ભારતમાં સાત દિવસમાં કોરોના 26 લાખથી વધુ નવા કેસ અને આશરે 23,800ના મોત સાથે 2મેના રોજ પૂરું થયેલું સપ્તાહ અત્યાર સુધીનું સૌથી ચેપી અને સૌથી વધુ જીવલેણ સપ્તાહ પુરવાર થયું હતું. કોરોનાના નવા કેસો અને મોતમાં અસાધારણ ઉછાળાને પગલે દેશના ઘણા રાજ્યોમાં હોસ્પિટલો ઊભરાઈ ગઈ હતી તથા મેડિકલ ઓક્સિજન અને દવાઓની અભૂતપૂર્વ અછત ઊભી થઈ હતી. હાલ કોરોનાના કેસોનો આંક પણ બે કરોડને પાર થઇ ચૂક્યો છે.આ બિહામણી સ્થિતિ વચ્ચે મંગળવારે, 4 મેએ સતત 13મા દિવસે કોરોનાના 3 લાખ કરતાં વધુ કેસ સાથે કુલ કેસનો આંકડો 20 મિલિયનને વટાવી ગયો હતો વિજ્ઞાનીઓ માને છે કે આગામી થોડા દિવસોમાં કોરોનાની પીક આવી જવાની ધારણા છે.દેશમાં પહેલી મેએ 4,01,993 નવા કેસની ટોચ બની હતી. 2મેના રોજ આશરે 3.92 લાખ કેસ નોંધાયા હતા. દેશના વિવિધ ભાગોમાં આંશિક કે પૂર્ણ લોકડાઉન લાદવામાં આવ્યા છે જેમાં બિહારનો પણ ઉમેરો થયો છે.

યુકેના વડા પ્રધાન બોરીસ જોન્સન અને ભારતીય વડા પ્રધાન નરેન્દ્ર મોદી વચ્ચે મંગળવારે વર્ચ્યુઅલ સમિટ પૂર્વે બ્રિટિશ સરકારે ભારત સાથે £1 બિલિયનના વેપાર અને રોકાણો માટે કરાર કર્યા હતા. આ સોદાના કારણે બ્રિટનમાં 6,500થી વધુ રોજગારી ઉભી થશે.

મૃત્યુમાં અવિરત વધારો જોવા મળી રહ્યો છે, ત્યારે યુકેમાં બીએપીએસ સ્વામિનારાયણ સંસ્થાએ ભારતમાં બીએપીએસના કોવિડ-19 રાહત કાર્યને ટેકો આપવા સાયકલ ચેલેન્જ દ્વારા માત્ર છ દિવસમાં £602,000થી વધુ રકમ એકત્ર કરી હતી.બીએપીએસ શ્રી સ્વામિનારાયણ મંદિર, લંડન દ્વારા 28 એપ્રિલના ​​રોજ ‘સાયકલ ટુ સેવ લાઈવ ઇન ઇન્ડિયા’ અભિયાન અંતર્ગત 48 કલાકના નોન સ્ટોપ સ્ટેટીક સાયકલ રિલે ચેલેન્જની શરૂઆત કરાઇ હતી.

લોકોની ભારે ટીકા છતાં ભારતીય ક્રિકેટ બોર્ડ દ્વારા બાયો-બબલના મસ મોટા દાવાઓ સાથે શરૂ કરવામાં આવેલી તમાશા ક્રિકેટ સ્પર્ધા તરીકે વગોવાયેલી આઈપીએલ 2021 અધવચ્ચેથી પડતી મુકવાની ફરજ પડી છે. સોમવારે અમદાવાદમાં રોયલ ચેલેન્જર્સ બેંગ્લોર અને કોલકાતા નાઈટ રાઈડર્સ વચ્ચેની મેચ પડતી મુકવી પડી હતી

બ્રિટન અને ભારત વચ્ચે મંગળવારે કરાયેલા માઈગ્રેશન અને મોબિલિટી કરાર હેઠળ યુકેમાં વસતા ગેરકાયદે ભારતીય માઈગ્રન્ટ્સને દેશમાં પરત લેવા ભારતના વડાપ્રધાન નરેન્દ્ર મોદીએ સંમતિ આપી છે. તેના બદલામાં, યુકે દર વર્ષે 3,000 યુવા ભારતીય પ્રોફેશનલ્સ માટે એમ્પ્લોયમેન્ટની તકો આપશે.

