ગુજરાત સહિત દેશભરમાં સોમવાર, 2 માર્ચે રંગોના તહેવાર હોળી તથા બુધવાર, 4 માર્ચે ધુળેટીના પર્વની રંગેચંગે ઉજવણી થઈ હતી. ગુજરાતના પ્રખ્યાત યાત્રાધામો ડાકોર, દ્વારકામાં આસ્થાનો મહેરામણ ઉમટ્યો હતો. પ્રખ્યાત મંદિરોમાં સવારથી જ ભક્તોએ અબીલ-ગુલાલ ઉડાડીની હોળીની ઉજવણી કરી કરી હતી.સાંજે હોલિકાદહન કરાયું હતું. લોકોએ પૂજન સામગ્રી અને ઘાણી-ખજૂર- નારિયળ લઈને પૂજા અર્ચના કરી હતી અને હોળીની પ્રદક્ષિણા કરી આશીર્વાદ માંગ્યાં હતાં.
ગુજરાતમાં દ્વારકા અને ડાકોર સહિતના તમામ કૃષ્ણ મંદિરોમાં હોળીની ઉજવણી કરાઈ હતી હોળીના તહેવારોમાં ભગવાનના દર્શનનો અનેરો મહિમા છે. એકબીજાને રંગ અને ગુલાલથી રંગીને શુભેચ્છાઓ પાઠવી હતી. યાત્રાધામ દ્વારકામાં હોળી ફુલડોલ ઉત્સવ પર્વ પર ભક્તો મોટી સંખ્યામાં ઉમટી પડ્યાં હતા. દ્વારકાધીશ મંદિરમાં ભક્તોએ દ્વારકાધીશના દર્શન કરી અબીલ-ગુલાલ લગાવી રંગોત્સવ મનાવ્યો હતો. ભગવાન કૃષ્ણના જય દ્વારકાધીશના નાદ સાથે મંદિરોમાં દર્શનાર્થીઓની ભીડ ઉમટી હતી.
સફેદ સાડી પહેરીને અને રંગોના તહેવારમાં ભાગ લેવાથી રોકતી રૂઢિચુસ્ત પરંપરાઓને તોડીને વૃંદાવનની વિધવાએ સોમવારે અહીંના ઐતિહાસિક ગોપીનાથ મંદિરમાં હોળીની ઉજવણી કરી હતી. પાંચ આશ્રમોની 200થી વધુ વિધવાઓએ “બંસી વાલે કી જય”ના નારા લગાવ્યા હતાં. મંદિરમાં ગવાયેલી ‘રસિયા’ની ધૂન પર નૃત્ય કર્યું હતું. તેમણે ઉજવણીમાં એકબીજા પર 1,000 કિલોથી વધુ ફૂલો અને 700 કિલો ‘ગુલાલ’ છાંટ્યા હતાં.
