નાણાકીય મુશ્કેલીમાં મુકેલી બેન્કોના થાપણદારોને રાહત આપતી એક હિલચાલમાં કેન્દ્રીય કેબિનેટે ડિપોઝિટ ઇન્શ્યોરન્સ એન્ડ ક્રેડિટ ગેરંટી કોર્પોરેશન એક્ટ (DICGC) સુધારા બિલને બુધવારે મંજૂરી આપી હતી. બિલ મંજૂર થયા બાદ બેન્ક બંધ થાય કે ડૂબી જાય તો થાપણદારોની રૂ.5 લાખ સુધીની રકમ સુરક્ષિત રહેશે.

ભારતના બિલિયોનેર રોકાણકાર રાકેશ ઝુનઝુનવાલાએ નવી એરલાઇન ચાલુ કરવાની યોજના બનાવી છે અને ચાર વર્ષમાં 70 વિમાનાનો કાફલો તૈયાર કરવાની વિચારણા કરી રહ્યા છે.

ભારતના પ્રખ્યાત બાસમતી ચોખાની સોડમ દુનિયાના 125 દેશોમાં ફેલાઈ છે. વૈશ્વિક બજારમાં ભારતના બાસમતી ચોખાની વધતી જતી માગ વચ્ચે 2020-21ના નાણાકીય વર્ષમાં દુનિયાના 125 દેશોમાં ભારતે રૂ.30,000 કરોડના બાસમતી ચોખાની નિકાસ કરી હતી.

નાગાલેન્ડની ‘કિંગ ચિલી’ એટલે કે ભૂત ઝોલકિયા તરીકે ઓળખાતા મરચાંની પહેલી વખત લંડન નિકાસ કરવામાં આવી છે. તે વિશ્વના સૌથી તીખાં મરચાં તરીકે ઓળખાય છે.

પોર્ન ફિલ્મ કેસમાં જ્યુડિશિયલ કસ્ટડીમાં રહેલા ઇન્ડિયન બ્રિટિશ બિઝનેસમેન રાજ કુંદ્રાને ભારતની મૂડીબજારની નિયમનકારી સંસ્થા સેબીએ બુધવારે ફટકો માર્યો હતો.

પીઢ કલાકારોનું ફરીથી ફિલ્મોમાં પદાર્પણ

આજના સમયમાં બોલિવૂડની ફિલ્મોમાં યુવા કલાકારો પર ધ્યાન કેન્દ્રિત કરવામાં આવે છે. જોકે, હવે આ દિશામાં પરિવર્તન આવી રહ્યું છે. જાણીતા અનેક પીઢ કલાકારો આવનારા સમયમાં ફિલ્મોમાં ફરીથી અભિનય કરતા જોવા મળશે.
તાજેતરનાં વર્ષોમાં કેટલાક સીનિયર એક્ટર્સે હિન્દી ફિલ્મ્સમાં પોતાની છાપ છોડી છે. જેમ કે, 2018ની હિટ ફિલ્મ ‘બધાઈ હો’માં નીના ગુપ્તા અને ગજરાજ રાવ હોય કે 2019ની મેગા હિટ ‘કબીર સિંઘ’માં કામિની કૌશલ કે પછી ‘ધ તાશ્કંદ ફાઇલ્સ’માં મિથુન ચક્રવર્તી હોય. આ સીનિયર એક્ટર્સે બતાવ્યું છે કે, જો તેમને યોગ્ય રોલ્સ આપવામાં આવે તો તેઓ પણ બોક્સ-ઓફિસ પર સક્સેસ મેળવી શકે છે. અહીં એવા કેટલાક દિગ્ગજ કલાકારો પર એક નજર કરીએ કે જેઓ ફરીથી ફિલ્મોમાં જોવા મળશે.

