અમેરિકા અને ઇઝરાયેલે 28 ફેબ્રુઆરીએ ઇરાન સામે ચાલુ કરેલી લશ્કરી કાર્યવાહીમાં શનિવાર, 7 માર્ચે ઇરાને હુમલા કરવા બદલ પડોશી આરબ દેશોની માફી માગી હતી. જોકે સાઉદી અરેબિયા અને કુવૈત સહિતના પડોશી દેશો પર મિસાઇલ અને ડ્રોન હુમલા ચાલુ રાખ્યાં હતાં. બીજી તરફ અમેરિકાના પ્રેસિડન્ટે ટ્રમ્પે ફરી ધમકી પણ આપી હતી કે ઇરાન પર ભીષણ હુમલા કરાશે. ઈરાનના ખરાબ વર્તનને કારણે જે વિસ્તારો અત્યાર સુધી નિશાન બનાવવામાં આવ્યાં ન હતાં. તેમના પર હુમલા કરાશે.
યુએઇના સંરક્ષણ મંત્રાલયે જણાવ્યું હતું કે તેની એર ડિફેન્સ સિસ્ટમે 15 જેટલાં બેલિસ્ટિક મિસાઇલ્સ અને 119 જેટલા ડ્રોન્સ તોડી પાડ્યાં હતાં. દેશની એર ડિફેન્સ સિસ્ટમ ઇરાનના મિસાઇલ અને ડ્રોન હુમલાનો જવાબ આપી રહી છે. ઇન્ટરસેપ્શન ઓપરેશનને દેશના કેટલાંક વિસ્તારોમાં મોટો અવાજો સંભાળાયા હતાં.
યુદ્ધ દરમિયાન પડોશી દેશો પર હુમલા કરવા બદલ ઇરાનને માફી માગી હતી અને પડોશી દેશો પર હુમલા ન કરવાની જાહેરાત કરી હતી. જોકે અમેરિકાના પ્રેસિડન્ટ ડોનાલ્ડ ટ્રમ્પે આ માફીને ઇરાનની હાર ગણાવ્યા પછી ઈરાનના પ્રેસિડન્ટ મસૂદ પેઝેસ્કિયન સ્પષ્ટતા કરી હતી કે જો પડોશી દેશો ઈરાન પર અમેરિકાના હુમલામાં સાથ નહીં આપે તો જ અમે તેમના પર હુમલો નહીં કરીએ.
ઇરાનના ન્યાયતંત્રના વડાએ પણ જણાવ્યું હતું કે અમારા દેશ સામેના આક્રમણમાં દુશ્મનોને મદદ કરતા પડોશી દેશો પર હુમલા ચાલુ રહેશે. ઈરાનના સશસ્ત્ર દળો પાસેના પુરાવા દર્શાવે છે કે પડોશી દેશોના કેટલાંક વિસ્તારોનો દુશ્મનોનો ખુલ્લેઆમ અને ગુપ્ત રીતે ઉપયોગ કરીને ઇરાન પર હુમલા કરી રહ્યાં છે. આવા ટાર્ગેટ પર ભીષણ હુમલા ચાલુ રહેશે. ન્યાયતંત્રના વડા ગુલામ હુસેન મોહસેની એજેઈ વચગાળાની લીડરશીપ કાઉન્સિલના એક સભ્ય પણ હોવાથી તેમના આ નિવેદનનું વિશેષ મહત્ત્વ છે.
યુએઇ અને કતાર જેવા પશ્ચિમ એશિયા અને મધ્ય પૂર્વના ઘણા દેશોમાં અમેરિકાના લશ્કરી થાણા છે. અમેરિકાના આ થાણાને ઇરાન ટાર્ગેટ કરી રહ્યું છે, તેનાથી શહેરોમાં પણ નુકસાન થઈ રહ્યું છે.
ટ્રમ્પે ટ્રુથ સોશિયલ પર એક પોસ્ટમાં દાવો કર્યો હતો કે અમેરિકા અને ઇઝરાયલના અવિરત હુમલાઓને કારણે ઇરાનને તેના પડોશી દેશોને હુમલા ન કરવાનું વચન આપવું પડ્યું હતું. ઇરાન હારી ચુક્યું છે. તેને માફી માંગી છે અને મધ્યપૂર્વના તેના પડોશીઓ સમક્ષ શરણાગતિ સ્વીકારી છે.
