મધ્ય-પૂર્વમાં યુદ્ધને પગલે અમેરિકન ડોલર સામે ભારતના રૂપિયાએ સોમવાર, 30 માર્ચે પ્રથમ વખત 95ની મહત્ત્વની સપાટી પણ ગુમાવી હતી. જોકે સેશનના અંત 94.78ના સ્તરે બંધ આવ્યો હતો. શેરબજારમાં ધરખમ ઘટાડો અને વિદેશી સંસ્થાકીય રોકાણકારો (FII)ની સતત વેચવાલીને કારણે ડોલર સામે રૂપિયામાં કડાકો બોલાયો હતો અને એક સમયે 95.14ના રેકોર્ડ નીચલા સ્તરે પટકાયો હતો.
પહેલી જાન્યુઆરી-2026થી અત્યાર સુધીમાં ડોલર સામે રૂપિયો 4.1 ટકા ગગડ્યો છે. 2025-26ના નાણાકીય વર્ષમાં ડોલર સામે રૂપિયો 9.88 ટકા ઘટ્યો છે, જે 14 વર્ષમાં સૌથી મોટો વાર્ષિક ઘટાડો છે. અગાઉ નાણાકીય વર્ષ 2012માં ડોલર સામે ભારતીય ચલણમાં 12.4 ટકાનો ઘટાડો થયો હતો.
ચાલુ નાણાકીય વર્ષમાં, વિદેશી ફંડ્સની સતત વેચવાલી, ક્રૂડ ઓઇલના ભાવમાં વધારો અને વૈશ્વિક સ્તરે ડોલરમાં મજબૂતાઈને કારણે રૂપિયામાં ધોવાણ થયું છે. 1 એપ્રિલથી અન્ય એશિયન ચલણોમાં પણ યુએસ ડોલર સામે તીવ્ર ઘટાડો જોવા મળ્યો હતો, જેમાં જાપાનીઝ યેન 6 ટકા, ફિલિપાઇન્સ પેસો 5.74 ટકા અને દક્ષિણ કોરિયન વોનમાં 2.88 ટકાનો ઘટાડો થયો હતો. 2025-26ના નાણાકીય વર્ષના શરૂઆતમાં રૂપિયામાં ઘટાડાનું મુખ્ય કારણ અમેરિકાએ ભારત પર લાદેલી જંગી ટેરિફ હતી. પશ્ચિમ એશિયામાં સંઘર્ષને કારણે પરિસ્થિતિ વધુ વણસી ગઈ છે, જેના કારણે ક્રૂડ ઓઇલના ભાવમાં ઉછાળો આવ્યો છે જેના કારણે રૂપિયા પર દબાણ વધ્યું છે.
સ્થાનિક ચલણને ટેકો આપવા માટે રિઝર્વ બેન્કે જાન્યુઆરી સુધીમાં હાજર બજારમાં 55.073 બિલિયન ડોલરનું વેચાણ કર્યું હતું. ચલણના ઘટાડાને અંકુશમાં લેવા રિઝર્વ બેન્કે સટ્ટાકીય સોદા સામે પણ અંકુશ મૂક્યા છે.
