ભારતમાં સાતત્યપૂર્ણ આર્થિક વૃદ્ધિને પગલે બિલિયોનેર્સની સંખ્યામાં પણ મોટો વધારો થયો છે. હુરુન રિસર્ચ ઇન્સ્ટિટ્યૂટે શનિવારે જારી કરેલા ‘હુરુન ગ્લોબલ રિચ લિસ્ટ 2026’ મુજબ ભારતમાં બિલિયોનેર્સની સંખ્યા વધી 308 થઈ છે, જે ગયા વર્ષની સરખામણીમાં 24નો વધારો દર્શાવે છે. ભારત હવે અબજોપતિઓની સંખ્યાના સંદર્ભમાં અમેરિકા અને ચીન પછી ત્રીજા ક્રમે આવી ગયું છે.
રીપોર્ટમાં જણાવ્યા મુજબ મુંબઈમાં સૌથી વધુ 95 અબજપતિ છે, જોકે એશિયામાં અબજોપતિઓની રાજધાની તરીકે મુંબઈએ તેનું સ્થાન ગુમાવ્યું છે. હવે શેનઝેન 133 અબજપતિઓ સાથે ટોચના સ્થાને આવી ગયું છે. ભારતના આર્થિક રાજધાની ગણાતા મુંબઈમાં આ વર્ષે 15 નવા અબજોપતિઓ ઉમેરાયા હતાં, જે ન્યૂયોર્ક સિટીમાં 14 અને લંડનમાં 9 કરતાં વધુ છે.
ભારતના અબજોપતિઓની કુલ સંપત્તિમાં વાર્ષિક ધોરણે 10 ટકા વધી રૂ.112.6 ટ્રિલિયન થઈ છે. 199 ધનિકોની સંપત્તિમાં વધારો જોવા મળ્યો હતો. જોકે 109 અબજોપતિઓની સંપત્તિમાં ઘટાડો થયો હતો અથવા સ્થિર રહી હતી. ભારતના અબજોપતિઓમાં મહિલાઓનું પ્રમાણ સાત ટકા રહ્યું છે.
હુરુનના અહેવાલ મુજબ ભારતમાં હવે માત્ર પરંપરાગત ઇન્ડસ્ટ્રીમાં ધનિકો રહ્યાં નથી, પરંતુ હવે બીજા ક્ષેત્રોમાં પણ અબજપતિઓની સર્જન થઈ રહ્યું છે, જે તમામ ક્ષેત્રોમાં આર્થિક વિકાસના થઈ રહ્યો હોવાનો સંકેત આપે છે.
હેલ્થકેર ક્ષેત્રમાં સૌથી વધુ સંખ્યામાં નવા અબજપતિઓનું સર્જન થયું છે. આ ક્ષેત્રમાં 53 નવા અબજોપતિ બન્યાં હતાં. આ ઉપરાંત ઇન્ડસ્ટ્રીયલ પ્રોડક્ટ્સ ક્ષેત્રમાં 36 અને કન્ઝ્યુમર ગૂડ્સ ક્ષેત્રમાં નવા 31 અબજોપતિ બન્યાં હતાં.
એનર્જી ક્ષેત્રમાં નવા અબજોપતિઓની સંખ્યા મર્યાદિત રહી હતી, પરંતુ આ ક્ષેત્રમાં સૌથી વધુ સંપત્તિનું સર્જન થયું હતું. આ આક્ષેના માત્ર આઠ અબજપતિઓનું સંપત્તિ કુલ રૂ.18.3 ટ્રિલિયન છે, જે દેશના અબજપતિઓની કુલ સંપત્તિના આશરે 16 ટકા થાય છે.
વૈશ્વિક સ્તરે સૌથી વધુ અબજોપતિ ધરાવતા શહેરોમાં ન્યૂયોર્ક 146 સાથે ટોચના સ્થાને રહ્યું હતું. આ પછી શાંઘાઈમાં 120, બેઇજિંગમાં 107 અને લંડનમાં 102 અબજોપતિઓ છે. અહેવાલમાં નોંધવામાં આવ્યું હતું કે ભારતના અબજોપતિઓ સરેરાશ ઉંમર વૈશ્વિક અબજપતિઓની સરેરાશ ઉંમર કરતાં વધુ રહી છે. ભારતમાં અબજોપતિઓની સરેરાશ ઉંમર 67 વર્ષ છે, જ્યારે વૈશ્વિક સરેરાશ 65 વર્ષ છે. ભારતમાં 23 મહિલા અબજપતિઓની કુલ સંપત્તિ રૂ.9.9 ટ્રિલિયન ડોલર રહી હતી.
