પેન્સિલવેનિયામાં ભારતીય મૂળના બે ભાઈઓ ભાસ્કર સવાણી અને અરુણ સવાણીને વિઝા ફ્રોડ, હેલ્થકેર ફ્રોડ, મની લોન્ડરિંગ અને કરચોરી સહિતની અનેક પ્રકારની ગેરરીતિના બહુ-રાજ્ય કૌભાંડના કાવતરામાં દોષિત ઠેરવવામાં આવ્યા છે. ફરિયાદીઓએ જણાવ્યું હતું કે સવાણી બંધીઓએ સવાણી ગ્રુપ તરીકે ઓળખાતા બિઝનેસનું નેટવર્ક બનાવ્યું હતું અને ઘણા વર્ષો સુધી આ ગેરકાયદેસર સ્કીમ્સ દ્વારા લાખો ડોલરની કમાણી કરી હતી.
ભાસ્કર સવાણીને કાયદાકીય રીતે મહત્તમ 420 વર્ષની જેલની સજા થઈ શકે છે. અરુણ સવાણીને કાયદાકીય રીતે મહત્તમ 415 વર્ષની જેલની સજા થઈ શકે છે. ભાઈઓના એક સહયોગી, એલેક્ઝાન્ડ્રા રાડોમિયાકને પણ દોષિત ઠેરવવામાં આવ્યાં હતાં અને તેને 40 વર્ષ સુધીની જેલ અને દંડની સજા થઈ શકે છે. ભાસ્કર સવાણીને 8 જુલાઇ અને અરુણ સવાલને 9 જુલાઇએ સજા સંભળાવવામાં આવશે.
60 વર્ષના ભાસ્કર સવાણ ડેન્ટિસ્ટ છે અને તેઓ મેડિકલ સંબંધિત ફ્રોડમાં સીધી રીતે સંડોવાયેલા હતાં. બંને ભાઈઓએ તેમની કંપનીઓ અને સંબંધિત સંસ્થાઓ દ્વારા વિવિધ પ્રકારની છેતરપિંડીભરી પ્રવૃત્તિઓ કરી હતી. યુએસ એટર્ની ઓફિસની એક પ્રેસ રિલીઝમાં જણાવ્યા અનુસાર તેમના કૃત્યોથી લાંબા સમય સુધી ગુનાહિત સાહસ ચાલ્યું હતું, જે સરકારી પ્રોગ્રામમાં છેતરપિંડી અને દુરુપયોગ કરીને કમાણી કરતાં હતાં.
H-1B ફ્રોડ અંગે પ્રોસેક્યુટર્સે જણાવ્યું હતું કે સવાણી ગ્રુપ વિદેશી કામદારો અને ખાસ કરીને ભારતીય કામદારોની ભરતી કરવા માટે ખોટા વિઝા એપ્લિકેશનો અને પિટિશન કરતું હતું. એકવાર નોકરી પર રાખ્યા પછી, આ કામદારોને કથિત રીતે વિવિધ ફી ચૂકવવા અને તેમના વેતનનો એક ભાગ સવાણી ગ્રુપને પરત કરવા માટે દબાણ કરવામાં આવતું હતું
બંને ભાઈઓ મેડિકેડ પ્રોગ્રામને ટાર્ગેટ બનતા મોટા હેલ્થકેર ફ્રોડમાં દોષિત સાબિત થયાં હતાં. તપાસકર્તાઓએ જણાવ્યું હતું કે સવાણી ગ્રુપે મેડિકેડ વીમા કરારમાંથી તેમની ડેન્ટલ પ્રેક્ટિસ રદ કર્યા પછી પણ મેડિકેડ ચૂકવણી મેળવવાનું ચાલુ રાખ્યું હતું. તેઓએ કથિત રીતે નોમિનીના માલિકીની ડેન્ટલ પ્રેક્ટિસ આવો ફ્રોડ કરતાં હતાં. $30 મિલિયનથી વધુના ખોટા મેડિકેડ દાવા થયા હતાં.
અધિકારીઓએ એ પણ શોધી કાઢ્યું હતું કે ગ્રૂપે બીજા ડેન્ટીસ્ટના નેશનલ પ્રોવાઇડર આઇડેન્ટિફાયર (NPI)નો ઉપયોગ કરીને ખોટા મેડિકેડ બિલ સબમિટ કર્યા હતા. મની લોન્ડરિંગ અંગે ફરિયાદીઓએ જણાવ્યું હતું કે સવાણી બંધુઓ મની લોન્ડરિંગમાં સંડોવાયેલા હતાં. સવાણી ગ્રુપની વિવિધ સંસ્થાઓ સાથે જોડાયેલા કોર્પોરેટ બેંક ખાતાઓના જટિલ નેટવર્ક દ્વારા આરોગ્ય સંભાળ છેતરપિંડીની રકમ ટ્રાન્સફર કરીને છુપાવતા હતા.
ભાસ્કર સવાણી ડેન્ટલ પ્રેક્ટિસનું સંચાલન કરતા હતાં જ્યારે તેમના ભાઈ અરુણ સવાણી ઓપરેશન સાથે જોડાયેલ નાણાકીય અને રિયલ એસ્ટેટનું સંચાલન કરતા હતાં. નવાઈની બાબત તો એ છે કે તપાસ એજન્સીઓની નજરમાં હોવા છતાં આ બંને ભાઈઓ સોશિયલ મીડિયા પર એફબીઆઇના વડા કાશ પટેલ જેવા ઉચ્ચ અધિકારીઓ સાથેના ફોટો શેર કરીને રૂઆબ બતાવતા હતાં.
