અમેરિકાની સુપ્રીમ કોર્ટે પ્રેસિડન્ટ ડોનાલ્ડ ટ્રમ્પની મોટાભાગની વૈશ્વિક ટેરિફને રદ કર્યા પછી ટ્રમ્પ વહીવટીતંત્રે ભારત, ચીન અને બાંગ્લાદેશ સહિત 16 મુખ્ય વેપાર ભાગીદારો દેશો સામે નવી “અન્યાયી વેપાર પ્રથા” વિરુદ્ધ તપાસ શરૂ કરી છે. આ તપાસ 1974ના ટ્રેડ એક્ટની “કલમ 301” હેઠળ હાથ ધરવામાં આવી છે. આ કલમ હેઠળ યુએસ ટ્રેડ રિપ્રેઝન્ટેટિવ અન્યાયી વેપાર પ્રથાઓનો ઉપયોગ કરતા દેશો સામે ટેરિફ અથવા વળતા પગલાં લાદી શકે છે.
યુએસ ટ્રેડ રિપ્રેઝન્ટેટિવ જેમીસન ગ્રીરે જણાવ્યું હતું કે તપાસના પરિણામે આ ઉનાળા સુધીમાં ચીન, યુરોપિયન યુનિયન, ભારત, જાપાન, દક્ષિણ કોરિયા અને મેક્સિકો સામે નવા ટેરિફ લાદવામાં આવી શકે છે. તાઇવાન, વિયેતનામ, થાઇલેન્ડ, મલેશિયા, કંબોડિયા, સિંગાપોર, ઇન્ડોનેશિયા, બાંગ્લાદેશ, સ્વિટ્ઝર્લૅન્ડ અને નોર્વે જેવા દેશો સામે પણ આવી તપાસ ચાલુ કરાઈ છે. જોકે અમેરિકાના બીજા ક્રમના સૌથી મોટા વેપાર ભાગીદાર દેશ કેનેડાનું તપાસ હેઠળના દેશોની યાદીમાં નામ નથી.
ગ્રીરે કહ્યું હતું કે અમારે અમેરિકાની નોકરીઓ બચાવવાની છે, જો તેના માટે ટેક્સ વધારવો પડશે તો અમે પાછળ નહીં હટીએ.” આ નિર્ણય વ્યૂહાત્મક રીતે અત્યંત મહત્વનો છે, કારણ કે એપ્રિલમાં બેઇજિંગમાં ડોનાલ્ડ ટ્રમ્પ અને ચીનના પ્રેસિડન્ટ શી જિનપિંગ વચ્ચે મહત્વની બેઠક થવાની છે. આ બેઠક પહેલા જ તપાસ શરૂ કરીને ટ્રમ્પ ચીન અને અન્ય દેશો પર દબાણ વધારવા માંગે છે.
