ભારત સરકાર કોરોના મહામારીના આશરે બે વર્ષ બાદ 27 માર્ચથી રેગ્યુલર ઇન્ટરનેશનલ ફ્લાઇટ ફરી ચાલુ કરવાની જાહેરાત કરી હોવાથી ઇન્ટરનેશનલ ફ્લાઈટની સંખ્યા વધી જશે અને એરફેરમાં લગભગ 40 ટકા સુધી ઘટાડો થવાની ધારણા છે. કોવિડના કારણે લગભગ બે વર્ષ સુધી હવાઈ મુસાફરી પર અનેક પ્રકારના નિયંત્રણો હતા. હવે આ નિયંત્રણો દૂર થઈ રહ્યા છે અને ફ્લાઈટની સંખ્યા વધવાની છે જેથી એરફેર સસ્તા થશે તેમ આ સેક્ટરના નિષ્ણાતો માને છે. જર્મનીની લુફ્થાન્સા અને ગ્રૂપ કેરિયર સ્વીસે આગામી કેટલાક મહિનામાં પોતાની ફ્લાઈટની સંખ્યા બમણી કરવાનો નિર્ણય લીધો છે. જ્યારે સિંગાપોર એરલાઇન્સ તેની ફ્લાઈટની સંખ્યામાં 17 ટકા સુધી વધારો કરે તેવી શક્યતા છે. ડોમેસ્ટિક એરલાઈન ઇન્ડિગો પણ ફ્લાઈટની સંખ્યા વધારવા માટે સજ્જ છે. આગામી બે-ત્રણ મહિનામાં ઇન્ડિગો 100થી વધુ ગ્લોબલ ફ્લાઈટ શરૂ કરવા વિચારે છે.

રશિયાએ ભારતને ડિસ્કાઉન્ટ ભાવે ક્રૂડ ઓઇલનો સપ્લાય આપવાની ઓફર કરી છે. ભારત સરકાર આ ઓફરનો સ્વીકાર કરવો કે નહીં તેની વિચારણા કરી રહી છે. યુક્રેન પર રશિયાના આક્રમણને પગલે ક્રૂડ ઓઇલના વૈશ્વિક ભાવમાં ઉછાળો આવ્યો હોવાથી આયાત પર મદાર રાખતા ભારત જેવા દેશ માટે આ ઓફર આકર્ષક છે, પરંતુ સરકાર તેનો જવાબ નક્કી કરતાં પહેલા તમામ પરિબળોને ધ્યાનમાં રાખવા માગે છે. સરકારના વરિષ્ઠ અધિકારીએ બુધવારે જણાવ્યું હતું કે છેલ્લાં બેથી ત્રણ દિવસથી ઓપન ઓફર છે કે રશિયા ડિસ્કાઉન્ટ ભાવે ક્રૂડ ઓઇલનો સપ્લાય આપવા તૈયાર છે. પરંતુ તેનો અમલ કેવી રીતે કરવો તે સવાલ છે.રશિયાથી ક્રૂડ ઓઇલ ભારતમાં કેવી રીતે લાવવું તે સહિતના વિવિધ પરિબળોની વિચારણા ચાલે છે. સૂત્રોએ જણાવ્યું હતું કે રશિયાના ક્રૂડ ઓઇલની આયાત કરવા માટે સરકારને કોઇ વાંધો નથી, પરંતુ કેટલીક પડકારોની વિચારણા જરૂર છે.

