્રોજેક્ટમાં દીપિકા ‘શારદા‘નામના પાત્રમાં જોવા મળશે.
દીપિકાનો આ વીડિયો સોશિયલ મીડિયા પર વાયરલ થઈ રહ્યો છે. ચાહકો તેમના નવા પ્રોજેક્ટ વિશે જાણવા માટે ખૂબ જ ઉત્સુક છે. દીપિકાના વીડિયો પર યુઝર્સ ઘણી કમેન્ટ કરી રહ્યા છે. એક યુઝરે લખ્યું હતું કે, “મારા સિયા રામ એક વાર ફરી સાથે.” તો ત્યાં બીજા યુઝરે લખ્યું કે આ શો જોવા માટે રાહ નથી જોઈ શકતો, આખી ટીમને શુભકામનાઓ. આ સિવાય અન્ય યુઝર્સ કોમેન્ટ કરીને પોતાનો પ્રેમ વ્યક્ત કરી રહ્યા છે.
અરુણ ગોવિલ અને દીપિકા ચિખલિયા સોશિયલ મીડિયા પર ખૂબ જ સક્રિય છે અને તેમની ફેન ફોલોઈંગ પણ સારી છે. બંનેને તેમની અસલી ઓળખ રામાયણ સીરિયલથી મળી હતી. વર્ષ 2020માં, જ્યારે કોવિડ-19ને કારણે દેશવ્યાપી લોકડાઉન લાદવામાં આવ્યું હતું, ત્યારે દૂરદર્શને તેના જૂના શો ફરીથી પ્રસારિત કર્યા હતા. એ સમયે મોટી સંખ્યામાં લોકોએ પરિવાર સાથે બેસીને રામાયણના શો નિહાળ્યા હતા. આ પછી અરુણ ગોવિલ અને દીપિકા ચીખલિયા ફરી એકવાર ચર્ચામાં આવ્યા હતા.
