વિશ્વમાં સોશિયલ મીડિયા પ્લેટફોર્મનો પાયો નાંખનાર કંપનીઓમાંની એક ફેસબૂકે હવે ટિકટોક અને યુટયૂબનો આકરી સ્પર્ધાનો સામનો કરવો પડી રહ્યો છે. તેનાથી ફેસબૂકના ૧8 વર્ષના ઈતિહાસમાં પહેલી વખત તેના દૈનિક યુઝર્સ બેઝમાં ઘટાડો નોંધાયો છે. અનેક વિવાદોના કારણે વૈશ્વિક સ્તરે ટીકાઓનો સામનો કરનાર ફેસબૂકે ડિસેમ્બર ૨૦૨૧ના ત્રિમાસિક સમયમાં વૈશ્વિક સ્તરે પાંચ લાખ દૈનિક યુઝર્સ ગુમાવ્યા હતા. ફેસબુકના દૈનિક એક્ટિવ યુઝર્સની સંખ્યા સમગ્ર વિશ્વમાં અગાઉના ત્રિમાસિકમાં ૧.૯૩ બિલિયન હતી જે હાલ ઘટીને ૧.૯૨ બિલિયન થઇ ગઇ છે. દુનિયામાં હવે ટિકટોક અને યુટયૂબનું ચલણ વધતાં સોશિયલ મીડિયા પ્લેટફોર્મ પર ફેસબૂકની રાજાશાહી સામે જોખમ પેદા થયું છે. એટલું જ નહીં ડિસેમ્બર ત્રિમાસિકના નબળા પરિણામોના કારણે એક જ દિવસમાં ફેસબૂકની માર્કેટ કેપમાં રૂ. ૧૪.૯ લાખ કરોડ અને સીઈઓ ઝુકરબર્ગની સંપત્તિમાં રૂ. ૧.૭૯ લાખ કરોડનું ધોવાણ થયું હતું.

ભારત સરકારે 10 વર્ષમાં પ્રથમવાર સરકારી બેન્કોમાં નાણાં નહીં ઠાલવવાનો નિર્ણય કર્યો છે આગામી નાણાકીય વર્ષના બજેટમાં જાહેર ક્ષેત્રની બેન્કોમાં નવી મૂડી નહીં ઠાલવવાનો નિર્ણય દેશની જાહેર ક્ષેત્રની બેન્કોની સ્થિતિ મજબૂત બની ગઈ હોવાના સંકેત આપે છે. ૨૦૧૪થી અત્યારસુધીમાં જાહેર ક્ષેત્રની બેન્કોમાં સરકારે રૂપિયા ૩.૬૦ લાખ કરોડ ઠાલવ્યા છે. સરકારી બેન્કોમાં મૂડી નહીં ઠાલવવાનો અર્થ બેન્કોની મૂડીમાં મૂડીની સ્થિતિ મજબૂત હોવાનો સરકારને વિશ્વાસ છે, એમ રેટિંગ એજન્સીઓ માની રહી છે. આગામી નાણાં વર્ષમાં સરકાર બેન્કોમાં અધવચ્ચે પણ કોઈપણ મૂડી ઠાલવશે તેવી શકયતા જણાતી નથી.

અમેરિકાની ખાનગી કંપનીઓએ જાન્યુઆરી 2022માં આશરે ત્રણ લાખ નોકરીઓમાં કાપ મૂક્યો હતો. કંપનીઓના આ છટણી સંકેત આપે છે કે ઓમિક્રોન વેરિયન્ટ આધારિત કોરોનાના કેસોમાં વધારાની વચ્ચે અમેરિકાના શ્રમ બજારમાં રિકવરી ખોરવાઈ ગઈ છે, એમ પે-રોલ ડેટા કંપની ઓટોમેટિક ડેટા પ્રોસેસિંગ (એડીપી)એ તેના અહેવાલમાં જણાવ્યું હતું.

એશિયાના સૌથી ધનિક વ્યક્તિ તરીકેનું રિલાયન્સ ઇન્ડસ્ટ્રીઝના મુકેશ અંબાણીનું બિરુદ વર્ષના છેલ્લા દિવસે છીનવાઇ ગયું હતું. ચીનના બોટલ વોટર કિંગ કહેવાતા ઝોંગ શાનશને આ બિરુદ છીનવી લીધું હતું. 66 વર્ષીય ઝોંગ શાનશન હવે એશિયાના સૌથી વધુ અમીર વ્યક્તિ બની ગયા હતા. પત્રકાર, મશરૂમ ફાર્મિંગ અને હેલ્થ કેરમાં પોતાનો હાથ અજમાવી ચુકેલા ઝોંગે મુકેશ અંબાણી અને જેક માને પાછળ મૂકી દીધા હતા. બ્લૂમબર્ગ મિલેનિયર્સ ઇન્ડેક્સમાં જણાવ્યા મુજબ ચાલુ વર્ષે ઝોંગની સંપત્તિ 70.9 બિલિયન ડોલર્સ વધીને 77.8 બિલિયન ડોલર્સ થઇ ગઇ હતી. 2020ના વર્ષમાં ઝોંગની સંપત્તિમાં થયેલા આ વધારાના પગલે તેઓ વિશ્વના પરના સૌથી અમીર વ્યક્તિમાં 11મા સ્થાને પહોંચી ગયા હતા.