હિમાલયન કથિત યોગીના ઈશારે ભારતના સૌથી મોટા શેરબજાર નેશનલ સ્ટોક એક્સચેન્જનું સંચાલન કરનાર NSEની ભૂતપૂર્વ CEO ચિત્રા રામકૃષ્ણની કેન્દ્રીય તપાસ એજન્સી CBIએ કો-લોકેશન કેસમાં રવિવાર રાત્રે ધરપકડ કરી હતી. આ અગાઉ સીબીઆઈની સ્પેશિયલ કોર્ટે કો-લોકેશન કેસમાં તેમના આગોતરા જામીનની અરજી રદ કરી હતી. ચિત્રા પર હિમાલયના કથિત યોગીના ઈશારા પર કામ કરવાનો અને સંવદેશનશીલ જાણકારી શેર કરવાનો આરોપ છે. શનિવારે સીબીઆઈની કોર્ટ દ્વારા ચિત્રા રામકૃષ્ણની આગોતરા જામીનની અરજી રદ કરી દેવામાં આવી હતી અને જણાવ્યું હતું કે, ચિત્રાની સામે લાગેલાં આરોપ ખુબ જ ગંભીર પ્રકારના છે. સીબીઆઆઈએ તાજેતરમાં એનએસઈના ભૂતપૂર્વ ગ્રુપ ઓપરેટિંગ ઓફિસર આનંદ સુબ્રમણ્યમની ચેન્નઈથી ધરપકડ કરી હતી. એવું માનવામાં આવી રહ્યું છે કે, હિમાલયના યોગી બીજું કોઈ નહીં પણ આનંદ સુબ્રમણ્યમ જ છે.

મોરબીના પ્રખ્યાત ટાઇલ્સ ઇન્ડસ્ટ્રી સામે યુરોપિયન યુનિયનને એન્ટી ડમ્પિંગ તપાસ ચાલુ કરી છે. જો તપાસમાં પૂરવાર થશે તે ટાઇલ ઉત્પાદકો બજાર ભાવ કરતા નીચા ભાવ યુરોપના બજારમાં માલ ડમ્પ કરે છે તો તેના પર જંગી એન્ટી ડમ્પિંગ ડ્યૂટીની શક્યતા છે. યુરોપિયન યુનિયનને ટર્કીની ટાઇલ સામે પણ આવી તપાસ ચાલુ કરી છે. તેનાથી મોરબીના ટાઈલ ઉત્પાદકોને ફટકો પડી શકે છે. યુરોપિયન સિરામિક ટાઇલ મેન્યુફેક્ચરર્સ ફેડરેશન (CET)ની ફરિયાદના પગલે આ તપાસ શરૂ થઈ છે. CETએ જણાવ્યું હતું કે છે કે ભારત અને તુર્કીથી મોટા પાયે ટાઈલ્સની આયાત થતી હોવાથી તેમનો બિઝનેસ ઘટી ગયો છે. CETએ પુરાવા તરીકે વેચાણના આંકડા પણ આપ્યા છે.

કોરોનાકાળ પછી હવે અનેક ફિલ્મો રીલીઝ માટે તૈયાર

કોરોના મહામારીના કારણે બોલીવૂડ સહિત સમગ્ર મનોરંજન ઉદ્યોગને આકરો આર્થિક ઝટકો લાગ્યો હતો. હવે કોરોના હળવો થતા થિયેટરો સંપૂર્ણપણે ખુલી ગયા છે, ત્યારે ફિલ્મ નિર્માતાઓ બેક ટુ બેક ફિલ્મો રીલિઝ કરવા આતુર છે. આ વર્ષે કંગના રનોતની ફિલ્મ રીલીઝ થવાની છે. જેમાં બાળ તસ્કરી અને મહિલાઓના શોષણ પર ફોકસ કરવામાં આવ્યું છે. કંગના આ ફિલ્મમાં એજન્ટ અગ્નિના રોલમાં ગુનેગારો સાથે લડતી જોવા મળશે. ટાઇગર શ્રોફની હીરોપંતી ટુ ૨૯ એપ્રિલે રીલિઝ થશે, જેમાં તેની સાથે તારા સુતરિયા જોવા મળશે. વર્ષ ૨૦૧૪માં હીરોપંતી રીલિઝ થઇ હતી જેના દ્વારા ટાઇગરે બોલીવૂડમાં ડેબ્યુ કર્યું હતું. જોન અબ્રાહમની એકશન ફિલ્મ અટેક ૧લી એપ્રિલના રીલિઝ માટે તૈયાર છે.

નસીરૂદ્દીનને શું છે બીમારી?

