અમેરિકાના શિકાગોમાં રહેતા વડોદરાના વૃદ્ધની તેમના પુત્રે જ માથામા હથોડીના ફટકા મારીને કથિત હત્યા કરી હતી. 29 નવેમ્બરે સ્કોમબર્ગ વિસ્તારમાં આ ભયાનક ઘટના બની હતી.
કુક કાઉન્ટીના અધિકારીઓએ પુષ્ટિ આપી હતી કે અભિજિત પટેલે તેના પિતા અનુપમ પટેલના માથા પર હથોડીથી બે વાર પ્રહાર કર્યો હતો, જેનાથી તેમની ખોપરી તૂટી ગઈ હતી. પોલીસે તે જ દિવસે અભિજિતની ધરપકડ કરી હતી અને સોમવારે તેને કોર્ટમાં રજૂ કરાયો હતો. તેના પર ફર્સ્ટ-ડિગ્રી મર્ડરનો આરોપ છે જેમાં તેને 60 વર્ષ સુધીની જેલની સજા થઈ શકે છે.
શિકાગો નજીક સાઉથ સેલેમ ડ્રાઇવ પર પરિવારના ઘરે પહોંચેલા અધિકારીઓએ અનુપમને લોહીથી લથપથ બેડ પર પડેલા જોયાં હતાં. અભિજીત પાસે હાથ ઉંચા કરીને ઉભો હતો, તેના ટી-શર્ટ પર લોહીના ડાઘા હતાં. હથોડી પલંગની બાજુમાં પડી હતી. ફરિયાદ પક્ષે આરોપ મૂક્યો હતો કે અભિજીત મહિનાઓથી તેના પિતાને મારી નાખવાની ધમકી આપી રહ્યો હતો.
લાંબા સમયથી પિતાને પુત્ર અભિજિત સાતે વિવાદ ચાલતો હતો. પિતાએ પુત્રના વર્તન અંગે પોલીસ ફરિયાદ કરી હતી. જેનાથી રોષે ભરાયેલા પુત્રએ ઘરમાં ઘૂસી પિતાને માથામાં હથોડીના ઉપરાછાપરી ફટકા મારતા તેઓ લોહીલુહાણ હાલતમાં સોફા પર ફસડાઈ પડ્યા હતા. જેના કારણે મૃત્યુ થયું હતું.
હત્યાના પગલે શિકાગોમાં રહેતા ગુજરાતી પરિવારોમાં શોકનું મોજું ફરી વળ્યું હતું. સૂત્રોના કહેવા પ્રમાણે, અમેરિકામાં અભ્યાસ દરમિયાન અભિજિતે આપત્તિજનક મેસેજ અન્યના મોબાઈલ પર મોકલ્યા હતા. જેથી બાપ-દીકરા વચ્ચે વિવાદ થયો હતો. પુત્રથી ખતરો લાગતા પિતાએ પોલીસને જાણ કરી હતી. પોલીસે અભિજિતની અટકાયત કરી હતી અને કોર્ટમાં રજૂ કર્યો હતો. કોર્ટ તેને પિતાથી દૂર રહેવા આદેશ આપ્યો હતો.
