ગરવી ગુજરાત અને ઈસ્ટર્ન આઈ ન્યૂઝ વીકલીઝના પ્રકાશકો એશિયન મીડિયા ગ્રુપ દ્વારા તા. 25ને બુધવારની રાત્રે સેન્ટ્રલ લંડનની પાર્ક પ્લાઝા વેસ્ટમિન્સ્ટર બ્રિજ ખાતે યોજાયેલા વાર્ષિક GG2 લીડરશીપ એન્ડ ડાયવર્સિટી એવોર્ડ્સમાં ડેપ્યુટી પ્રાઈમ મિનિસ્ટર ડેવિડ લેમીને લેમીને ટોચના GG2 હેમર એવોર્ડથી સન્માનિત કરવામાં આવ્યા હતા. એવોર્ડ સમારોહમાં લેસ્ટર યુનિવર્સિટીના પ્રેસિડેન્ટ અને વાઇસ ચાન્સેલર, સર પ્રોફેસર નિશાન કાનાગરાજાને GG2 મેન ઓફ ધ યર અને GG2 વુમન ઓફ ધ યર એવોર્ડ લંડન યુનિવર્સિટીના ટ્રસ્ટી બોર્ડના અધ્યક્ષ કવિતા રેડ્ડીને એનાયત કરવામાં આવ્યો હતો.
આ પ્રસંગે અગ્રણી સાંસદો, પીયર્સ તેમજ સમુદાય અને પ્રોફેશનલ અગ્રણીઓ સહિત 500 લોકો ઉપસ્થિત રહ્યા હતા.
આ કાર્યક્રમમાં બ્રિટનના 101 સૌથી પ્રભાવશાળી એશિયનોનું સંકલન કરતા વાર્ષિક GG2 પાવર લિસ્ટની નવીન આવૃત્તીનું પણ લોન્ચિંગ કરાયું હતું. જેમાં હોમ સેક્રેટરી શબાના મહમૂદ આ વર્ષના રેન્કિંગમાં ટોચ પર છે, ત્યારબાદ લંડનના મેયર સર સાદિક ખાન બીજા સ્થાને છે. વડા પ્રધાન સર કેર સ્ટાર્મરના ડેપ્યુટી ચીફ ઓફ સ્ટાફ વિદ્યા અલાકેસન ત્રીજા ક્રમે, કોર્ટ ઓફ અપીલ જજ સર રવિન્દર સિંહ અને બાર્કલેઝના સીઈઓ સીએસ વેંકટકૃષ્ણન ટોચના પાંચ સૌથી શક્તિશાળી એશિયનોમાં સામેલ થયા હતા.
ગ્લાસ સીલીંગ તોડીને જાહેર જીવનના ઉચ્ચતમ સ્તરે પહોંચેલા અને કાર્યક્રમના મુખ્ય મહેમાન તરીકે ઉપસ્થિત રહેલા લેમીએ તેમની માતાને શ્રદ્ધાંજલિ આપતાં કહ્યું હતું કે “મારી માતાએ અપાર મુશ્કેલીઓનો સામનો કરીને બ્રિટનમાં એક ઇમિગ્રન્ટ્સ તરીકે અમારૂ જીવન બનાવ્યું હતું. મારા પિતા અમને છોડી ગયા પછી મારી સીંગલ મધર તરીકે અમે બે ટંકનુ ખાઇ શકીએ તે માટે ઘણી નોકરીઓ કરી હતી. તેમના માટે મુશ્કેલ સમય હતો…. પરંતુ તેણી દૃઢ નિશ્ચયી હતી કે અમને તેના કરતા વધુ તકો મળશે. તેમણે અન્ય ઇમિગ્રન્ટ પરિવારોની જેમ જ અમારામાં ઘણા વર્ક એથિક્સનું સિંચન કર્યું હતું અને સમજાવ્યું હતું કે અન્ય લોકો કરતા અડધા અંતર સુધી પહોંચવા માટે પણ અમારે બમણી મહેનત કરવી પડશે.’’
શ્રી લેમીએ કહ્યું હતુ કે “આ રૂમમાં ઉપસ્થિત આપણા સૌએ આપણા દરેક માતાપિતા પાસેથી આ પ્રકારના શબ્દો સાંભળ્યા હશે અને આપણને શક્ય તેટલી સખત મહેનત કરવા માટે પ્રોત્સાહિત કર્યા છે, જેથી ખાતરી કરી શકાય કે આપણે પોતાને સફળ થવાની શ્રેષ્ઠ તક આપીએ.”
લંડનમાં ગયાનીઝ માતાપિતાના ઘરે જન્મેલા, લેમીએ હાર્વર્ડ યુનિવર્સિટીમાં સ્થાન મેળવ્યું હતું અને ત્યાં લૉનો અભ્યાસ કરનાર પ્રથમ શ્યામ બ્રિટીશ યુવાન બન્યા હતા. તેમણે પોતાના ભારતીય વારસાનો ખુલાસો કરતા કહ્યું હતું કે મારી માતાના પરદાદી કલકત્તાના હતા.
