મધ્યમપૂર્વમાં સંઘર્ષ વચ્ચે ક્રૂડ ઓઇલના વૈશ્વિક ભાવમાં ઉછળાને પગલે અમેરિકાની ડોનાલ્ડ ટ્રમ્પ સરકારે સમુદ્રમાં અટવાયેલા રશિયન તેલની ખરીદી કરવા માટે ભારતની જેમ બીજા દેશોને પણ ગુરુવારે હંગામી પરમિટ આપી હતી. આ અગાઉ 5 માર્ચે અમેરિકાએ તેલના વધતા ભાવને નિયંત્રિત કરવા માટે ભારતને પણ રશિયન તેલ ખરીદવા માટે પ્રતિબંધોમાંથી સમાન પ્રકારની છૂટ આપી હતી.
અમેરિકાના નાણાપ્રધાન સ્કોટ બેસેન્ટે ગુરુવારે સોશિયલ મીડિયા પ્લેટફોર્મ X પર પોસ્ટ કરીને જણાવ્યું કે પ્રેસિડન્ટ ટ્રમ્પ વૈશ્વિક ઊર્જા બજારમાં સ્થિરતા લાવવા અને કિંમતો નિયંત્રણમાં રાખવા માટે મહત્વપૂર્ણ પગલાં લઈ રહ્યા છે. આની સાથે જ ઇરાનની સરકારે ઊભી કરેલી અસ્થિરતા અને ખતરાનો સામનો કરી રહ્યા છે. વૈશ્વિક બજારમાં ઉપલબ્ધ પુરવઠો વધારવા માટે અમેરિકી ટ્રેઝરી વિભાગે એવી તાત્કાલિક મંજૂરી આપી છે કે દેશો સમુદ્રમાં હાલ ટ્રાંઝિટમાં રહેલું રશિયન તેલ ખરીદી શકે છે.
તેમણે વધુમાં જણાવ્યું હતું કે આ ટૂંકા ગાળાનું અને મર્યાદિત પગલું છે, જે માત્ર પહેલાથી જ સમુદ્રમાં પરિવહનમાં રહેલા તેલ પર લાગુ પડશે અને તેથી રશિયન સરકારને મોટો નાણાકીય લાભ નહીં મળે. પ્રેસિડન્ટ ટ્રમ્પની ઊર્જા સંબંધિત નીતિઓને કારણે અમેરિકામાં તેલ અને ગેસનું ઉત્પાદન રેકોર્ડ સ્તરે પહોંચ્યું છે, જેના કારણે સામાન્ય અમેરિકન લોકો માટે ઈંધણના ભાવ ઓછા રાખવામાં મદદ મળી છે. હાલ તેલના ભાવમાં થયેલો વધારો ટૂંકા ગાળાનો અને તાત્કાલિક વિક્ષેપ સંબંધિત છે, જે લાંબા ગાળે અમેરિકાની અર્થવ્યવસ્થાને મોટો લાભ પહોંચાડશે.
