નોર્થ વેસ્ટ લંડનના સડબરી સ્થિત હેરો રોડ પર આવેલ પાનેસર ફૂડ એન્ડ વાઇન અને વેમ્બલીમાં ઇલીંગ રોડ પર આવેલ માણેકચોક રેસ્ટોરંટને કથિત રીતે નિશાન બનાવી તોડફોડ કરાતાં લંડન અને યુકેના હિન્દુ-ભારતીય સમાજમાં વ્યાપક ગભરાટ સાથે આક્રોશ ફેલાયો છે. તોડફોડના અહેવાલો ઓનલાઈન વાઇરલ થયા બાદ બ્રેન્ટ કાઉન્સિલ, પોલીસ અને રાજકીય નેતાઓએ કડક પગલા ભરવાની બાંહેધરી આપી હતી. હેરોમાં યોજાયેલા હોળી ઉત્સવ ઉપરના હુમલા પછી ગણતરીના દિવસોમાં જ દુકાનો પર થયેલા હુમલાના વિડીયો ફૂટેજ, સંદેશા તથા અફવાઓ સોસ્યલ મિડીયા પર વાઇરલ થતા લોકો ડરી ગયા છે.
પોલીસ સૂત્રોના જણાવ્યા મુજબ ગુરુવાર, 5 માર્ચના રોજ લગભગ 20:54 વાગ્યે વેમ્બલીના ઇલિંગ રોડ પર આવેલ માણેકચોક રેસ્ટોરન્ટમાં ગુનાહિત નુકસાન કરાયા અને ઝઘડાના અહેવાલોને પગલે પોલીસ ઘટનાસ્થળે ધસી ગઇ હતી. આરોપ છે કે પુરુષોનું એક જૂથ રેસ્ટોરન્ટમાં ઘૂસી ગયું હતું અને અંદરના ભાગમાં જઇને નુકસાન કર્યું હતું.’’
પોલીસ અધિકારીઓએ ઘટનાસ્થળે જઇને રેસ્ટોરન્ટના માલિકો અને સાક્ષીઓ સાથે વાત કરી હતી. જો કે કોઈને ઈજાઓ થઈ નહોતી. તે સમયે કોઈ ધરપકડ કરવામાં આવી નહોતી અને તપાસ ચાલુ છે. આ ઘટનાના વાઇરલ થયેલા વિડીયો ફૂટેજમાં બાલાકલાવા, હૂડી અને લાંબા ઝભ્ભા પહેરેલા તોફાની યુવાનો – કિશોરોનું એક જૂથ રેસ્ટોરંટમાં ઘૂસી જઇ તોડફોડ કરતું અને ડરી ગયેલ રેસ્ટોરંટ સ્ટાફ દેખાય છે. વીડિયોમાં ટેબલ અને ખુરશીઓ ઉથલાવી દેવાયેલા, ખોરાક અને ક્રોકરી તૂટેલા ફૂટેલા દેખાય છે.
અન્ય એક બનાવ અંગે પોલીસના જણાવ્યા મુજબ શુક્રવાર, 6 માર્ચના રોજ લગભગ 20:38 વાગ્યે વેમ્બલીના હેરો રોડ પર આવેલ પાનેસર ફૂડ એન્ડ વાઇન નામની દુકાનમાં ઘૂસી જઇને કિશોર વયના છોકરાઓના એક જૂથે દુકાનના ફળ-ફળાદી અને શાકભાજી ફેંકી દીધાં હોવાના, ગુનાહિત નુકસાન કરવાના અને મારામારીના અહેવાલો મળ્યા બાદ પોલીસે તપાસ આદરી હતી. જો કે આ બનાવ અંગે પણ કોઈ ધરપકડ કરવામાં આવી નથી અને તપાસ ચાલુ છે.
વેમ્બલી વિસ્તારમાં પોલીસિંગનું નેતૃત્વ કરતા ચીફ ઇન્સ્પેક્ટર યુ ઝાંગે કહ્યું હતું કે “અમે ફેબ્રુઆરીના મધ્યભાગથી વેમ્બલીના ઇલિંગ રોડ પર દુકાનો અને રેસ્ટોરન્ટમાં આચરવામાં આવેલા ગુના અને અસામાજિક વર્તણૂકમાં સામેલ વ્યક્તિઓ સાથેની ઘણી ઘટનાઓથી વાકેફ છીએ. આ માટે આશ્વાસન આપવા માટે વધારાનું પેટ્રોલિંગ કરવામાં આવી રહ્યું છે અને અમે સ્થાનિક ધાર્મિક સ્થળો સહિત સમુદાયના ભાગીદારો સાથે નજીકથી કામ કરવાનું ચાલુ રાખીએ છીએ, જેથી દરેક વ્યક્તિ સુરક્ષિત અનુભવે. અમારું ધ્યાન તમામ સમુદાયોનું રક્ષણ કરવા, પીડિતોને ટેકો આપવા અને વિસ્તારને સુરક્ષિત રાખવા પર છે.”