લતા મંગેશકર: 1974માં લંડનના રોયલ આલ્બર્ટ હોલમાં પરફોર્મ કરનાર પ્રથમ ભારતીય

ભારતના નાઇટિંગેલ તરીકે ઓળખાતા સુપ્રસિદ્ધ ગાયિકા લતા મંગેશકર લંડનના આઇકોનિક રોયલ આલ્બર્ટ હોલમાં લાઇવ પરફોર્મન્સ આપનાર પ્રથમ ભારતીય કલાકાર તરીકેનું ગૌરવ ધરાવે છે. લતા મંગેશકરે 1974માં આંતરરાષ્ટ્રીય મંચ પર પદાર્પણ માટે UKને પસંદ કરી ભરચક પ્રેક્ષકો સમક્ષ કેટલીક સૌથી પ્રિય ધૂનો રજૂ કરી હતી. તેમણે એ વખતે હિન્દીમાં શો દરમિયાન આપેલા સંક્ષિપ્ત ભાષણમાં કહ્યું હતું કે “ભારત બહાર આ મારો પહેલો કોન્સર્ટ છે. હું ખૂબ જ નર્વસ છું, પરંતુ હું ઉષ્માભર્યા સ્વાગત માટે આભારી છું.” તેમણે કિશોર કુમાર, હેમંત કુમાર અને અગ્રણી સંગીતકારો એસ.ડી. બર્મન અને નૌશાદ જેવા બોલિવૂડના સમકાલીન કલાકારો સાથે ગાવાની યાદો શેર કરી હતી.

જયારે લતાજીનું એ મેરે વતન કે લોગો …ગીત સાંભળીને નહેરુજી રડી પડયા

ભારત અને ચીન વચ્ચે ૧૯૬૨માં યુધ્ધ થયું જેમાં ભારતીય સેનાએ પીછેહટ કરવી પડી હતી. જવાનોએ બહાદૂરી બતાવી પરંતુ ભારત સરકારની અધૂરી તૈયારીઓ અને ચીન પરનો અતિ ભરોસો યુધ્ધમાં ભારે પડયો હતો. ચીન સામે બહાદૂરીથી લડેલા જવાનો માટે સંગીતકાર સી રામચંદ્રના સંગીત નિર્દેશનમાં કવી પ્રદિપે લખેલા એ મેરે વતન કે લોગો.. ગીતને લતા મંગેશકરે ગાઇને દેશવાસીઓની સંવેદનાને ઢંઢોળી હતી. આ એક બિન ફિલ્મી ગીત હતું જે એક સંગીત કાર્યક્રમમાં રજૂ થયું હતું. દિલ્હીમાં ગણતંત્ર દિવસે રામલીલા મેદાનમાં લતા મંગેશકરનું આ ગીત સાંભળીને તત્કાલિન વડાપ્રધાન જવાહરલાલ નેહરુ રડી પડયા હતા. આ ગીત આજે પણ સર્વશ્રેષ્ઠ દેશ ભકિત ગીતમાં ગણાય છે. જે પણ શાંત ચિત્તે સાંભળે છે તેનું મન દેશભકિતથી ભરાઇ જાય છે. ગીતના શબ્દોમાં લતા મંગેશકરના અવાજની કરુણાસભર મીઠાશ અને સી રામચંદ્રના સંગીતની કમાલને વિવેચકોએ ખૂબ વખાણી છે.

કોકિલકંઠી લતા મંગેશકરની કેટલીક રસપ્રદ વાતો

ભારતરત્ન અને વિશ્વવિખ્યાત ગાયિકા લતા મંગેશકરનું મુંબઈમાં 92 વર્ષની વયે 6 ફેબ્રુઆરીએ નિધન થયું હતું. તેમના નિધનથી સમગ્ર ભારતમાં શોક વ્યાપી ગયો હતો. -વર્ષ 1962માં ભારત ચીન યુદ્ધ પછી જ્યારે કાર્યક્રમમાં લતા મંગેશકરએ પંડિત પ્રદીપનુ લખેલ ગીત ‘એ મેરે વતન કે લોગો’ ગાયુ હતુ ત્યારે તત્કાલીન વડાપ્રધાન જવાહરલાલ નેહરુની આંખોમાંથી આંસુ આવી ગયા હતા.