ભરૂચની જાણીતી પટેલ વેલ્ફેર હોસ્પિટલના કોવિડ વોર્ડમાં શુક્રવાર મોડી રાત્રે આગ લાગતા કુલ 18 લોકોના મોત થયા છે, જેમાં 16 દર્દી અને 2 કર્મચારીઓનો સમાવેશ થાય છે. હોસ્પિટલના ICU વોર્ડ સહિત જુદા જુદા વિભાગોમાં આગ ફેલાતા અફરાતફરીનો માહોલ ઊભો થયો હતો.સરકારે આ ઘટનામાં આઇએએસ અધિકારી દ્વારા ઉચ્ચ સ્તરીય તપાસના આદેશ આપ્યા છે અને મૃતકોના પરિજનોને ચાર લાખની સહાય જાહેર કરી છે.

ગુજરાતમાં કોરોનાને કારણે અભૂતપૂર્વ કટોકટી ઊભી થઈ છે ત્યારે રાજ્ય સરકારે મંગળવારે વધુ સાત શહેરોમાં નાઇટ કરફ્યૂ સહિતના નવા આકરા નિયંત્રણો લાદ્યા હતા. કોરોનાની સ્થિતિની સમીક્ષા બાદ રાજ્યના મુખ્યપ્રધાન વિજય રૂપાણીએ આ જાહેરાત કરી હતી.રાજ્યમાં હવે 36 શહેરોમાં રાત્રીના 8 વાગ્યાથી સવારના 6 વાગ્યા સુધી નાઇટ કરફ્યૂ અને બીજા નિયંત્રણો 12મે સુધી અમલી બનશે. રાજ્યમાં મંગળવારે કોરોનાના નવા 13,050 કેસ નોંધાયા હતા અને 131 દર્દીના મોત થયા હતા.

કોરોના વેક્સીનની અછતને પગલે ગુજરાતના માત્ર 10 જિલ્લામાં જ 18 વર્ષથી વધુ ઉંમરના લોકોને પહેલી મેથી વેક્સીન મળશે. રાજ્યના મુખ્યપ્રધાન વિજય રુપાણીએ શુક્રવારે જણાવ્યું હતું કે આજે સાંજ સુધીમાં જ ત્રણ લાખ જેટલા વેક્સીન ડોઝ હવાઈ માર્ગે ગુજરાત આવી રહ્યા છે.કાલથી જ રાજ્યના સૌથી વધુ પ્રભાવિત 10 જિલ્લામાં 18 વર્ષથી વધુ વય ધરાવતા નાગરિકોને રસી આપવાનું શરુ કરી દેવામાં આવશે.

કોરોના મહામારી વચ્ચે યોજાયેલી પાંચ રાજ્યોની વિધાનસભાની ચૂંટણીના રવિવારે પરિણામ જાહેર થયા હતા. પશ્ચિમ બંગાળમાં ભાજપ સામે મમતા બેનર્જીના પક્ષ તૃણમુલ કોંગ્રેસનો શાનદાર વિજય થયો હતો અને 66 વર્ષીય મમતા ત્રીજા વખત રાજ્યના મુખ્યપ્રધાન બનશે.તમિલનાડુમાં સત્તાધારી AIADMKનો પરાજય થયો હતો અને વિરોધ પક્ષ ડીએમકેનો વિજય થયો હતો. આસામમાં ભાજપને ફરી સત્તા મળી હતી. કેરળમાં ડાબેરી પક્ષોનું ગઠબંધન સત્તા જાળવી રાખવામાં સફળ થયું હતો, જોકે પોંડિચેરીમાં કોંગ્રેસની હાર થઈ હતી અને ભાજપના ગઠબંધનનો વિજય થયો હતો.

ભારતમાં કોરોના વાઇરસના કહેરને પગલે અમેરિકાના પ્રેસિડન્ટ જો બાઇડનને ચાર મેથી અનિશ્ચિત સમયગાળા સુધી ભારતમાંથી ટ્રાવેલ પર નિયંત્રણો મૂક્યા છે. અમેરિકાન આ પ્રતિબંધથી મોટા ભાગના બિનઅમેરિકન નાગરિકોનો અમેરિકામાં પ્રવેશ મુશ્કેલ બનશે.જોકે આ નિયંત્રણોમાં વિદ્યાર્થીઓ, શિક્ષણવિદો અને પત્રકારો જેવી કેટલીક કેટેગરીના વ્યક્તિને માફી આપવામાં આવી છે, એમ અમેરિકાના વિદેશ વિભાગે જણાવ્યું હતું.