વડાપ્રધાન નરેન્દ્ર મોદી 68 ટકા એપ્રુવલ રેટિંગ સાથે ફરી એકવાર વિશ્વના સૌથી લોકપ્રિય નેતાઓની યાદીમાં ટોચ પર રહ્યાં છે. આની સામે અમેરિકન પ્રેસિડન્ટ ડોનાલ્ડ ટ્રમ્પ માત્ર 39 ટકા એપ્રુવલ રેટિંગ સાથે ટોપ-10માંથી બહાર ફેંકાઈ ગયાં હતાં. બ્રિટનના વડાપ્રધાન કેર સ્ટાર્મરનું એપ્રુવલ રેટિંગ માત્ર 24 ટકા રહ્યું હતું, એમ અમેરિકા સ્થિત પ્રતિષ્ઠિત ડેટા એનાલિટિક્સ ફર્મ મોર્નિંગ કન્સલ્ટના એક સરવેમાં જણાવાયું હતું.
મોર્નિંગ કન્સલ્ટે 2થી 8 માર્ચ દરમિયાન હાથ ધરેલા સરવેમાં મોદીનું એપ્રુવલ રેટિંગ 68 ટકા જેટલું ઊંચું રહ્યું હતું, જે બીજા વૈશ્વિક નેતાઓ કરતાં ઘણુ ઊંચું છે. સતત ત્રીજી ટર્મ માટે સત્તામાં હોવા છતાં મોદી દેશ અને વિશ્વસ્તરે પોતાની લોકપ્રિયતા જાળવી રાખવામાં સફળ રહ્યા છે. અમેરિકન પ્રેસિડન્ટ ડોનાલ્ડ ટ્રમ્પ ટોપ-10 રેન્કિંગમાં પણ સ્થાન મેળવી શક્યા નથી. ટ્રમ્પ માત્ર 39 ટકા એપ્રુવલ રેટિંગ સાથે ટોપ-10માંથી બહાર ફેંકાઈ ગયાં હતાં.
વિશ્વના સૌથી લોકપ્રિય નેતાઓની આ યાદીમાં વડાપ્રધાન મોદી પછી સ્વિટ્ઝર્લૅન્ડના પ્રેસિડન્ટ ગાય પાર્મેલિન અને દક્ષિણ કોરિયાના પ્રમુખ લી જે-મ્યુંગ સંયુક્ત રીતે બીજા સ્થાને રહ્યાં હતાં. આ બંને નેતાનું એપ્રિવલ રેટિંગ 62 ટકા રહ્યું હતું. ચેક રિપબ્લિકના નેતા પેટર ફિયાલા 57 ટકા એપ્રુવલ રેટિંગ અને આર્જેન્ટિનાના પ્રમુખ હાવિયર મિલેઇ 56 ટકા એપ્રુવલ રેટિંગ ત્રીજા અને ચોથા સ્થાને રહ્યાં હતાં.
યુએસ પ્રેસિડન્ટ ઉપરાંત યુરોપના બીજા દેશો પણ મોદી કરતાં ઘણા પાછળ રહ્યાં હતાં. બ્રિટના વડાપ્રધાન કેર સ્ટાર્મરનું એપ્રુવલ રેટિંગ માત્ર 24 ટકા રહ્યું હતું. ફ્રાન્સના પ્રેસિડન્ટ ઇમેન્યુઅલ મેક્રોન 17 ટકા રેટિંગ આ યાદીમાં સૌથી નીચે ધકેલાઈ ગયાં હતાં.
મહત્ત્વની બાબત એ છે કે પીએમ મોદી સત્તામાં આવ્યા ત્યારથી તેમની લોકપ્રિયતા અકબંધ રહી છે. આ નવા રેટિંગનું વિશેષ મહત્ત્વ છે, કારણ કે મોદીએ હજુ તાજેતરમાં જ સૌથી લાંબા સમય સુધી સરકારના વડા તરીકે સેવા આપવાની સિદ્ધિ હાંસલ કરી હતી.