પિતાજીની કવિતાઓને અમિતાભ પોતે સ્વરબદ્ધ કરશે

અમિતાભ બચ્ચને પોતાના પ્રશંસકો માટે તાજેતરમાં એક મોટી જાહેરાત કરી હતી. તેમણે ટ્વિટર પર એક પોસ્ટ શેર કરી છે. જેમાં તેમણે ટ્વીટ કર્યું છે કે, તેઓ પોતાના પિતા હરિવંશરાય બચ્ચનના એક પુસ્તકને પોતાના અવાજમાં રેકોર્ડ કરવાની તૈયારી કરી રહ્યા છે. તેમણે લખ્યું છે કે, પૂજ્ય પિતાજીની લેખનીથી હું સ્વયંને દૂર કરી શકતો નથી. તેમની ગંભીર વાતોને મારા અવાજમાં સાંભળશો.
અમિતાભે ટ્વીટર પર એક તસવીર પણ શેર કરી છે. જેમાં હરિવંશરાય બચ્ચનનું એક પુસ્તક અને માઇક હાથમાં જોવા મળી રહ્યા છે. જ્યારે તેમણે હેડફોન પણ પહેરેલો છે. આ પરથી સ્પષ્ટ થાય છે કે, અમિતાભજી કવિતાઓના રેકોર્ડિંગની તૈયારી કરી રહ્યા છે.

‘બિગ બોસ’માંથી સલમાનનું પત્તુ કપાયું

ભારતીય ટેલિવિઝનનો સૌથી મોટો રિયાલિટી શો ‘બિગ બોસ’ની 15મી સીઝનની તૈયારી થઇ રહી છે. વર્તમાન પરિસ્થિતિને કારણે પ્રથમવાર આ શોને ઓટીટી પર રિલીઝ કરવાનો નિર્ણય લેવામાં આવ્યો છે. કહેવાય છે કે, બિગ બોસના નિર્માતાઓએ આ શોના સંચાલક તરીકે સલમાન ખાનનું પત્તું કાપી નાખ્યું છે અને હોસ્ટ તરીકે કરણ જોહરની પસંદગી કરી છે.
કરણ જોહરે પણ આ શોને લઇને જણાવ્યું છે કે, તે બિગ બોસ 15ને ઓટીટી પર હોસ્ટ કરશે. સોશિયલ મીડિયાના એક પોર્ટલના અનુસાર, કરણે જણાવ્યું હતું કે, હું અને મારા માતા બિગ બોસના પ્રશંસકો છીએ. અમે એક એપિસોડ જોવાનું ચુકતા નથી. હવે હું સ્વયં આ શોનો હોસ્ટ બની રહ્યો છું. મને આશા અને વિશ્વાસ છે કે, હું આ શોનો સફળ સંચાલક કહેવાઇશ.

ઇશા દેઓલનું ડિજિટલ ડેબ્યુ

ધર્મેન્દ્ર અને હેમામાલીનીની મોટી પુત્રી ઇશા દેઓલ ફરીથી અભિનય કરવા માટે સક્રિય બની રહી છે. લાંબા સમય પછી તે અજય દેવગણની સાથે ક્રાઇમ-ડ્રામા સીરીઝ રૂદ્ર-ધ એજ ઓફ ડાર્કનેસ દ્વારા ડિજિટલ ક્ષેત્રે પદાર્પણ કરશે. ઇશાએ આ વાતની જાહેરાત સોશિયલ મીડિયા દ્વારા કરી છે. ઇશાએ ટ્વીટ કર્યું છે કે, રૂદ્ર મારી પ્રથમ સીરીઝ છે અને મને તેમાં અજય દેવગણ સાથે ફરી કામ કરવાની તક મળી છે. તેમની સાથે મેં યુવા, એલઓસી, કારગિલ, સંડે, કાલ ઔર ઇન્સાન જેવી ફિલ્મોમાં કામ કર્યું છે. પોતાના ડિજિટલ ડેબ્યુ વિશે ઇશાએ જણાવ્યું હતું કે, એક અભિનેત્રી તરીકે મારે એવા પ્રોજેક્ટમાં કામ કરવું છે જેનાથી મને કંઇક નવું જાણવા મળે.

જાહ્નવીની ફિલ્મનું દિગ્દર્શન કરશે બોમનનો પુત્ર

કરણ જોહરે પોતાની નવી ફિલ્મમાં જાન્હવી કપૂરને તક આપી છે. આ ફિલ્મનું દિગ્દર્શન બોમન ઇરાનીનો પુત્ર કાયોઝ કરવાનો છે. ઘણા સમયથી કરણની ઇચ્છા જાહ્નવી સાથે ફિલ્મ કરવાની હતી. અગાઉ તેણે દોસ્તાના ટુ અને મિસ્ટર લેલે બનાવાનો વિચાર કર્યો હતો જેમાં તે જાહ્નવીને જ મુખ્ય અભિનેત્રી તરીકે લેવાનો હતો. પરંતુ કરણની આ બંને ફિલ્મો અટકી ગઇ હતી. આ એક લાગણીશીલ ફિલ્મ હશે.