અમેરિકામાં ઈમિગ્રેશન લાભ મેળવવા માટે ખોટી લૂંટનું નાટક કરવાના આરોપમાં 11 ગુજરાતીની પોલીસે ધરપકડ કરી હતી. આરોપીઓ સામે વિઝા ફ્રોડનો ગુનો દાખલ કરાયો હતો.
મેસેચ્યુસેટ્સમાં જિતેન્દ્રકુમાર પટેલ, મહેશકુમાર પટેલ, સંજયકુમાર પટેલ, અમિતાબહેન પટેલ, સંગીતાબહેન પટેલ અને મિતુલ પટેલને ધરપકડ કરીને તેમને બોસ્ટનની ફેડરલ કોર્ટમાં રજૂ કરાયાં હતાં.પ્રાથમિક સુનાવણી પછી તેમને મુક્ત કરાયા હતાં. બીજી તરફ કેન્ટકી, મિસોરી અને ઓહાયો રાજ્યોમાં રમેશભાઈ પટેલ, રોનકકુમાર પટેલ, સોનલ પટેલ અને મિન્કેશ પટેલની ધરપકડ કરાઈ હતી. તેઓને પણ આગળની કાર્યવાહી માટે બોસ્ટનની ફેડરલ કોર્ટમાં હાજર થવું પડશે.
અમેરિકાના કાયદા મુજબ જો વિઝા છેતરપિંડી માટેની કાવતરું સાબિત થાય તો આરોપીઓને પાંચ વર્ષ સુધીની જેલ, ત્રણ વર્ષ સુધીની દેખરેખ હેઠળ મુક્તિ અને 2.5 લાખ ડોલર સુધીનો દંડ થઈ શકે છે. અધિકારીઓએ સ્પષ્ટ કર્યું હતું કે હાલ આ માત્ર આરોપો છે. કાયદા મુજબ આરોપીઓ કોર્ટમાં ગુનો સાબિત ન થાય ત્યાં સુધી નિર્દોષ માનવામાં આવે છે.
મેસેચ્યુસેટ્સ રાજ્યના બોસ્ટન શહેરમાં ફેડરલ તપાસકર્તાઓના જણાવ્યા મુજબ આરોપીઓએ વિવિધ વેપારી સંસ્થાઓમાં ખોટી લૂંટની ઘટનાઓ ગોઠવી હતી. દુકાનમાં કામ કરતા કર્મચારીઓને ગુનાના પીડિત તરીકે બતાવીને યુ-વિઝા મેળવવાનો પ્રયાસ કરાયો હતો. અમેરિકામાં “યુ-વિઝા” તેવા લોકોને આપવામાં આવે છે જે ગંભીર ગુનાના ભોગ બન્યા હોય અને પોલીસ તપાસમાં સહકાર આપે છે અને આનાથી ગ્રીનકાર્ડનો માર્ગ પણ મોકળો થતો હોય છે.
તપાસ એજન્સીઓએ જણાવ્યું કે આરોપીઓએ કન્વિનિયન્સ સ્ટોર, દારૂની દુકાનો અને ફાસ્ટ ફૂડ રેસ્ટોરાં સહિત વિવિધ સ્થળોએ ઓછામાં ઓછા છ ખોટી લૂંટની ઘટના ઘડી કાઢી હતી. આ સમગ્ર નાટક ખૂબ જ યોજનાપૂર્વક કરાયું હતું. એક વ્યક્તિ નકલી લૂંટારૂ બનીને દુકાનમાં પ્રવેશતો અને હાથમાં બંદૂક જેવી દેખાતી વસ્તુ રાખીને કાઉન્ટર પરથી રોકડ લઈને ત્યાંથી ભાગી જતો. સમગ્ર ઘટનાની CCTV કેમેરામાં રેકોર્ડિંગ થાય તેની ખાસ કાળજી રખાતી હતી, જેથી ઘટના સાચી હોય તેવું લાગે.
તપાસમાં બહાર આવ્યું હતું કે આવી લૂંટ બાદ દુકાનમાં હાજર લોકો તરત પોલીસને જાણ કરતા નહોતા. તેઓ ઈરાદાપૂર્વક પાંચ મિનિટ કે તેથી વધુ સમય પછી પોલીસને જાણ કરતા, જેથી નકલી લૂંટારૂ સરળતાથી ભાગી શકે અને ઘટના વધુ વિશ્વસનીય લાગે.
આ લૂંટના નાટકમાં ભાગ લેવા માટે કેટલાંક લોકો પૈસા ચૂકવતા હોવાનું પણ સામે આવ્યું છે, જેથી તેઓ પોતાને ખોટી રીતે ગુનાના પીડિત તરીકે રજૂ કરી શકે. તેઓ યુવિઝા મેળવવા માગતા લોકો પાસેથી પૈસા ઉઘરાતા હતા અને પછી દુકાન માલિકોને પૈસા આપી તેમની દુકાનોમાં આવી ખોટી લૂંટ ગોઠવતા હતાં.