પોલીસ પૂછપરછમાં એમ જણાયું છે કે કેટલીક ઘટનાઓ હિન્દુઓ દ્વારા સંચાલિત બિઝનેસીસ ખાતે બની હતી. પોલીસ અધિકારીઓ આ બનાવોમાં સંપૂર્ણ સંજોગો સ્થાપિત કરવા માટે સખત મહેનત કરી રહ્યા છે. પોલીસ અધિકારીઓએ આ અંગે માહિતી ધરાવતા સૌને આગળ આવવા અપીલ કરી છે.
વેમ્બલીના ઈલિંગ રોડ અને સડબરી વિસ્તારમાં આવેલી દુકાનોને નિશાન બનાવવા બાબતે બ્રેન્ટ કાઉન્સિલના કોમ્યુનિટી સેફ્ટી એન્ડ સોશિયલ કોહેશન માટેના કેબિનેટ સભ્ય કાઉન્સિલર ઇશ્મા મોઈને કહ્યું હતું કે “સ્થાનિક બિઝનેસીસને અપાતી કોઈપણ હિંસક અથવા લક્ષ્યાંકિત ધમકી સંપૂર્ણપણે અસ્વીકાર્ય છે અને બ્રેન્ટમાં તે સહન કરાશે નહીં. અમે ખૂબજ ખલેલ પહોંચાડતી ઘટનાઓથી પ્રભાવિત લોકો સાથે છીએ. બિઝનેસ માલિકો અને કર્મચારીઓ ભય વિના કામ કરવામાં સક્ષમ હોવા જોઈએ.
બ્રેન્ટ કાઉન્સિલે એક નિવેદનમાં કહ્યું હતું કે ‘’કાઉન્સિલ, મેટ્રોપોલિટન પોલીસ અને સ્થાનિક ભાગીદારો સાથે મળીને ગુપ્ત માહિતી શેર કરવા, અસરગ્રસ્તોને ટેકો આપવા અને જવાબદારોને નશ્યત મળે તે સુનિશ્ચિત કરવામાં મદદ કરવા માટે કામ કરી રહી છે. બ્રેન્ટની તાકાત તેની વિવિધતા છે, અને અમે હિંસક વ્યક્તિઓને સમુદાયની એકતા નબળી પાડવા દઈશું નહીં. અમે માહિતી અથવા ફૂટેજ ધરાવતી કોઈપણ વ્યક્તિને વિલંબ કર્યા વિના પોલીસ સમક્ષ આવવા પ્રોત્સાહિત કરીએ છીએ.’’
કાઉન્સિલે પોતાના નિવેદનમાં જણાવ્યું હતું કે “અમે ગુનેગારોના હેતુઓ વિશે ઓનલાઈન કેટલીક અટકળો જોઈ છે અને અમે દરેકને તેમાં વધારો અથવા ઉમેરો કરવાનું ટાળવા માટે પ્રોત્સાહિત કરીશું. પોલીસ તથ્યો સ્થાપિત કરવા માટે કામ કરી રહી છે અને તે ઉપલબ્ધ થતાંની સાથે જ વધુ પુષ્ટિ થયેલી માહિતી શેર કરવામાં આવશે.”
ટાઈમ્સ ઓફ ઈન્ડિયાના અહેવાલમાં આરોપ મુકાયો હતો કે શંકાસ્પદ સોમાલીયન પુરુષોની ગેંગ બિઝનેસીસને નિશાન બનાવવામાં સામેલ હતી. જો કે ‘ગરવી ગુજરાત’ સ્વતંત્ર રીતે તે દાવાઓની ચકાસણી કરી શક્યું નથી. ‘ગરવી ગુજરાતે’ રેસ્ટોરંટ માલિકનો સંપર્ક કર્યો હતો પરંતુ તેમણે ફરીથી સંપર્ક કરશે એમ જણાવ્યું હતું.