બોલીવૂડના 71 વર્ષીય પીઢ અભિનેતા નસીરૂદ્દીન શાહ એક બીમારીથી પીડાઇ રહ્યા છે. તાજેતરમાં જ તેમણે પોતાના આરોગ્ય અંગે સ્પષ્ટતા કરી હતી. નસીરૂદ્દીને એક ઇન્ટર્વ્યૂમાં જણાવ્યું હતું કે, તેઓ ઓનોમૈટોમૈનિઆ નામની બીમારીથી પીડાઇ રહ્યા છે. આને કારણે તેઓ એકની એક વાત વારંવાર કર્યા કરે છે. તેણે આ બીમારી વિશે જણાવ્યું હતું કે, આ પ્રકારની તકલીફ એ એક મેડિકલ કંડીશન છે. હું મજાક કરતો નથી. તમે ઇચ્છો તો ડિકશનરીમાં તમે ચેક કરી શકો છો. આ એક એવી સ્થિતિ છે, જેમાં તમે તમારા શબ્દો અને વાક્યોને વારંવાર રિપીટ કરતા રહો છો. હું કદી આરામથી બેસી શકતો જ નથી. મારી આ તકલીફ એટલી હદે વધી ગઇ છે કે, મારી મનપસંદ વાતને હું નિંદ્રામાં પણ બોલતો હોઉં છું.

હોળીએ પ્રકટ થશે દયાભાભી?

તારક મહેતા કા ઉલ્ટા ચશ્મા…સીરિયલથી જાણીતા બનેલા દયાભાભી ઉર્ફે દિશા વાકાણીની ગેરહાજરી ઓડિયન્સને સતત ખટકી રહી છે. લગ્ન પછી દિશા વાકાણી ઘણાં સમયથી આ શોમાં દેખાયા નથી, પરંતુ હવે તેમના કમબેકની વાતો ચાલી રહી છે. આ વખતે તેઓ એક ફોટોના કારણે ન્યૂઝમાં છે. દિશા વાકાણી ત્રણ વર્ષ કરતાં વધુ સમયથી પડદા પર દેખાયા નથી. શોમાં પરત આવવા અંગેના સમાચાર સમયાંતરે વાઈરલ બને છે. આ વખતે તેમણે પોસ્ટ કરેલા એક ફોટાગ્રાફને જોઈને માનવામાં આવે છે કે, હોળી સુધીમાં તેઓ આ શોમાં કમબેક કરશે. આ ફોટોગ્રાફમાં દિશા વાકાણી દયાભાભીના ગેટઅપમાં જોવા મળે છે અને સાથે તેમનો ભાઈ સુંદર (મયુર વાકાણી) પણ છે. અગાઉ દિશા વાકાણીના કમબેકની વાતો ચાલી હતી ત્યારે તેમણે પ્રોડ્યુસર સામે ત્રણ શરત રાખી હતી.

અક્ષયકુમાર ફરી મ્યુઝિક વીડિયોમાં દેખાશે

અક્ષયકુમાર અને બી પાર્કની જોડીએ બે હિટ મ્યુઝિક વીડિયોમાં સાથે કામ કર્યું છે. ફિલહાલ અને ફિલહાલ ટુ ગીતોને દર્શકોએ પસંદ પણ કર્યા છે. હવે આ જોડી ત્રીજું ગીત ગાવા માટે ફરીથી તૈયાર છે. સૂત્રોના જણાવ્યા અનુસાર, છેલ્લા થોડા અઠવાડિયામાં અક્ષયકુમાર અને બી પાર્કે વારંવાર મુલાકાત કરી હતી. તેમણે ફરી એક ગીત સાથે ગાવાનો નિર્ણય કર્યો છે. જે ફિલહાલ અને ફિલહાલ ટુ ગીત લઇને આવ્યા હતા એ જ ટીમ એક મ્યુઝિક વીડિયોની સ્ક્રિપ્ટ પર કામ કરી રહી છે. આ એક લાગણીશીલ ગીત બનશે, જોકે આ ગીતમાં નૂપુર જોવા મળશે કે નહીં તેની કોઇ માહિતી નથી.