નેપાળની સામાન્ય ચૂંટણીમાં રેપરમાંથી રાજકારણી બનેલા બાલેન્દ્ર શાહની આગેવાની હેઠળની આરએસપીનો રવિવારે પ્રચંડ વિજય થયો હતો. રાષ્ટ્રીય સ્વતંત્ર પાર્ટી (RSP)ના 35 વર્ષીય વડાપ્રધાન પદના ઉમેદવાર બાલેન તરીકે જાણીતા તેમણે ચાર વખતના વડાપ્રધાન કેપી શર્મા ઓલીને હરાવ્યા હતાં. આ ચૂંટણીમાં તમામ જૂના પક્ષો અને રીઢા નેતાઓનો સફાયો હતો. હવે દેશમાં ‘ઝેન ઝી’ની સરકારની રચના થશે.
અગાઉ ‘ઝેન ઝી’ના હિંસક આંદોલનથી કે પી. શર્મા ઓલીના નેતૃત્વવાળી ગઠબંધન સરકારનું પતન થયું હતું. આ આંદોલન પછી પ્રથમવાર 5 માર્ચે યોજાયેલી યોજાયેલી ચૂંટણીમાં શાંતિપૂર્ણ માહોલમાં આશરે 60 ટકા મતદાન થયું હતું.
જનતાએ જૂના રાજકીય પક્ષોને જાકારો આપ્યો હોવાથી બાલેન શાહ નેપાળના નવા વડાપ્રધાન બને તેવી પ્રબળ સંભાવના છે. નેપાળના સંસદીય ઇતિહાસમાં તેઓ આ પદ પર બિરાજમાન થનારા સૌથી યુવા નેતા બનશે.
રવિ લામિછાને દ્વારા 2022માં રચાયેલી RSPએ રવિવારે સવારે 10 વાગ્યે જારી થયેલા રિઝલ્ટ મુજબ 138માંથી 107 બેઠકો જીતી હતી. બીજી તરફ નેપાળી કોંગ્રેસને માત્ર 15 બેઠકો મળી હતી અને ત્રણ બેઠકો પર આગળ હતી. સીપીએન-યુએમએલ ફક્ત સાત બેઠકો જીતી હતી અને ત્રણમાં આગળ હતી. નેપાળી કોમ્યુનિસ્ટ પાર્ટી (એનસીપી) છ બેઠકો જીતી હતી અને એકમાં આગળ હતી. સંસદના 275 સભ્યોમાંથી 165 સભ્યો સીધા મતદાન દ્વારા ચૂંટાઈ છે, જ્યારે બાકીના 110 સભ્યો પ્રમાણસર મતદાન પદ્ધતિ દ્વારા ચૂંટાય છે.
