અમેરિકામાં આ વર્ષના પ્રારંભથી માર્ચની શરૂઆત સુધીમાં યુએસ ઇમિગ્રેશન એન્ડ કસ્ટમ્સ એન્ફોર્સમેન્ટની કસ્ટડીમાં ઓછામાં ઓછા 11 ઇમિગ્રન્ટ્સના મોત નોંધાયા હતા. આ મોત એરિઝોના, મિસ્સિસિપી, કેલિફોર્નિયા, મિયામી, ઇન્ડિયાના, ટેકસાસ, જ્યોર્જિયા અને ફિલાડેલ્ફિયામાં નોંધાયા હતા. ગત વર્ષે 31 લોકોના મોત થયા હતા, જે બે દસકામાં સૌથી વધુ છે. આ મૃત ઇમિગ્રન્ટસ હૈતી, ઇરાન, મેક્સિકો, ગ્વાટેમાલા, કંબોડિયા, નિકારાગુઆ, હોન્ડુરાસ અને ક્યુબાના નાગરિકો હતા. અમેરિકામાં છેલ્લા બે દસકાથી વધુ સમયમાં ઇમિગ્રેશન અટકાયતમાં રહેલા લોકો માટે આ સૌથી જીવલેણ વર્ષ રહ્યું છે. ઓક્ટોબર 2023થી ઇમિગ્રેશન એન્ડ કસ્ટમ્સ એન્ફોર્સમેન્ટ કસ્ટડીમાં જે લોકોના મોત થયા છે તે ગત નાણાકીય વર્ષમાં મૃત્યુ થયા હતા તેમની સંખ્યા કરતાં વધુ છે. એક અંદાજ મુજબ 70 હજાર જેટલા લોકો ICEની અટકાયતમાં છે, ત્યારે આ પ્રકારના મોતમાં વધારો નોંધાયો છે, જે છેલ્લા ઘણા વર્ષોમાં સૌથી વધુ છે. એજન્સીના ભૂતપૂર્વ અધિકારીઓ અને ઇમિગ્રેશન એડવોકેટ્સે ચેતવણી આપી હતી કે, વધુ લોકોને અટકાયતમાં રાખવાથી અને તેમની ઓછી સંભાળ રાખવાથી વધુ મૃત્યુ થવાની સંભાવના રહેલી છે.
