ઈરાન સાથે વધતા સંઘર્ષ વચ્ચે અમેરિકાએ શુક્રવાર 6 માર્ચે જણાવ્યું હતું કે તેને ભારતીય રિફાઇનરીઓને રશિયન તેલ ખરીદવા 30 દિવસની કામચલાઉ મંજૂરી આપી છે.
ટ્રેઝરી સેક્રેટરી સ્કોટ બેસેંટે જણાવ્યું હતું કે પ્રેસિડન્ટ ટ્રમ્પના ઉર્જા એજન્ડાને પરિણામે તેલ અને ગેસનું ઉત્પાદન અત્યાર સુધીના ઉચ્ચતમ સ્તરે પહોંચ્યું છે. વૈશ્વિક બજારમાં તેલનો પ્રવાહ ચાલુ રહે તે માટે ટ્રેઝરી વિભાગ ભારતીય રિફાઇનરોને રશિયન તેલ ખરીદવા 30 દિવસની કામચલાઉ છૂટ આપી રહ્યું છે. આ ટૂંકા ગાળાના પગલા થી રશિયન સરકારને નોંધપાત્ર નાણાકીય લાભ મળશે નહીં, કારણ કે તે ફક્ત સમુદ્રમાં પહેલાથી જ ફસાયેલા તેલને લગતા ટ્રાન્ઝેક્શનને જ અધિકૃત કરે છે. ભારત અમેરિકાનો એક મહત્વપૂર્ણ ભાગીદાર દેશ છે, અને અમને સંપૂર્ણ અપેક્ષા છે કે નવી દિલ્હી યુએસ તેલની ખરીદીમાં વધારો કરશે. આ કામચલાઉ પગલાંથી ઈરાનના વૈશ્વિક ઊર્જા સપ્લાયને બંધક બનાવવાના પ્રયાસને કારણે થતા દબાણમાં ઘટાડો થશે.
અગાઉ યુએસ પ્રમુખ ડોનાલ્ડ ટ્રમ્પે રશિયન તેલ ખરીદવા બદલ ભારત પર 25 ટકા દંડાત્મક ટેરિફ લાદ્યો હતો. ગયા મહિને, અમેરિકા અને ભારતે જાહેરાત કરી હતી કે તેઓ વેપાર પર વચગાળાના કરાર માટે એક માળખા પર પહોંચી ગયા છે, અને ટ્રમ્પે ભારત પરના 25 ટકા દંડાત્મક ટેરિફને દૂર કરવાનો એક એક્ઝિક્યુટિવ ઓર્ડર જારી કર્યો હતો, જેમાં નવી દિલ્હી દ્વારા મોસ્કોથી ઊર્જા આયાત બંધ કરવાની અને અમેરિકન ઊર્જા પ્રોડક્ટ્સ ખરીદી વધારવાની પ્રતિબદ્ધતાની નોંધ લેવામાં આવી હતી.
