ઇલિનોયના જીનીવાના ભારતીય મૂળના એક શખ્સને બોસ્ટનની ફેડરલ કોર્ટમાં મેડિકેર સાથે બે મિલિયન ડોલરથી વધુની છેતરપિંડી આચરવા બદલ સજા ફટકારવામાં આવી હતી, જેમાં ડ્યુરેબલ મેડિકલ ઇક્વિપમેન્ટ (DME) માટે ખોટા દાવા રજૂ કરવામાં આવ્યા હતા જે મેડિકલી બિનજરૂરી હતા, મેડિકેરના લાભાર્થીઓને તેની જરૂર નહોતી અને તેમાં લાંચની લેવડ-દેવડ થઇ હતી. આ કૌભાંડમાં ભારતીય મૂળના 36 વર્ષીય કાર્તિક ભાટિયાને યુએસ સીનિયર ડિસ્ટ્રિક્ટ કોર્ટના જજ પટ્ટી બી. સરિસ દ્વારા બે વર્ષની જેલની સજા ફટકારવામાં આવી હતી. ઓગસ્ટ 2025માં, કાર્તિક ભાટિયા પર હેલ્થ કેર ફ્રોડનું ષડયંત્ર રચવાનો અને ખોટા નિવેદનો આપવાનો આરોપ મૂકવામાં આવ્યો હતો. કાર્તિક ભાટિયાએ રાજુ શર્મા અને અન્ય કૌભાંડીઓ સાથે મળીને DME કંપનીની માલિકી મેળવીને તેનું સંચાલન કર્યું હતું. આ કંપની ટેલિમાર્કેટિંગ કંપનીઓને વિવિધ ઓર્થોટિક્સ માટે DME ઓર્ડર માટે નાણા ચૂકવતી હતી. જ્યારે સેન્ટર્સ ફોર મેડિકેર એન્ડ મેડિકેડ સર્વિસીસ દ્વારા કાર્તિક ભાટિયાની DME કંપનીને ચૂકવવાનું બંધ કર્યું ત્યારે તેણે એક નવી DME કંપની શરૂ કરીને કૌભાંડ કરવાનું જાળવી રાખ્યું હતું.