જૂન 2000માં નોર્થ લંડનના એમપી તરીકે ચૂંટાયા પછી, ડેવિડ લેમીએ અગાઉના વડા પ્રધાનો ટોની બ્લેર અને ગોર્ડન બ્રાઉનની સરકારમાં સેવા આપી હતી. સર કેર સ્ટાર્મરે તેમને સપ્ટેમ્બર 2025માં નાયબ વડા પ્રધાન બનાવ્યા હતા.
એવોર્ડ સમારોહમાં લેસ્ટર યુનિવર્સિટીના પ્રેસિડેન્ટ અને વાઇસ ચાન્સેલર, સર પ્રોફેસર નિશાન કાનાગરાજાને GG2 મેન ઓફ ધ યર સન્માન અપાયું હતું. શ્રીલંકાના જાફનામાં જન્મેલા સર પ્રોફેસર નિશાને કેમ્બ્રિજમાં શિષ્યવૃત્તિ જીતી હતી અને તેમણે પીએચડી પૂર્ણ કર્યું હતું. 2019માં યુનિવર્સિટી ઓફ લેસ્ટરના પ્રેસિડેન્ટ અને વાઇસ ચાન્સેલર તરીકે નિયુક્ત થઇ તે પહેલાં તેઓ બ્રિસ્ટલ યુનિવર્સિટીમાં જોડાયા હતા.
GG2 વુમન ઓફ ધ યર એવોર્ડ લંડન યુનિવર્સિટીના ટ્રસ્ટી બોર્ડના અધ્યક્ષ કવિતા રેડ્ડીને એનાયત કરવામાં આવ્યો હતો. તેણીએ બીબીસી ટ્રેઇની તરીકે કામની શરૂઆત કરી હતી અને ભારતમાં એક ટેક સ્ટાર્ટ-અપની સહ-સ્થાપના કરતા પહેલા સિનિયર એડિટર બન્યા હતાં. હવે તેઓ 250,000થી વધુ વિદ્યાર્થીઓની યુનિવર્સિટી નેટવર્કનું નેતૃત્વ કરે છે.
એશિયન મીડિયા ગ્રુપ (AMG)ના મેનેજીંગ એડિટર કલ્પેશ સોલંકીએ પોતાના ભાષણમાં કહ્યું હતું કે “આજે સાંજે અમે જે વિજેતાઓનું સન્માન કરીએ છીએ તેમણે ફક્ત અવરોધો તોડીને જ નહીં, પરંતુ તેમની પાછળ આવનારાઓ માટે દરવાજા પહોળા કરી દીધા છે. આજ રાતના એવોર્ડ વિજેતાઓ એ વાતનો પુરાવો છે કે જ્યારે અવરોધો પડી જાય છે અને પ્રતિભાને ખીલવા માટે જગ્યા આપવામાં આવે છે ત્યારે શું શક્ય બને છે. તેમની વાર્તાઓ ફક્ત વ્યક્તિગત વિજય નથી. તેઓ દીવાદાંડી છે – આગામી પેઢી માટે માર્ગ પ્રકાશિત કરે છે અને કહે છે કે દરવાજો ખુલ્લો છે, તેમાંથી પસાર થાઓ અને પછી તેને બીજા કોઈ માટે ખુલ્લો રાખો. વિવિધતા અને સમાવેશ એ કોઈ સમસ્યા નથી જેને સંચાલિત કરવી પડે, તે ઉજવણી કરવા માટે એક શક્તિ છે અને તેને ઝડપી લેવાની તક છે.”
ડૉ. નિક કોટેચા OBE DL ને GG2 સોશિયલ એન્ટરપ્રેન્યોર ઓફ ધ યર એવોર્ડ એનાયત કરાયો હતો. તેમણે 1991માં મોર્નિંગસાઇડ ફાર્માસ્યુટિકલ્સની સ્થાપના કરી હતી અને 2017માં, તેમની પત્ની મોની સાથે મળીને રાંદલ ચેરિટેબલ ફાઉન્ડેશનની સ્થાપના કરી હતી જેથી વિશ્વભરમાં સૌથી વધુ સંવેદનશીલ લોકોને મદદ કરી શકાય અને જીવન સુધારી શકાય.
અન્ય એવોર્ડ વિજેતાઓમાં સની સિંહ ગિલને GG2 ઇન્સ્પાયર એવોર્ડ એનાયત કરાયો હતો. માર્ચ 2024માં ક્રિસ્ટલ પેલેસ વિરુદ્ધ લુટનની મેચમાં અમ્પાયરિંગ કરીને તેઓ પ્રીમિયર લીગમાં પ્રથમ બ્રિટિશ સાઉથ એશિયન રેફરી બન્યા હતા. તેમણે અગાઉ પ્રીઝન ઓફિસર તરીકે કામ કર્યું હતું.
