નોર્થ વેસ્ટ લંડનના હેરોની ક્રિષ્ણા અવંતિ હાઉસ સેકન્ડરી સ્કૂલ દ્વારા વંચિત વિદ્યાર્થીઓ માટે ઉત્કૃષ્ટ પરિણામો (આઉટસ્ટેન્ડીંગ પ્યુપીલ આઉટકમ્સ) મેળવવા બદલ એજ્યુકેશન સેક્રેટરી બ્રિજેટ ફિલિપ્સન દ્વારા શાળાની પ્રસંશા કરી ઔપચારિક રીતે માન્યતા આપવામાં આવી છે. આ સફળતાએ શાળાને રાષ્ટ્રીય સ્તરે સૌથી વધુ પ્રદર્શન કરતી શાળાઓમાં સ્થાન આપ્યું છે.
પ્રિન્સિપાલ સાઇમોન આર્નેલ અને તેમની ટીમને લખેલા વ્યક્તિગત પત્રમાં, શ્રીમતી ફિલિપ્સને 2024/25 શૈક્ષણિક વર્ષના અંતે શાળાના પરિણામોની પ્રશંસા કરી હતી અને આ સિદ્ધિને સ્ટાફના સમર્પણ અને વિદ્યાર્થીઓની પ્રતિબદ્ધતાને “નોંધપાત્ર સફળતા” તરીકે વર્ણવી હતી. તેમણે શાળાને મહત્વાકાંક્ષા, સખત મહેનત અને ઉચ્ચ અપેક્ષાઓ દ્વારા શું પ્રાપ્ત કરી શકાય છે તેનું ઉદાહરણ ગણાવી હતી. તેમણે શાળા સંચાલકો અને વિદ્યાર્થીઓને સમગ્ર ક્ષેત્રમાં શ્રેષ્ઠ પ્રથાઓ શેર કરવાનું ચાલુ રાખવા અને સિસ્ટમ લીડર તરીકે અગ્રણી ભૂમિકા ભજવવા માટે પ્રોત્સાહિત કર્યા હતા.
અવંતિ સ્કૂલ્સ ટ્રસ્ટના એક ભાગ એવી અવંતિ હાઉસ સેકન્ડરી સ્કૂલને અગાઉ વિશ્વની શ્રેષ્ઠ શાળાઓમાં સ્થાન આપવામાં આવ્યું છે.
શ્રી આર્નેલે જણાવ્યું હતું કે આ માન્યતાનું ઉષ્માભર્યું સ્વાગત કરવામાં આવ્યું છે અને રાષ્ટ્રીય સ્તરે માન્યતા પ્રાપ્ત RISE નેટવર્ક્સ દ્વારા અન્ય શાળાઓને ટેકો આપતી વખતે તમામ વિદ્યાર્થીઓને તેમની સંપૂર્ણ ક્ષમતા સુધી પહોંચવામાં મદદ કરવા માટે શાળાની પ્રતિબદ્ધતાને પુનઃપુષ્ટિ કરી છે.
