ઇરાન દ્વારા કતાર અને દુબઇમાં હુમલાને પગલે તેની અસર વૈશ્વિક ક્ષેત્રે કાર્યરત બેંકો પર પણ પડી છે. આ સ્થિતિમાં HSBCએ કતારમાં બ્રાંચ બંધ કરી હતી. બીજી તરફ સિટીગ્રુપ અને સ્ટાન્ડર્ડ ચાર્ટર્ડે તેમની દુબઈની ઓફિસો ખાલી કરીને કર્મચારીઓને ઘરેથી કામ કરવાનું કહ્યું હતું. સૂત્રોના જણાવ્યા મુજબ, ઈરાન દ્વારા અમેરિકા અને ઇઝરાયલ સાથે જોડાયેલા અખાતી દેશોના બેંકિંગ કામકાજને ધમકી મળ્યા પછી વિવિધ બેંકો સતર્ક થઇ ગઇ હતી. સમાચાર એજન્સી-રોયટર્સના રીપોર્ટ અનુસાર અમેરિકાના જાણીતા સિટીગ્રુપે તેના કર્મચારીઓને દુબઈ ઇન્ટરનેશનલ ફાઇનાન્સિયલ સેન્ટર (DIFC) અને દુબઈના ઉદ મેથા વિસ્તારમાં આવેલી બેંકની ઓફિસોને ખાલી કરવા જણાવ્યું હતું. કર્મચારીઓને મોકલાયેલા એક મેમોમાં તેમને નવી સૂચના ન આપવામાં આવે ત્યાં સુધી ઘરેથી કામ કરવા જણાવવામાં આવ્યું હતું. બેંકના પ્રવક્તાએ જણાવ્યું હતું કે, તેઓ કર્મચારીઓની સુરક્ષા માટે કાર્યવાહી કરી રહ્યા છે અને બેંકના રોજિંદા કામકાજ માટે અન્ય વ્યવસ્થા તૈયાર કરી છે. બ્રિટનની સ્ટેનચાર્ટની યુએઇમાં મોટું કામકાજ ધરાવે છે. જેપી મોર્ગન અને HSBC સહિત અગ્રણી આંતરરાષ્ટ્રીય નાણાકીય કંપનીઓ, લો ફર્મ્સ અને એસેટ મેનેજર્સ માટે દુબઈ હવે મુખ્ય નાણાકીય કેન્દ્ર બની ગયું છે. સ્ટેનચાર્ટના પ્રવક્તાએ આ અંગે ટિપ્પણી કરવાનો ઇનકાર કર્યો હતો.
