ભારતીય સ્પિનર રવિચંદ્રન અશ્વિન યુએસ સ્થિત મેજર લીગ ક્રિકેટ (MLC)માં જોડાનારા પ્રથમ ભારતીય ખેલાડી બન્યો હતો. સાન ફ્રાન્સિસ્કો યુનિકોર્ન્સે શનિવારે આ ટ્વેન્ટી20 સ્પર્ધાની 2026 સીઝન માટે અશ્વિન સાથે કરારની જાહેરાત કરી હતી. MLCની ચોથી સીઝનનો પ્રારંભ 18 જૂનથી થશે.
તમામ ફોર્મેટમાં 287 મેચોમાં ભારતનું પ્રતિનિધિત્વ કરનાર અને 765 વિકેટ લેનાર અશ્વિને 2024માં આંતરરાષ્ટ્રીય ક્રિકેટમાંથી નિવૃત્તિ લીધી હતી. ગયા વર્ષે તેની ઇન્ડિયન પ્રીમિયર લીગ (IPL)ની કારકિર્દીનો પણ અંત લાવ્યો હતો. અનિલ કુંબલે પછી ટેસ્ટ ક્રિકેટમાં ભારતના બીજા સૌથી વધુ વિકેટ લેનાર બોલર અશ્નિન ઓસ્ટ્રેલિયાની બિગ બેશ લીગમાં સિડની થંડર તરફથી રમવાનો હતો, પરંતુ ઘૂંટણની ઈજાને કારણે તે રમી શક્યો નહીં.
અશ્વિને એક નિવેદનમાં જણાવ્યું હતું કે “મેજર લીગ ક્રિકેટમાં ભાગ લેનાર પ્રથમ ભારતીય ખેલાડી તરીકેની જવાબદારી સંભાળવી એ એક મોટી જવાબદારી છે જેને હું સંપૂર્ણપણે સ્વીકારું છું.મારું સંપૂર્ણ ધ્યાન આ ફ્રેન્ચાઇઝીને રમતો જીતવામાં અને તેની પ્રથમ ચેમ્પિયનશિપ માટે આગળ વધવામાં મદદ કરવાનું છે તથા બે એરિયા માટે એક શાનદાર બ્રાન્ડ ક્રિકેટ પણ રજૂ કરવાનું છે.”