GG2 સ્પિરિટ ઇન ધ કોમ્યુનિટી એવોર્ડ મીરા નારણ MBE ને એનાયત કરવામાં આવ્યો હતો. રોડ ટ્રાફિક અકસ્માતમાં તેમના આઠ વર્ષના પુત્રના મૃત્યુ પછી, તેમણે માર્ગ સલામતી માટે ઝુંબેશ ચલાવી હતી જેથી અન્ય માતાપિતા ક્યારેય તેણીના જેવા દુઃખનો સામનો ન કરે. તેમના આ કાર્યોને કારણે 18 જેટલી નેશનલ પોલીસીમાં ફેરફારો થયા છે અને માર્ગ સલામતી પહેલમાં સરકાર તરફથી £900 મિલિયનથી વધુની સરકારી પ્રતિબદ્ધતાના જાહેરાત કરાઇ છે.
GG2 એચિવમેન્ટ થ્રુ એડવર્સીટી એવોર્ડ ફાઝામનેસ્ટીના સ્થાપક ફેરોન પોલને મળ્યો હતો. નાઇફ ક્રાઇમમાં તેમને બે વાર 18 વખત છરા મારવામાં આવ્યા હતા અને તેઓ કોમામાં જતા રહ્યા હતા. તેમણે એક ગ્રાસરૂટ કોમ્યુનિટી ગ્રુપની સ્થાપના કરી હતી જે હિંસાથી સંવેદનશીલ લોકોને ટેકો આપવા અને રક્ષણ આપવા અને તેમને કોઈ પ્રશ્ન પૂછ્યા વિના છરાઓ સોંપવા માટે પ્રોત્સાહિત કરવા પર ધ્યાન કેન્દ્રિત કરે છે.
લેસ્ટર યુનિવર્સિટીમાં પ્રાયમરી કેર ડાયાબિટીસ અને વાસ્ક્યુલર મેડિસિનના પ્રોફેસર કમલેશ ખુંટીને GG2 આઉટસ્ટેન્ડિંગ એચિવમેન્ટ ઇન મેડિસિન એવોર્ડ એનાયત કરાયો હતો. 2012માં, તેમણે લેસ્ટર ડાયાબિટીસ સેન્ટરની સ્થાપના કરી હતી જે યુકેમાં ડાયાબિટીસ માટેનું સૌથી મોટું ક્લિનિકલ રિસર્ચ સેન્ટર છે. 1,400થી વધુ પીઅર-સમીક્ષા કરાયેલા લેખો સાથે, તેઓ વિશ્વના ટોચના દસ અગ્રણી ડાયાબિટીસ નિષ્ણાતોમાંના એક તરીકે વ્યાપકપણે આદર પામે છે.
GG2 એમ્બ્રેસ એવોર્ડ ધ ભવનના એક્ઝિક્યુટિવ ડિરેક્ટર ડૉ. એમ.એન. નંદકુમાર એમબીઇને મળ્યો હતો. કર્ણાટકના મટ્ટુરમાં જન્મેલા ડૉ. નંદકુમારે વૈદિક વિદ્વાન તરીકે કારકિર્દી બનાવી છે અને ભારતીય કલા અને સંસ્કૃતિને પ્રોત્સાહન આપવા માટે લંડન સ્થિત ભવનનું નેતૃત્વ કર્યું છે.
જજ રંગાજીવા વિમાલસેનાને GG2 આઉટસ્ટેન્ડિંગ એચિવમેન્ટ ઇન લો એવોર્ડ મળ્યો છે. તેમણે શ્રીલંકા, ફીજી, સોલોમન આઇલેન્ડ્સ, પાપુઆ ન્યુ ગિની અને નૌરુમાં સેવા આપી છે, અને કોમનવેલ્થ, યુરોપ કાઉન્સિલ અને સંયુક્ત રાષ્ટ્ર દ્વારા અપનાવવામાં આવેલ નૌરુ ઘોષણાપત્ર બનાવ્યું છે. આ કાર્યક્રમના કોમ્પરર નિક્કી બેદી હતા. જ્યારે ઉપસ્થિત સૌ મહેમાનોએ જે સ્ટેમ સેલ ટ્રાન્સપ્લાન્ટેશનના ક્ષેત્રમાં સેવા આપતી અને અને દર્દીઓને સ્ટેમ સેલ શોધવા માટે દાતાઓ સાથે સંપર્ક કરાવતી એંથોની નોલાન ચેરિટી માટે ભંડોળ એકત્ર કર્યું હતું.
