ભારતમાં રાંધણ ગેસના સિલિન્ડરની બૂમરાળ વચ્ચે સરકારે માહિતી આપી હતી કે શનિવારે વહેલી સવારે ખાડી દેશોમાંથી ઘરેલુ ગેસ લઈને આવતા બે ભારતીય જહાજો સુરક્ષિત રીતે હોર્મુઝ સ્ટ્રેટ ઓળંગીને ભારત તરફ આવી રહ્યાં છે. ભારતે હોર્મુઝ સ્ટ્રેટની પશ્ચિમમાં ફસાયેલા તેના 22 જહાજો માટે સુરક્ષિત મંજૂરી આપવાની પણ ઇરાન સમક્ષ રજૂઆત કરી હતી.
ઇરાને જહાજો માટેના આ સાંકડા સમુદ્રમાર્ગની નાકાબંધી વચ્ચે ભારતના જહાજને આપેલી મંજૂરી સરકારની મોટી રાજદ્રારી જીત છે. ભારતમાં તેહરાનના રાજદૂત મોહમ્મદ ફતાલીએ પુષ્ટિ આપી હતી કે ઈરાને કેટલાક ભારતીય જહાજોને હોર્મુઝ સ્ટ્રેટમાંથી પસાર થવાની મંજૂરી આપી છે.
શિપિંગ મંત્રાલયના વિશેષ સચિવ રાજેશ કુમાર સિન્હાએ મીડિયા બ્રીફિંગમાં જણાવ્યું હતું કે એલપીજી વહન કરતાં શિવાલિક અને નંદાદેવી નામના જહાજો હવે ગુજરાતના મુન્દ્રા અને કંડલા બંદરો તરફ આગળ વધી રહ્યાં છે. આ જહાજોમાં કુલ 92,700 ટન એલપીજી છે. શિવાલિક 16 માર્ચે મુન્દ્રા બંદરે, જ્યારે નંદાદેવી 17 માર્ચે કંડલા બંદરે પહોંચે તેવી શક્યતા છે.
બીજી તરફ ભારતમાં ગેસ સિલિન્ડર માટે ઠેરઠેર લાંબી લાઇનો જોવા મળી હતી. દિલ્લીમાં રેસ્ટોરન્ટ મોટા કોર્પોરેટ કાર્યક્રમો અને ગ્રુપ પાર્ટીઓ માટેના બુકિંગ તાત્કાલિક બંધ કર્યાં હતાં ખાસ કરીને કનોટ પ્લેસ જેવા બિઝનેસ ડાઈનિંગ હબમાં આવેલા રેસ્ટોરન્ટે જણાવ્યું હતું કે તેમણે મોટી પાર્ટીઓ માટેના બુકિંગ બંધ કર્યા છે અને માત્ર નિયમિત ગ્રાહકો પર ધ્યાન કેન્દ્રીત કરી રહ્યાં છે.
‘ફ્લેવર્સ ઓફ ચાઈના’ રેસ્ટોરન્ટના માલિક પરમજીત કૌરે જણાવ્યું કે ગેસ બચાવવા માટે કેટલાંક ખાદ્યપદાર્થો મેનૂમાંથી હટાવી દેવામાં આવ્યા છે. ઉદાહરણ તરીકે અમે હાલ સીઝલર્સ પીરસતા નથી, કારણ કે તેમાં સતત અને વધુ જ્યોતની જરૂર પડે છે. મેનૂમાં પણ ઘટાડો કરીને હવે માત્ર એવા વાનગીઓ રાખી છે જે ઓછી ગેસમાં તૈયાર થઈ શકે.
બીજી તરફ રાજ્ય સરકારોએ ગેસની સંગ્રહખોરો સામે કાર્યવાહી શરૂ કરી છે. કર્ણાટકના ફૂડ એન્ડ સિવિલ સપ્લાઈઝ વિભાગે કોમર્શિયલ ઉપયોગ માટે વપરાતા 316 ઘરેલુ એલપીજી સિલિન્ડરો જપ્ત કર્યા હતાં. કોલાર જિલ્લાના કેજીએફ વિસ્તારમાં ગેરકાયદેસર રીતે સિલિન્ડર રિફિલિંગ કરતી એક ગેસ એજન્સી સામે કેસ દાખલ કરાયો હતો.
ઉત્તરપ્રદેશમાં પણ ગેસની કાળાબજારી અટકાવવા માટે 1,483 સ્થળોએ દરોડા પાડવામાં આવ્યાં અને છ લોકોને ધરપકડ કરાઈ હતી. આ કાર્યવાહી દરમિયાન 24 એફઆઈઆર દાખલ કરાઈ હતી. પશ્ચિમ બંગાળના કોલકાતા અને અન્ય જિલ્લાઓમાં ગેસ એજન્સીઓની બહાર લાંબી કતારો જોવા મળી હતી. ચેન્નઈ અને તામિલનાડુના કેટલાક ભાગોની હોટેલોએ ઇન્ડક્શન સ્ટવનો ઉપયોગ ચાલુ કર્યો હતો. તમિલનાડુ સરકારે ઇલેક્ટ્રિક સ્ટવનો ઉપયોગ કરતાં રેસ્ટોરન્ટ, હોટલ અને ચાની દુકાનો માટે પ્રતિ યુનિટ વીજળી પર 2 રૂપિયાની સબસિડીની જાહેરાત હતી.
